Ekisodo
10 Kaneko Yehofa ŵamsalile Mose kuti, “Mjawule kwa Falawo pakuŵa une ngundile kuti jwalakwe soni ŵakutumichila ŵakwe aŵe ŵakumula mtima, ni chakulinga chakuti ndende yakusimonjesya yeleyi pameso pa jwalakwe. 2 Ndesile yeleyi kuti jemanja chimwasalileje ŵanache ŵenu soni yisukulu yenu yandite pakwapa chilango* Aiguputo soni yakusimonjesya yandesile pameso pawo, mwamti jemanja chimchimanyilila nditu kuti une ndili Yehofa.”
3 Myoyo Mose ni Aloni ŵapite kwa Falawo ni kumsalila jwalakwejo kuti, “Yehofa Mlungu jwa Ahebeli aŵechete kuti, ‘Ana chimchikana kumbikanila une mpaka chakachi? Mwakunde ŵandu ŵangu kutyoka kuti akandumichile une. 4 Nambo naga mkukana kwakunda ŵandu ŵangu kutyoka, malaŵi une chiyikasye sombe m’chilambo chenu. 5 Sombesyo sichigumbala pachilambo chosope chapasi mwamti litaka ngasiliwonekaga. Sichilyasoni mbeju syenu syosope syasyasigele syele nganisijonasika ni matalila gala, nambosoni sichilya yitela yenu yosope yayikukula mwitinji. 6 Sombesyo sichigumbala m’nyumba syenu, m’nyumba sya ŵakutumichila ŵenu wosope, soni m’nyumba sya mu Iguputo mosope. Sombesyo sichiyika pakuti atamose achinangolo ŵenu soni achanganga ŵenu nganasiwoneje syamti mpela syelesyo kutandila pandaŵi jaŵatandite kutama m’chilambochi mpaka apano.’” Paŵaŵechete yeleyi, Mose ŵagalawiche ni kutyoka pameso pa Falawo.
7 Kaneko ŵakutumichila ŵa Falawo ŵamsalile jwalakwejo kuti, “Ana mundu jweleju chaŵe ali mkutulagasya mpaka chakachi? Ŵakunde ŵanduŵa ajawule kuti akamtumichile Yehofa Mlungu jwawo. Ana wawojo ngakuyiwonape mpaka apano kuti chilambo cha Iguputochi chijonasiche?” 8 Myoyo Mose ni Aloni ŵaŵilasile kuti ajawulesoni kwa Falawo. Paŵayiche kweleko, Falawo ŵasalile jemanjajo kuti, “Mjawuleje mkamtumichile Yehofa Mlungu jwenu. Nambo ana ŵani ŵakwawula nawo paulendowu?” 9 Pelepo Mose ni ŵajanjile kuti, “Chitujawule ni ŵandu ŵetu wosope kutandila ŵachinyamata, ŵachikulile, ŵanache ŵetu ŵachalume, ŵanache ŵetu ŵachakongwe, ngondolo syetu soni ng’ombe syetu, ligongo tukusaka tukamtendele Yehofa chisangalalo.” 10 Falawo ŵasalile jemanjajo kuti, “Naga ngumkunda kwawula pampepe ni ŵanache ŵenu nikuti Yehofa ali ni jemanja. Apa ni yikutenda kuwonechela kuti yakulinga yenu yili yakusakala. 11 Yeleyo ngayikomboleka. Kweleko ajawule achalumepe akamtumichile Yehofa ligongo yeleyo ni yamwaŵendile.” Ali aŵechete yeleyi, ŵasalile jemanjajo kuti atyoche pameso pa Falawo.
12 Sambano Yehofa ŵamsalile Mose kuti, “Mtambasukule mkono wenu ni kulanjila chilambo cha Iguputo kuti sombe siyiche ni kugumbala pachilambo chosope cha Iguputo, soni kuti silye yakumela yosope ya m’chilambomo, silye chilichose chele nganichijonasika ni matalila gala.” 13 Pelepo Mose ŵalanjile chilambo cha Iguputo ni ndodo jakwe, mwamti Yehofa ŵatendekasisye kuti mbungo jakutyochela kungopokolyuŵa jipuje m’chilambocho musi wosope soni chilo chosope. Pakwachele kundaŵi, mbungo jakutyochela kungopokolyuŵa jila jayiche ni sombe. 14 Sombesyo syayiche pachilambo chosope cha Iguputo soni syaliji palipose m’madela gosope ga m’chilambo cha Iguputocho. Syalijitu syejinji mnope mwamti kutandila kalakala nganisiwonecheje sombe syejinji chamti myoyo, nambosoni ngasisiwonekasoni sombe syejinji mpela syelesyo. 15 Sombesyo syagumbele pa litaka lya m’chilambo chosopecho mwamti m’chilambocho mwatesile chipi ligongo lya sombesyo. Syalile yakumela yosope yayaliji m’chilambocho soni yisogosi yosope yayaliji m’yitela yele nganiyijonasika ni matalila gala, mwamti nganipasigala lisamba lililyose m’yitelamo kapena mu yakumela ya m’chilambo chosope cha Iguputocho.
16 Pelepo Falawo ŵamŵilasile Mose ni Aloni mwachitema ni kwasalila kuti, “Ndemwisye kwa Yehofa Mlungu jwenu soni kwa jemanja. 17 Chonde ngumŵenda kuti mungululuchile ulemwa wangu ulendo awunope, soni mumbendele kwa Yehofa Mlungu jwenu kuti andyochesye mlili wakuwulagawu. 18 Myoyo jwalakwe* ŵatyosile pameso pa Falawo ni kwawula kukumŵenda Yehofa. 19 Kaneko Yehofa ŵatendekasisye kuti mbungo jichenje kwakutyochela, mwamti mbungo jamachili jatandite kupuga kutyochela kungapililolyuŵa soni jakokosile sombe syosopesyo ni kuja kusiponya mu Nyasa Jechejewu. Nganipasigala sombe atamose jimo m’madela gosope ga mu Iguputo. 20 Nambo Yehofa ŵamkundile Falawo kuti aŵepe jwakumula mtima mwamti nganiŵakunda Ayisalayeliwo kutyoka.
21 Kaneko Yehofa ŵamsalile Mose kuti, “Mtambasukule mkono wenu ni kulanjila kwinani ni chakulinga chakuti m’chilambo chosope cha Iguputo muŵe chipi chele chiŵe chakogoya mnope.” 22 Ndaŵi jijojo Mose ŵatambasukwile mkono wakwe ni kulanjila kwinani, mwamti kwatesile chipi chakogoya m’chilambo chosope cha Iguputo kwa masiku gatatu. 23 Ŵanduwo ŵalepelaga kuwonegana soni kwa masiku gatatu gelego pangali jwalijose juŵakombolaga kutyoka panyumba jakwe, nambo kwaŵatamaga Ayisalayeli kwaliji lilanguka. 24 Kaneko Falawo ŵamŵilasile Mose ni kumsalila kuti, “Mjawuleje mkatumichile Yehofa. Nambo ngondolo syenu ni ng’ombe syenu chimsileche kunokuno. Ŵanache ŵenuwo mpaka mwajigale.” 25 Nambo Mose ŵamjanjile Falawo kuti, “Wawojo atupe nyama syakuti tukawulaje ni kupeleka mbopesi syakutinisya kwa Yehofa Mlungu jwetu. 26 M’weji chitujawule yimpepe ni yilango yetu. Pangali chilango chilichose chachisigale akuno, ligongo chitukakamulichisyeje masengo yine mwa yilangoyo pakumtumichila Yehofa Mlungu jwetu. Soni ngatukumanyilila yachitukapeleche kwa Yehofa pachitukamtumichileje mpaka tuli tuyiche kaje kweleko.” 27 Myoyo Yehofa ŵakundile kuti Falawo aŵepe jwakumula mtima, mwamti Falawojo nganakunda yakuti Ayisalayeli atyoche. 28 Falawo ŵamsalile Mose kuti, “Mtyoche pameso pangu! Ngangusaka kumwonasoni, ligongo lisiku lyachimchiwonechelasoni pameso pangu chimchiwa.” 29 Pelepo Mose ŵajanjile kuti, “Une ngasimbonechelasoni pameso pawo mwakamulana ni yaŵecheteyo.”