Numeli
17 Sambano Yehofa ŵamsalile Mose kuti, 2 “Mwasalile Ayisalayeli kuti ampe mmwejo ndodo sya achakulungwakulungwa ŵa Ayisalayeli ŵakusajimilasoni mbumba* jilijose, ndodo jimo kutyochela kwa jwamkulungwa jwalijose. Ndodo syosope pampepe siŵe syakwana 12. Pa ndodo jilijosejo mlembe lina lya msyene ndodojo. 3 Mlembe lina lya Aloni pa ndodo jakwimila mbumba* ja Lefi, ligongo pa mbumba jilijose pakusosekwa kuŵa ndodo jimo ja mundu jwakwimila mbumbajo. 4 Ndodo syosopesyo mkasiŵiche mu chitenti chakusimanilana pasogolo pa Libokosi lya Umboni, kumalo gangusawonechela kwa mmwejo ndaŵi syosope. 5 Ndodo ja mundu jwachinamsagulejo jichisipuka. Pelepo chinjimasya kudandawula kwakukutenda Ayisalayeli mwakusisyana ni une soni mwakusisyana ni mmwejo.”
6 Myoyo Mose ŵasalile yeleyi Ayisalayeli mwamti achakulungwakulungwa wosope ŵaŵajimilaga mbumba syawo ŵampele ndodo syawo, ndodo jimo kutyochela kwa jwamkulungwa jwalijose. Ndodo syosope pampepe syakwanile 12. Nambosoni ndondo ja Aloni ŵajiŵisile papopo. 7 Kaneko Mose ŵajigele ndodosyo ni kuja kusiŵika pameso pa Yehofa mu chitenti cha Umboni.
8 Palisiku lyakuyichisya, Mose paŵajinjile mu chitenti cha Umbonicho, ŵajisimene ndodo ja Aloni jakwimila mbumba ja Lefi jili jisipwiche. Ndodojo jatesilesoni maluŵa nambosoni jasogwele yisogosi yejiwu ya amondi. 9 Kaneko Mose ŵajigele ndodo syosope syasyaliji pameso pa Yehofa sila ni kwawula nasyo pasa kuŵaliji Ayisalayeli wosope. Jemanjajo ŵasiweni ndodosyo, kaneko jwamkulungwa jwalijose ŵajigele ndodo jakwe.
10 Kaneko Yehofa ŵamsalile Mose kuti, “Mwujile najo ndodo ja Alonijo, ni mkajiŵiche pasogolo pa Libokosi lya Umboni kuti jiŵe chimanyisyo chakwakalamusya ŵandu ŵakwimuchilaŵa. Mtende yeleyi ni chakulinga chakuti kudandawula kwakutenda mwakusisyana ni uneku kumale nambosoni kuti jemanjaji akawa.” 11 Ndaŵi jijojo Mose ŵatesile mwakamulana ni yaŵamlamwile Yehofayo. Jwalakwe nditu ŵatesile mmomo.
12 Kaneko Ayisalayeliwo ŵamsalile Mose kuti, “Pelepa m’weji chituwe basi, nditu chitujonasiche, wosope ŵenewe chitujonasiche. 13 Jwalijose juchaŵandichile chitenti cha Yehofa chawe basi. Ana yisyene tumale kuwa m’litala lyeleli?”