Detulonomo
29 Sambano aga gali maloŵe ga chilanga cha Yehofa chaŵamlamwile Mose kuti atende ni Ayisalayeli m’chilambo cha Mowabu. Chelechi chili chilanga chine konjechesya pa chilanga chaŵatesile ni jemanjajo ku Holebe.
2 Pelepo, Mose ŵasongangenye Ayisalayeli wosope pampepe ni kwasalila kuti, “Jemanja mwayiweni yosope yaŵatesile Yehofa pameso penu m’chilambo cha Iguputo kwa Falawo soni kwa ŵakutumichila ŵakwe wosope pampepe ni chilambo chakwe chosopecho. 3 Mwachiwenisoni ni meso genu chilango* chamachili, yimanyisyo yekulungwa soni yakusimonjesya yaŵatesile. 4 Nambo mpaka lelo Yehofa nganampa jemanja mtima wakupikanichisya. Nganampasoni meso gakuti mkomboleje kulola soni mawiwi gakuti mkomboleje kupikana. 5 Jwalakwe ŵatite, ‘Pandaŵi janamlongolelaga jemanja m’chipululu kwa yaka 40, yakuwala yamwawalaga nganiyimalaga soni sapato syamwawalaga kusajo kwenu nganisimalaga. 6 Pandaŵiji jemanja nganimlyaga mikate* soni nganimmwaga finyo kapena yakumwa yiliyose yakumtendekasya kukolelwa, ni chakulinga chakuti jemanja mmanyilile kuti une ndili Yehofa Mlungu jwenu.’ 7 Pambesi pakwe jemanja mwayiche pamalo agano. Kaneko Sihoni mwenye jwa ku Hesiboni soni Ogi mwenye jwa ku Basana, ŵayiche kuti amenyane ni m’weji, nambo twagomeche jemanjajo. 8 Panyuma pakwagomeka jemanjajo, twajigele chilambo chawo ni kuchipeleka ku mbumba ja Lubeni, mbumba ja Gadi soni hafu ja mbumba ja Manase kuti chiŵe chipanje chawo. 9 Myoyo jemanja msunjeje maloŵe ga chilanga gelega soni mgapikanileje ni chakulinga chakuti yiliyose yachimtendeje yimjendeleje chenene.
10 “Lelo jemanja wosope mjimi pameso pa Yehofa Mlungu jwenu. Pelepa pana ŵakulongolela mbumba syenu, achakulungwa ŵenu, achalume ŵakulolela nambosoni jwamlume jwalijose jwa Chiyisalayeli. 11 Panasoni ŵanache ŵenu, achiŵamkwenu soni ŵandu ŵamitundu jine ŵakutama pasikati penu, kutandila ŵandu ŵakusamlokotela sasu mpaka ŵandu ŵakusamtechela mesi. 12 Jemanja msongene apano kuti mjitichisye chilanga cha Yehofa Mlungu jwenu mwakulumbila, chilanga chakutenda Yehofa Mlungu jwenujo ni jemanja lelo. 13 Mtende yeleyi ni chakulinga chakuti jwalakwejo amtende jemanja lelo kuŵa ŵandu ŵakwe soni kuti jwalakwejo aŵe Mlungu jwenu, mwakamulana ni chilanga chaŵatesile kwa jemanja soni yaŵatite pakulumbila kwa achinangolo ŵenu Abulahamu, Isaki soni Yakobo.
14 “Sambano chilanga changumlumbilikasyachi, ngangutenda ni jemanjape. 15 Nambo ngutenda ni ŵandu wosope ŵatujimi pameso pa Yehofa Mlungu jwetu pampepe ni ŵandu ŵanesoni ŵanganaŵa ni m’weji lelo. 16 Pakuŵa jemanja mkumanyilila chenene mwatwatamilaga m’chilambo cha Iguputo soni mwayaŵelaga patwapitaga m’yilambo ya ŵandu ŵamitundu jine paulendo wetu. 17 Paulendo welewu mwayiwonaga yindu yakunyalaya yayaliji pasikati pa ŵandu ŵamitundu jeleji, yindu yakwe mpela milungu jawo jakunyalaya* ja yitela soni ja maganga nambosoni ja silifa soni ja golide. 18 Jemanja msamale kuti pasikati penu pakasimanikwa jwamlume kapena jwamkongwe, liŵasa kapena mbumba jakumleka Yehofa Mlungu jwenu ni kutanda kutumichila milungu ja ŵandu ŵamitundu jine, yampaka yiŵe mpela mchiga wa chitela chakusogola yisogosi ya poyisoni pasikati penu soni mpela chitela chakuŵaŵa.
19 “Nambo naga mundu jwapikene maloŵe gakulumbilaga atandite kulikwesya mumtima mwakwe ni kuŵechetaga kuti, ‘Une chinjiŵape pamtendele atamose ngupitilisya kwenda m’matala gawukusaka mtima ŵangu,’ nambo yili yakuti yakutendayo yikwapwetekasya ŵandu ŵakuŵandikana nawo,* 20 mundu jwelejo Yehofa ngasamkululuchila. Mmalomwakwe ukali wekulungwa wa Yehofa uchigwila pa mundu jwelejo mwamti matembelelo gosope gagalembedwe m’buku aji, nditu gachiyika pa jwalakwejo. Soni Yehofa nditu chachimasya lina lya mundu jwelejo kuti likapikanikagasoni pa chilambo chapasi. 21 Yehofa chachimtyosya mundu jwelejo pasikati pa mbumba syosope sya Ayisalayeli ni kumgwichisya yakupweteka mwakamulana ni matembelelo gosope gagasasile m’chilanga gagalembedwe m’buku ja Chilamusi jeleji.
22 “M’bado* wamsogolo wa ŵanache ŵenu soni ŵandu ŵakutyochela m’yilambo ya kwakutalika, chachiyiwona yindu yakusawusya yayitendekwe m’chilambo chenu, yayili yakupweteka yayikasisye Yehofa m’chilambocho. 23 Chilambocho chichijonasika ni sulufule, njete soni moto. Yeleyi yichitendekasya kuti m’chilambo chosopecho ŵandu akapanda mbeju kapena mbeju sikamela kapenasoni kumela yine yiliyose m’chilambomo. Chilambocho chichiŵa mpela muwaŵelele msinda wa Sodomo ni Gomola soni msinda wa Adima ni Seboyimu, misinda jaŵajijonasile Yehofa ligongo lyakutumbila kwakwe soni ukali wakwe. 24 Payichitendekwa yeleyi, ŵanache ŵenuwo soni ŵandu ŵa m’yilambo yine ŵala pampepe ni mitundu jine josope chachiŵechetaga kuti, ‘Ligongo chichi Yehofa jwatesile yeleyi ku chilambo chelechi? Ana chichi chachatendekwe kuti jwalakwejo atumbile chamti myiyi?’ 25 Pelepo ŵandu chachijangaga kuti, ‘Yeleyitu yatendekwe ligongo lyakuti jemanjaji nganasunga chilanga cha Yehofa Mlungu jwa achinangolo ŵawo chaŵatesile ni jemanjajo ali ŵakopwesye m’chilambo cha Iguputo. 26 Mmalomwakwe ŵajile kukujitumichila milungu jine ni kujitindiŵalilaga, milungu janganajimanyililaga jemanjajo soni janganiŵakunda Mlungu kuti ajitumichileje. 27 Kaneko Yehofa ŵachitumbilile mnope chilambocho ni kwikasya matembelelo gosope gagalembedwe m’buku jeleji. 28 Ni ligongo lyakwe Yehofa ŵatumbilile mnope soni kwapila mtima jemanjajo, mwamti ŵatyosisye jemanjajo m’chilambo chawo ni kwajawusya m’chilambo chine kwakusimanikwa lelo.’
29 “Yehofa Mlungu jwetu akusamanyilila yindu yosope yakusisika. Jwalakwe akusatuwululila yindu m’weji soni ku mibado jetu josope mpaka kalakala, ni chakulinga chakuti tukuyeje maloŵe gakwe gosope ga mu Chilamusi chelechi.