Numeli

22 Kaneko Ayisalayeli ŵatyosile kweleko ni kukunga matenti gawo mu chipululu cha Mowabu ku lisi lya kungopokolyuŵa kwa Lusulo lwa Yolodani mwakulolegana ni msinda wa Yeliko lisi linelyo. 2 Sambano Balaki mwanache jwa Sipoli ŵapikene yindu yosope yaŵatesile Ayisalayeli kwa Aamoli, 3 mwamti Amowabu ŵatandite kwajogopa mnope Ayisalayeliwo ligongo lyakuti ŵapali ŵajinji. Nditu Amowabuwo wakamwile mnope woga ligongo lya Ayisalayeli. 4 Myoyo Amowabu ŵasalile achakulungwakulungwa ŵa ku Midiyani kuti, “Sambano gulu ja ŵandu ŵeleŵa chijipwapwatepwapwate chilambo chetuchi mpela mwajikusatendela ng’ombe pakumopola mopo mumgunda.”

Pandaŵiji Balaki mwanache jwa Sipoli ni juŵaliji mwenye jwa ku Mowabu. 5 Jwalakwe ŵatumisye ŵamitenga ku Petoli kuti akamŵilanje Balamu mwanache jwa Beoli. Ku Petoli ni kuŵapagwile Balamu, soni malo gelega galiji mwakuŵandikana ni Lusulo.* Mwenyewo ŵatumile jemanjajo kuti akasale maloŵe gakuti, “Mpikane, ŵandu ŵaneŵakwe ayiche kutyochela ku Iguputo. Ŵandu ŵeleŵa agumbele chilambo chosope, mwamti akutama mwipenu mwangu musyesyene. 6 Sambano myiche akuno kuti mungamuchisye. Ngusaka mwatembelele jemanjaji, pakuŵa ŵandu ŵeleŵa ali ŵamachili mnope kumbunda une. Myiche kuti mtende yeleyi, kuti mwine chingombole kwagomeka jemanjaji ni kwatopola m’chilambo changu, pakuŵa ngumanyilila chenene kuti naga mmwejo mumpele upile mundu, mundujo akusakola upile, soni naga mumtembelele mundujo akusaŵa jwakutembeleledwa.”

7 Myoyo achakulungwakulungwa ŵa ku Mowabu soni achakulungwakulungwa ŵa ku Midiyani ŵanyakwiche ali ajigele malipilo gakuti akampe Balamu pamasengo gakwe gakwatembelela Ayisalayeli. Ali ayiche kweleko ŵamsalile jwalakwe maloŵe gakutyochela kwa mwenye Balaki. 8 Pelepo Balamu ŵasalile jemanjajo kuti, “Agone kunokuno kuti malaŵi nasalile maloŵe gachaŵechete Yehofa kwa une.” Myoyo achakulungwakulungwa ŵa ku Mowabuwo ŵagonile kukoko.

9 Kaneko Mlungu ŵawonechele kwa Balamu ni kumwusya kuti, “Ana ŵandu ŵayicheŵa ali ŵani?” 10 Balamu ŵamjanjile Mlungu jwakuwonajo kuti, “Balaki mwanache jwa Sipoli, mwenye jwa ku Mowabu andumichisye utenga wakuti, 11 ‘Mpikane, ŵandu ŵaneŵakwe ŵakutyochela ku Iguputo ayiche ni kugumbala chilambo chosope. Sambano myiche akuno kuti mungamuchisye, ngusaka mwatembelele jemanjaji kuti mwine chingombole kumenyana nawo ni kwatopola m’chilambo changu.’” 12 Nambo Mlungu ŵamsalile Balamu kuti, “Mkalongana nawo ŵandu ŵeleŵa. Mkaja kwatembelela ŵandu ŵelewo ligongo unejo napele upile jemanjajo.”

13 Balamu paŵajimwiche kundaŵi ŵasalile achakulungwakulungwa ŵaŵatumisye Balaki ŵala kuti, “Jemanja wujilani ku chilambo chenu, ligongo Yehofa anganyisye kuti longane ni jemanja.” 14 Myoyo achakulungwakulungwa ŵa ku Mowabu ŵala ŵanyakwiche ni kuwujila kwa Balaki. Paŵayiche kweleko, ŵamsalile jwalakwe kuti, “Balamu akanile kwika akuno ni m’weji.”

15 Nambope Balaki ŵatumisyesoni achakulungwakulungwa ŵane. Pandaŵi aji ŵatumisye achakulungwakulungwa ŵajinji soni ŵakuchimbichika mnope kupunda ŵandanda ŵala. 16 Jemanjajo paŵayiche kwa Balamu ŵamsalile kuti, “Balaki mwanache jwa Sipoli atutumile ayi: ‘Chonde mkakunda kuti chindu chine chilichose chimlepelekasye kwika kwa une. 17 Pakuŵa une chinjimwupa ni yindu yejinji nambosoni chinjitenda chilichose chachimchisaka. Myoyo mkalepela chonde, myiche kuti mungamuchisye. Mwatembelele ŵandu ŵeleŵa.’” 18 Nambo Balamu ŵajanjile ŵakutumichila ŵa Balakiwo kuti, “Atamose Balaki ali ambele nyumba jakwe jili jegumbale ni silifa soni golide, nambo une nganimba ndesile chindu chine chilichose chakutindana ni yalamwile Yehofa Mlungu jwangu, chinga yalamwileyo yili yamwana kapena yekulungwa. 19 Nambope ngwaŵenda kuti agonesoni kunokuno mpela muŵatendele achimjawo ŵala kuti manyilile kaje yiliyose yachasalile Yehofa.”

20 Kaneko chilo Mlungu ŵawonechele kwa Balamu ni kumsalila kuti, “Naga ŵandu ŵeleŵa ayiche kukumŵilanga mmwejo, basi mlongane nawo. Nambo pachimkayiche kweleko mkaŵecheteje maloŵe agopego gachingamsalileje.” 21 Myoyo kundaŵi kwakwe Balamu ŵajimwiche ni kuŵika chakutamila pa bulu* jwakwe, kaneko ŵanyakwiche pampepe ni achakulungwakulungwa ŵa ku Mowabu ŵala.

22 Nambo Mlungu ŵapile mtima mnope ligongo lyakuti jwalakwejo ŵajawulagape kweleko, mwamti lilayika lya Yehofa lyajimi pamsewu kumwugalila litala. Pandaŵiji Balamu ŵaliji ali akwesile bulu jwakwe nambosoni ŵaliji yimpepe ni ŵamasengo ŵakwe ŵaŵili. 23 Sambano bulujo pajwaliweni lilayika lya Yehofa lili lijimi pamsewupo soni lili lijigele upanga* mmyala mwakwe, bulujo jwalingaga kusepuchila kwitinji. Nambo Balamu ŵatandite kumputa bulujo kuti juwujile mumsewu. 24 Kaneko lilayika lya Yehofa lila lyajile kwimasoni pamsewu wakanganika wakupita pasikati pa maganga gaŵili gakwima mpela mapupa. Msewuwu waliji pasikati pa migunda jiŵili ja mipeleya. 25 Bulu jula paŵaliwenisoni lilayika lya Yehofa lila, jwatandite kulikanganichisya ku liganga lyakwima mpela lipupa lila, mwamti bulujo ŵaluŵanisye lusajo lwa Balamu ku ligangalyo. Pelepo Balamu ŵatanditesoni kumputa bulujo.

26 Sambano lilayika lya Yehofalyo lyajile kwimasoni pamalo gane gakanganika mnope, gangakomboleka kusepuchila kumlyo kapena kumchiji. 27 Bulujo pajwaliwenisoni lilayika lya Yehofalyo jwagambile kugona pasi Balamu ali pamgongo wakwe. Myoyo Balamu ŵatumbile mnope mwamti ŵapitilisye kumputa bulujo ni ndodo jakwe. 28 Pambesi pakwe, Yehofa ŵatendekasisye bulujo kuti juŵechete* mwamti jwamwusisye Balamu kuti, “Ana namleŵele chichi kuti mumbute katatu kosopeka?” 29 Balamu ŵamjanjile bulujo kuti, “Namputile ligongo lyakuti mundoŵesye une, soni yikaŵe kuti njigele upanga mmyala mwangumu, ngagambile kumwulaga mmwejo.” 30 Pelepo bulujo jwamwusisyesoni Balamu kuti, “Ana unejo ngaŵa bulu jwenu julajula jwamŵele mli mkukwela kwa umi wenu wosope mpaka lelo? Ana pakwete panamtendele yindu mpela yeleyi chitandilile?” Jwalakwe ŵajanjile kuti, “Iyayi.” 31 Pambesi pakwe Yehofa ŵamwugwile meso Balamu kuti aliwone lilayika lya Yehofalyo lyalyajimi pamsewu lili lijigele upanga mmyala mwakwe. Paŵagambile kuliwona lilayikalyo jwalakwe ŵatindiŵele ni kwinama mpaka ngope jakwe pasi.

32 Kaneko lilayika lya Yehofalyo lyamsalile jwalakwejo kuti, “Ligongo chichi mumputile bulu jwenujo katatu kosopeka? Mpikane, unejo ni jwanamwugalilaga mmwejo litala ligongo ulendo wenuwu uli wakusisyana ni chakulinga changu. 33 Pa maulendo gatatu gosopega bulu jwenujo juŵele juli mkumbona mwamti julinjileje kuŵambala. Yikaŵe kuti bulu jwenujo nganijuŵambalaga une pakwika apano ngaliji ndili namwuleje kala mmwejo, nambo bulu jwenujo ngamlesile jwaumi.” 34 Pelepo Balamu ŵalisalile lilayika lya Yehofalyo kuti, “Ndemwisye, nganimanyililaga kuti wawojo ni ŵajimiji pamsewu kuti asimane ni une. Sambano naga wawojo ngakusangalala ni ulendowu mpaka mbujile panopano.” 35 Nambo lilayika lya Yehofalyo lyamsalile Balamu kuti, “Mpitilisye ulendo wenu ni achalumeŵa, nambo pachimkayiche kweleko mkaŵecheteje maloŵe agopego gachingamsalileje.” Myoyo Balamu ŵapitilisye ulendowo pampepe ni achakulungwakulungwa ŵaŵatumidwe ni Balaki ŵala.

36 Balaki paŵapikene kuti Balamu ayiche m’chilambo chakwecho, ndaŵi jijojo ŵapite kukusimana najo mumsinda wine wa ku Mowabuko wawaliji mumbali mwa chitiŵi cha Alinoni, kumalile ga chilambocho. 37 Balaki paŵasimene ni Balamu ŵamwusisye kuti, “Ngati une natumisye achalume kwa mmwejo? Sambano ligongo chichi nganimyika akuno pampepe ni jemanjajo? Ana mwapelaga kuti nganimba ngombwele kumwupa ni yindu yejinji?” 38 Pelepo Balamu ŵamjanjile Balaki kuti, “Basi akadandawula, sambano mbiche. Nambotu nganingola ufulu wakuŵecheta yamunganisyo mwangu. Yachimbecheteje chiŵe yelepeyo yasalile Mlungu kuti mbechete.”

39 Myoyo Balamu ŵanyakwiche pampepe ni Balaki ni ŵayiche ku Kiliyati-husoti. 40 Balaki ŵawuleje ng’ombe soni ngondolo ni kupeleka mbopesi, soni nyama jine ŵamtumichisye Balamu soni achakulungwakulungwa ŵaŵaliji nawo ŵala. 41 Kundaŵi kwakwe Balaki ŵamjigele Balamu ni kwawula najo pamalo ganegakwe gakwela lina lyakwe Bamoti-baala. Kutyochela pamalo gelega jwalakwe ŵakombwele kwawona Ayisalayeli wosope.