Numeli
23 Kaneko Balamu ŵamsalile Balaki kuti, “Mtaŵe malo gakupelechela mbopesi gakwana 7 malo agano, soni mulinganyile ng’ombe syamkambako syakwana 7 nambosoni ngondolo syamkambako syakwana 7.” 2 Ndaŵi jijojo Balaki ŵatesile yaŵamsalile Balamuyo. Myoyo Balaki ni Balamu ŵapeleche mbopesi ng’ombe jamkambako jimo soni ngondolo jamkambako jimo pamalo galigose gakupelechela mbopesigo. 3 Kaneko Balamu ŵamsalile Balaki kuti, “Wawojo atame panopano pasili mbopesi syawo syakutinisyasi, unejo ngwika kaje. Mwinemwakwe Yehofa chakawonechele kwa une. Yiliyose yachakasalileyo chimbiche kukwasalilasoni wawojo.” Pelepo jwalakwe ŵapite pakatumbi kane kangali yakumela.
4 Kweleko Mlungu ŵawonechele kwa Balamu. Kaneko jwalakwe ŵamsalile Mlungujo kuti, “Ndaŵile malo gakupelechela mbopesi gakwana 7 mwakugandandalika, mwamti mbeleche kala mbopesi ja ng’ombe jamkambako nambosoni mbopesi ja ngondolo jamkambako pamalo galigose gakupelechela mbopesigo.” 5 Yehofa ŵamsalile Balamu maloŵe gakuti akaŵechete. Kaneko ŵatite, “Mwujile kwa Balaki, mkamsalile jwalakwejo maloŵe ganamsalile gala.” 6 Myoyo jwalakwe ŵawujile ni kumsimana Balaki ali ajimi chiŵandika mbopesi syakwe syakutinisya sila pampepe ni achakulungwakulungwa wosope ŵa ku Mowabu. 7 Kaneko jwalakwe ŵaŵechete maloŵe aga mpela ndakatulo:
“Balaki mwenye ŵa ku Mowabu anjigele une kutyochela ku Alamu,
Anjigele une kumatumbi gakungopokolyuŵa ni kusalila kuti,
‘Myiche kuti mungamuchisye, mumtembelele Yakobo.
Myiche nditu, mumsosele yakusakala Isalayeli.’
8 Ana mpaka yikomboleche uli kuti unejo natembelele ŵandu ŵele Mlungu nganiŵatembelela?
Soni ana mpaka yikomboleche chamtuli kuti unejo nasosele yakusakala ŵandu ŵele Yehofa nganiŵasosela yakusakala?
9 Kutyochela penani pa maganga naweni jemanjajo,
Nditu kutyochela penani pa matumbi naweni jemanjajo.
Jemanjajo akutama jikajikape kweleko.
Jemanjajo alilekangenye ni ŵandu ŵamitundu jine.
10 Ana ŵani ŵampaka aŵalanje yisukulu ya Yakobo yayili yejinji mpela mchenga?
Kapena ana ŵani ŵampaka aŵalanje ŵandu ŵali mbali jimo ja matenti ga Ayisalayeli?
Angunde kuti mbwe chiwa cha ŵandu ŵakulungama,
Soni akunde kuti mbesi ja umi wangu jiŵe mpela ja jemanjajo.”
11 Pelepo Balaki ŵaŵechete kwa Balamu kuti, “Ana yamtesileyi ni yichichi? Ngati une namŵilasile kuti mwatembelele adani ŵanguŵa, nambo mmwejo mmalo mwakuti mtende yeleyi mkwapa upile jemanjaji.” 12 Nambo jwalakwe ŵajanjile kuti, “Ana une nganinasalila kuti chimbechete maloŵe agopego gachasalile Yehofa?”
13 Pelepo Balaki ŵatite, “Chonde, kwende tujawule pamalo ganesoni pampaka mkombole kwawona chenene jemanjaji. Pelepa ngaŵa kuti chimwawone ŵandu wosope nambo chimgambe kulola mbali jimo ja jemanjaji. Ngusaka kuti mungamuchisye, mkatembelele jemanjajo kweleko.” 14 Myoyo Balaki ŵamjigalile jwalakwejo ku Sofimu penani pa litumbi pamalo gakolanjidwa kuti Pisiga. Paŵayiche kweleko ŵataŵile malo gakupelechela mbopesi gakwana 7 ni kupeleka mbopesi ja ng’ombe jamkambako soni mbopesi ja ngondolo jamkambako pamalo galigose gakupelechela mbopesigo. 15 Kaneko Balamu ŵamsalile Balaki kuti, “Wawojo atame panopano pasili mbopesi syawo syakutinisyasi. Unejo ngwawula kaje apo, mwine Mlungu chakawonechele kwa une pelepo.” 16 Ali kweleko, Yehofa ŵawonechele kwa Balamu ni ŵamsalile maloŵe gakuti akaŵechete. Kaneko ŵatite, “Mwujile kwa Balaki, mkamsalile jwalakwejo maloŵe ganamsalile gala.” 17 Myoyo jwalakwe ŵawujile ni kumsimana Balaki ali pambali pa mbopesi syakwe syakutinisya sila, ali kumjembecheya jwalakwejo. Nambosoni achakulungwakulungwa ŵa ku Mowabu ŵala ŵaliji papopo. Pelepo Balaki ŵamwusisye jwalakwejo kuti, “Ana Yehofa amsalile yamtuli?” 18 Kaneko jwalakwe ŵaŵechete maloŵe aga mpela ndakatulo:
“Mjimuche mmwe Balaki kuti mpikane ayi.
Mpikane yangusaka kuŵecheta, mmwe mwanache jwa Sipoli.
19 Mlungutu nganaŵa mpela mundu kuti aŵecheteje yaunami,
Soni nganaŵa mpela mundu jwakusachenga nganisyo syakwe.
Paŵechete yineyakwe, ana jwalakwejo ngasayitenda?
Pasasile kuti chatende yineyakwe, ana ngasayikwanilisya?
20 Mlole, unetu yiche akuno kuti nape upile jemanjaji.
Mlungu ŵapele kala upile, soni une nganimba ngombwele kuyichenga yeleyo.
21 Mlungu ngakusakunda yiliyose yamasenga kuti yimgwile Yakobo,
Soni ngakusakunda kuti Isalayeli asimane ni yakusawusya yine yiliyose.
Yehofa Mlungu jwakwe ali ni ŵandu ŵelewo,
Soni maloŵe gagumila gakumkwesya jwalakwe mpela mwenye jwawo gakusapikanika pasikati pawo.
22 Mlungu ni juŵakopwesye jemanjajo m’chilambo cha Iguputo.
Kwa jemanjajo jwalakwe ali misengo ja njati jelume.
23 Pangali jwamasenga jwalijose jwampaka amloje Yakobo,
Soni pangali chisango chine chilichose champaka chikamule pa Isalayeli.
Pandaŵi ajino ŵandu pakwamba ya Yakobo soni Isalayeli mpaka aŵechete kuti:
‘Mlole yindu yekulungwa yaŵatendele Mlungu jemanjaji.’
24 Ŵandu ŵeleŵa chachijimuka mpela lisimba,
Soni mwakulandana ni lisimba jemanjaji chachijima.
Jemanjaji chachiŵa mpela lisimba lyangagona pasi mpaka lili lilile nyama jajikamwile,
Soni mpaka lili limwele myasi ja nyama syaliwuleje.”
25 Pelepo Balaki ŵamsalile Balamu kuti, “Naga ngamkombola kwatembelela jemanjaji kuli chenene kuti mkapasoni upile.” 26 Nambo Balamu ŵamjanjile Balaki kuti, “Ana nganinasalila wawojo kuti chimbechete maloŵe gagogo pego gachasalile Yehofa?”
27 Nambo Balaki ŵamsalile Balamu kuti, “Angunde chonde kuti najigalile pamalo ganesoni. Mwinemwakwe kweleko Mlungu jwakuwona chakakunde wawojo kuti akangamuchisye kwatembelela ŵandu ŵeleŵa.” 28 Myoyo Balaki ŵamjigalile Balamu penani pa litumbi, pamalo gakolanjidwa kuti Peoli gagali mwakulolegana ni ku Yesimoni.* 29 Kaneko Balamu ŵamsalile Balaki kuti, “Mtaŵe malo gakupelechela mbopesi apano gakwana 7, soni mulinganyile ng’ombe syamkambako 7 nambosoni ngondolo syamkambako 7.” 30 Myoyo Balaki ŵatesile yaŵamsalile Balamuyo, mwamti jwalakwe ŵapeleche mbopesi ja ng’ombe jamkambako jimo soni mbopesi ja ngondolo jamkambako jimo pamalo galigose gakupelechela mbopesigo.