Numeli
24 Balamu paŵayiweni kuti Yehofa akusaka kwapa upile Ayisalayeli, jwalakwe nganajawulasoni kukusosasosa matala gakwatembelelela jemanjajo. Mmalomwakwe jwalakwe, ŵagambile kugalawuka ni kulola ku chipululu. 2 Balamu paŵaponyisye meso gakwe kweleko, ŵaweni Ayisalayeli ali akunjile matenti gawo mwakamulana ni mbumba* syawo. Kaneko msimu wa Mlungu wayiche pa jwalakwejo. 3 Kaneko jwalakwe ŵaŵechete maloŵe aga mpela ndakatulo:
“Ayi ni yakuŵecheta ya Balamu mwanache jwa Beoli,
Elo, yakuŵecheta ya mundu jwele meso gakwe galiji mkulola,
4 Yakuŵecheta ya mundu jwapikene maloŵe gakutyochela kwa Mlungu,
Mundu jwele ŵagaweni mesomkulola ga Jwamachiligosope,
Jwelesoni meso gakwe galiji chiŵela mkulola paŵaliji mkutindiŵala ni kwinama mpaka ngope jakwe pasi.
5 Matenti genu Yakobo gali gakusalala,
Elo, malo genu gamkutama mmwe Isalayeli gali gakusalala.
6 Gagumbalene malo gekulungwa mnope mpela malambo,
Mpela migunda jajili mungulugulu lusulo,
Mpela yitela ya aloye* yapandile Yehofa,
Soni mpela yitela ya mikungusa yayili mumbali mwa mesi.
7 Mesi gakwasichila kutyochela mu yakutechela mesi yakwe yiŵili yalipende,
Soni mbeju jakwe ajipandile mumbali mwa mesi gejinji.
Mwenye jwakwe chachiŵa jwamachili mnope kumpunda Agagi,
Nombe umwenye wakwe uchiŵa wakuchimbichika mnope.
8 Mlungu ni juŵakopwesye jemanjaji m’chilambo cha Iguputo.
Kwa jemanjaji, jwalakwe ali mpela misengo ja njati jelume.
Jwalakwe chachajonanga ŵandu ŵamitundu jine, ŵakusamlagasya,
Jwalakwe chachitawuna mawupa gawo, soni ni mipamba jakwe chachajonanga jemanjajo.
9 Jwalakwe agonile, agonile pasi mpela lisimba,
Soni mwakulandana ni lisimba, ana ŵani ŵampaka alinje kumjimusya jwalakwejo?
Ŵandu ŵakumpa upile mmwejo akusaŵasoni ŵana upile,
Soni ŵandu ŵakumtembelela mmwejo akusaŵasoni ŵakutembeleledwa.”
10 Pelepo Balaki ŵamtumbilile mnope Balamu. Pakulosya kutumbila, Balaki ŵakwatile mmyala ni kumsalila Balamujo kuti, “Une namŵilasile kuti mwatembelele adani ŵanguŵa, nambo mmalo mwakutenda yeleyi mmwejo, katatu kosope keneka, mwapele upile jemanjajo. 11 Sambano mmwejo mnyakuche panopano mjawuleje kumangwenu. Une ndeje namwupe mmwejo ni yindu yejinji, nambo mlole, Yehofa jwenujo amjasikasisye upile wakumwupa.”
12 Pelepo Balamu ŵamjanjile Balaki kuti, “Une nasalile ŵandu ŵamwatumile ŵala kuti, 13 ‘Atamose Balaki ali ambele nyumba jakwe jili jegumbale ni silifa soni golide, nambo une nganimba ndesile chindu chine chilichose mwakusaka kwangu chakutindana ni yalamwile Yehofa, chinga yalamwileyo yili yambone kapena yachabe. Yachimbecheteje chiŵe yelepeyo yasalile Yehofa kuti mbechete.’ 14 Une basi nguwujila kwa achalongo achimjangu. Nambo mkaninjawule ngusaka namsalile yachachitenda ŵandu ŵeleŵa kwa ŵandu ŵenu.” 15 Pelepo jwalakwe ŵaŵechete maloŵe aga mpela ndakatulo:
“Ayi ni yakuŵecheta Balamu mwanache jwa Beoli,
Soni yakuŵecheta ya mundu jwele meso galiji mkulola,
16 Yakuŵecheta ya mundu jwapikene maloŵe gakutyochela kwa Mlungu.
Soni mundu jwakumanyilila lunda lwakwete Mlungu Jwakwinani Mnopejo,
Mundu jwele ŵagaweni mesomkulola ga Jwamachiligosope,
Jwelesoni meso gakwe galiji chiŵela mkulola paŵaliji mkutindiŵala ni kwinama mpaka ngope jakwe pasi.
17 Chinjimwona jwalakwejo, nambo ngaŵa lelo.
Chinjimwona nditu, nambo ngaŵa sampano.
Ndondwa jichikopoka kutyochela mwa Yakobo,
Soni ndodo ja umwenye jichikopoka kutyochela mwa Isalayeli.
Jwalakwejo chachikasanya nditu usyo ja Mowabu
Nambosoni chachikasanya mawupa ga mumtwe ga ŵandu wosope ŵachiwawa.
18 Jwalakwe chachijigala chilambo cha Edomu kuti chiŵe chipanje chakwe,
Nditu, mdani jwa Seili chachijigala Seili kuti chiŵe chipanje chakwe.
Isalayeli chachilosya kulimba mtima kwakwe.
19 Soni mundu jwine jwakutyochela mwa Yakobo chachagomeka adani ŵakwe.
Jwalakwejo chachimjonanga mundu jwalijose juchachikulupuka mumsinda.”
20 Balamu paŵaweni Aamaleki, jwalakwe ŵapitilisye ndakatuloji ni maloŵe aga:
“Pa mitundu josope, mtundu wa Aamaleki ni wawaliji wandanda,*
Nambo pambesi pakwe uchimala.”
21 Paŵawenisoni Akeni jwalakwe ŵapitilisye ndakatuloji ni maloŵe aga:
“Malo genu gakutama gali gakuteteyeka mpela chisusi chetaŵe palwala.
22 Nambo mundu jwine chachiwujocha mtundu wa Akeni.
Ana mkuganisya kuti chipajigale ndaŵi jelewu ŵandu ŵa ku Asiliya mkanayiche kukumjigala mmwejo kuti mkaŵe kapolo?”
23 Jwalakwe ŵapitilisye ndakatuloji ni maloŵe gakuti:
“Ngondone, pangali mundu juchachikulupuka Mlungu pachachitendaga yeleyi.
24 Sitima sichiyika kutyochela mumbali mwa Nyasa ku Kitimu.
Jemanjajo chachalagasya ŵandu ŵa ku Asiliya,
Soni chachalagasya ŵandu ŵa ku Ebele.
Nambo jwalakwe chachijonasikasoni pambesi pakwe.”
25 Kaneko Balamu ŵanyakwiche ni kuwutanda ulendo wakuwujila kumangwakwe. Nombenajosoni Balaki ŵawujile kumangwakwe.