Detulonomo
3 “Panyuma pakwe twagalawiche ni kujigala msewu wakwawula ku Basana. Kaneko Ogi mwenye jwa ku Basanako ŵakopweche mumsinda wakwe pampepe ni ŵandu ŵakwe wosope kuti akamenyane ngondo ni m’weji ku Edileyi. 2 Nambo Yehofa ŵasalile une kuti, ‘Mkasimumjogopa jwalakwejo, pakuŵa une chinampeleche jwalakwejo soni ŵandu ŵakwe wosope pampepe ni chilambo chakwe mmyala mwenu. Yamwamtesile Sihoni mwenye jwa Aamoli juŵatamaga ku Hesiboni ni yachimumtendesoni jwalakwejo.’ 3 Myoyo Yehofa Mlungu jwetu ŵampelechesoni mmyala mwetu mwenye Ogi jwa ku Basana pampepe ni ŵandu ŵakwe wosope. Twapitilisye kwagomeka jemanjajo mpaka nganipasimanikwa mundu jwalijose jwakulupuka. 4 Twasumwilesoni misinda jawo josope, pangali msinda atamose umo wawasigele. Twasumwile misinda josope 60 ja mudela ja Aligobu, jiŵalamulilaga mwenye Ogi ku Basana. 5 Misinda josopeji jaliji jakulimbangana ligongo jakwete ndenje syelewulewu, mageti nambosoni yisyano yakuwugalila magetigo. Twasumwilesoni tumisinda twine twamwanamwana twejinji. 6 Nambope misinda josope jeneji twajijonasile pampepe ni ŵandu ŵakwe. Twatesile yeleyi mwakulandana ni yatwatesile pakonanga misinda josope ja mwenye Sihoni juŵatamaga ku Hesiboni pampepe ni achalume, achakongwe soni ŵanache ŵaŵatamaga mwelemo. 7 Pambesi pakwe, twajigele yilango yosope soni yindu yine yatwayipatile kumisinda jeleji.
8 “Pandaŵi jelejo, twasumwile yilambo ya mamwenye gaŵili ga Aamoli yayili mudela ja ku Yolodani, kutandila ku Chitiŵi* cha Alinoni mpaka kuja kwika ku Litumbi lya Helimoni. 9 Litumbi lyeleli Asidoni ŵalikolangaga ni lina lyakuti Siliyoni soni Aamoli ŵalikolangaga ni lina lyakuti Senili. 10 Twasumwile misinda josope ja kumalo gakwela, dela josope ja Giliyadi soni dela josope ja Basana mpaka kuja kwika ku msinda wa Saleka soni wa Edileyi, jajaliji misinda jaŵalamulilaga mwenye Ogi jwa ku Basana. 11 Mwenye Ogi jwa ku Basana, jwaliji mundu jwakumalisya jwa mtundu wa Alefaimu. Jwalakwe paŵawile, ŵamgoneche pa chindu* chepanganye ni chisyano,* mwamti chindu chelecho chipalipe ku Laba wawuli msinda wa Aamoni. Chinducho m’chilewu mwakwe chili makono* 9 soni m’chijipi chili makono mcheche pakujigalila kalinje kaŵamanyililaga ŵandu ŵajinji. 12 Malo gatwajigele kuti gaŵe chipanje chetu gatandile ku Aloeli mumbali mwa Chitiŵi* cha Alinoni soni gakupwatika mbali jimo ja dela jamatumbi ja Giliyadi. Mbeleche misinda ja mudela jeleji kwa mbumba* ja Lubeni soni mbumba ja Gadi. 13 Mbali jine jakusigala ja dela ja Giliyadi nambosoni dela josope ja Basana ja mwenye Ogi, mbeleche kwa hafu ja mbumba ja Manase. Dela josope ja Aligobu, jajili Basana josope, jamanyikaga kuti chilambo cha Alefaimu.
14 “Chisukulu cha Manase lina lyakwe Yayili chajigele dela josope ja Aligobu mpaka kuja kwika ku malile kwa chilambo cha Agesuli soni Amaakati. Misi josope jaŵajigele ja kumbali ja Basana jeleji, ŵajipele lina pakujigalila lina lyakwe, mwamti ŵatandite kujikolanga kuti Hafoti-yayili.* Misi jeleji jikumanyika ni lina lyeleli mpaka lelo. 15 Chilambo cha Giliyadi nachipeleche kwa Makili. 16 Mbali jakusigala ja chilambo cha Giliyadi mpaka kuja kwika ku Chitiŵi* cha Alinoni najipeleche kwa mbumba ja Lubeni soni mbumba ja Gadi. Malile gakwe gali pakatikati pa chitiŵicho. Mbali ja malo gawoga jayiche mpaka ku Chitiŵi cha Yaboki chachitesile malile ni chilambo cha Aamoni. 17 Malo gawoga gakwika mpaka ku Alaba ku Yolodani pampepe ni mumbali mwakwe, kutandila ku Nyasa ja Kineleti mpaka kwika ku Nyasa ja Alaba jajili Nyasa ja Njete.* Nyasa jeleji jili kwiŵanda kwa malo gakuseleleka ga Pisiga chakungopokolyuŵa kwakwe.
18 “Kaneko une nalamwile jemanjajo kuti, ‘Yehofa Mlungu jwenu ampele chilambo chelechi kuti mchijigale kuŵa chipanje chenu. Nambo achalume wosope ŵamachili ajomboche Yolodani ali ajigele yida yawo ya ngondo ni kuŵa pasogolo pa achalongo achimjawo ŵali Ayisalayeli kuti akakamuchisye. 19 Ŵachasigale akuno ni kutamaga m’misinda janampele jemanja aŵe achiŵamkwenu, ŵanache ŵenu soni yilango yenu. Pakuŵa ngumanyilila kuti mkwete yilango yejinji. 20 Mkakamuchisye achalongo achimjenuwo mpaka Yehofa ali ŵapele jemanjajo malo gakupumulila mpela mwatendele ni jemanja, soni mpaka ali ajigele chilambo chele Yehofa Mlungu jwenu chakape jemanjajo mpela chipanje chawo ku lisi line lya Yolodani. Panyuma pa yeleyi, jemanja mkawujile, jwalijose kumalo gakwe ganampele kuti gaŵe chipanje chakwe.’
21 “Pandaŵi jelejo une namlamwile Yoswa kuti, ‘Mmwejo mwasyene myiweni ni meso genu yatesile Yehofa Mlungu jwenu kwa mamwenye gaŵiliga. Yehofa chatendesoni yakulandana ni yeleyi kwa mamwenye gosope gachimkagasimane ku lisi line lya Yolodani. 22 Mkaja kwajogopa jemanjajo ligongo Yehofa Mlungu jwenu ni jwakumputila ngondo jemanja.’
23 “Pandaŵi jelejo namchondelele Yehofa kuti, 24 ‘Wawo Yehofa, Ambuje Ŵakulungwa Mnope, wawojo atandite kala kumlosya jwakutumichila jwawo ukulu wawo soni kuti mkono wawo wuli wamachili. Ana panasoni Mlungu jwine julijose, chinga kwinani kapena pachilambo chapasi jwakusatenda yindu yakulosya machili mpela yakusatenda wawojo? 25 Chonde angunde une kuti njomboche nawo Yolodaniju kuti ngachiwone chilambo chambonecho, chachili dela jambone jamatumbi soni chilambo cha Lebanoni.’ 26 Nambope Yehofa nganambikanila pangani jeleji, mwamti ŵapitilisyepe kundumbilila ligongo lya jemanja. Mmalomwakwe Yehofa ŵasalile une kuti, ‘Mumbesisye ni ngani jeleji. Ngangusaka kumpikanasoni mli mkujiŵecheta kwa une. 27 Mkwele pa litumbi lya Pisiga ni mkachilole chilambocho mbali jakungapililolyuŵa, kumpoto, kummwela soni kungopokolyuŵa, ligongo mmwejo ngamjomboka nawo Yolodaniju. 28 Mumjigale Yoswa ni kumŵika kuti aŵe jwakulongolela, soni mumlimbikasye jwalakwejo kuti aŵe jwakulimba mtima soni jwamachili ligongo jwalakwe ni juchaŵe pasogolo pa ŵanduŵa kwalongolela komboka Yolodaniju, soni jwalakwe ni jwachiŵakamuchisye jemanjajo kuti akajigale chilambo chachimchiwone mmwejocho.’ 29 Yindu yosope yeneyi yatendekwe tuli mkutama mu chitiŵi chachili mwakulolegana ni ku Beti-peoli.