Genesesi

24 Sambano Abulahamu ŵaliji ali akalambele soni ŵakwete yaka yejinji. Nambosoni Yehofa ŵaliji ali ampele upile pa chilichose. 2 Myoyo Abulahamu ŵamŵilasile jwamasengo jwakwe jwaŵaliji jwamkulungwa pa ŵandu wosope ŵa m’nyumba jakwe. Jwamasengo jweleju ni juŵalolelaga yindu yakwe yosope. Abulahamu ŵamsalile jwamasengojo kuti, “Mŵiche mkono wenu pasi pa chiga changu. 3 Ngusaka kuti mmwejo mlumbile pameso pa Yehofa Mlungu jwa kwinani soni Mlungu jwa chilambo chapasi. Mlumbile kuti ngasimjigala jwamkongwe kutyochela pasikati pa ŵanache ŵa Akanani ŵakutama pasikati pawo kuti alombane ni mwanache jwangu. 4 Nambo mkusosekwa mjawule ku chilambo chakumangwetu soni kwa achalongo achimjangu kuti mkamjigalile jwamkongwe mwanache jwangu, Isaki.”

5 Pelepo jwamasengojo jwamwusisye Abulahamu kuti, “Nambi wuli naga jwamkongwejo akakaneje kwika ni une akuno? Ana nikuti chinjisosekwa kumjigala mwanache jwawojo ni kwawula najo ku chilambo chaŵatyochele wawojo?” 6 Pelepo Abulahamu ŵamjanjile jwamasengojo kuti, “Chonde, mkasimumjigalila mwanache jwangu kweleko. 7 Yehofa Mlungu jwa kwinani ni juŵandyosisye une m’nyumba ja baba ŵangu soni ku chilambo cha achalongo achimjangu. Mlungu jweleju jwaŵechete ni une soni ŵalumbilile une kuti, ‘Chinjipeleka chilambo chelechi kwa ŵanache* ŵenu.’ Myoyo jwalakwe chachitumisya lilayika kuti limlongolele. Mwamti mmwejo chimchijigala nditu jwamkongwe kutyochela kweleko kuti alombane ni mwanache jwangu. 8 Nambo naga jwamkongwejo ngasasaka kwika akuno pampepe ni mmwejo, nikuti mmwejo chimchiŵa ŵagopoka pa kulumbililana kweleku. Nambo mkasimumjigalila mwanache jwangu kweleko.” 9 Pelepo jwamasengojo ŵaŵisile mkono wakwe pasi pa chiga cha Abulahamu ambuje ŵakwe, mwamti ŵalumbililene pakwamba ya ngani jeleji.

10 Myoyo jwamasengo jula ŵajigele ngamila syakwana 10 sya ambuje ŵakwe, ni kuwutanda ulendo. Paulendowu ŵajigelesoni yindu yambone yejinji kutyochela kwa ambuje ŵakwewo. Jwalakwe ŵawutandite ulendo wakwawula ku msinda wa Naholi wawuli ku Mesopotamiya. 11 Paŵayiche kweleko jwalakwe ŵasigoneche ngamila sila pachisima chinechakwe chachaliji kusa kwa msinda. Jwalakwe ŵayiche pachisimachi chakumagulo, ndaŵi jele achakongwe ŵanonyelaga kwika kukuteka mesi. 12 Kaneko jwalakwe ŵaŵechete kuti, “Yehofa, Mlungu jwa ambuje ŵangu Abulahamu. Chonde, atende yakuti une yinjendele chenene lelo, soni ŵalosye chinonyelo changamala ambuje ŵangu Abulahamu. 13 Apatu njimi pachisima cha mesi, soni ŵanache ŵachakongwe ŵa mumsindamu akwika kukuteka mesi. 14 Myoyo jwamkongwe jwachinamsalile kuti, ‘Mtule lulo lwenu lwa mesilo pasi kuti mwe nawo,’ soni jwele juchajanje kuti, ‘Aga mesi amwe, soni chinasipesoni ngamila syawosi kuti simwe,’ nguŵenda kuti jwelejo aŵe jwamkongwe jwele wawojo amsagulile jwakutumichila jwawo Isaki. Pachatende yeleyi, chimanyilile kuti wawojo ŵalosisye chinonyelo changamala ambuje ŵangu.”

15 Jwamasengoju mkanamalisye kuŵecheta, Labeka ŵakopochele ali anyakwile lulo lwa mesi pekoyo pakwe. Labekaju ŵaliji mwanache jwa Betuwelo. Mama ŵawo Betuwelo ŵaliji Milika ŵamkwawo ŵa Naholi juŵaliji mlongomjakwe Abulahamu. 16 Sambano jwamkongwejo jwaliji jwakusalala mnope soni jwaliji mwali, jwakuti nganagonejepo ni jwamlume jwalijose. Jwalakwe ŵajinjile pachisima pala ni ŵatechele mesi mu lulo lwakwe, kaneko ŵakopweche. 17 Ndaŵi jijojo jwamasengo jula ŵamwutuchile jwamkongwejo ni kumsalila kuti, “Chonde, mungayile mesi gagali mu lulo lwenulo kuti mwe panandi.” 18 Pelepo jwamkongwejo ŵajanjile kuti, “Aga, amwe ambuje ŵangu.” Myoyo jwalakwe ŵatusile lulo lula pekoyo ni kulukamulila mmyala. Kaneko ŵampungulile mesi jwamasengo jula kuti amwe. 19 Paŵamalisisye kumpa mesi jwamasengo jula, jwamkongwejo ŵatite, “Chinasitechelesoni mesi ngamila syawosi mpaka sili simwele mwakwanila.” 20 Myoyo jwalakwe mwachitemachitema ŵakusulile mesi gagaliji mu lulo mula mu chakumwela yinyama. Kaneko jwalakwe ŵawutuchilaga mwakuwilisyawilisya pachisima pala kukuteka mesi. Mwamti ŵatechile mesi gakwanila kumwa ngamila syosope sila. 21 Pandaŵi josopejo, jwamasengo jula ŵagambile kutama soni ŵagambaga kumlolechesya jwamkongwejo mwakusimonga kuti amanyilile naga Yehofa awupele upile ulendo wakwewo kapena iyayi.

22 Ngamilasyo pasyamalisisye kumwa, jwamasengo jula ŵajigele ndolo* jagolide jakuwala pambula, jakusitopa hafu ja sekeli* ni yibangili yiŵili yagolide yakusitopa masekeli* 10 ni kumpa jwamkongwejo. 23 Jwalakwe ŵamwusisye jwamkongwejo kuti, “Chonde musalile, ana mmwejo mli mwanache jwacheni? Ana m’nyumba ja baba ŵenu mwana malo gampaka m’weji tukagone chilochi?” 24 Pelepo jwamkongwejo ŵajanjile kuti, “Unetu ndili mwanache jwa Betuwelo. Baba ŵanguwo mama ŵawo ali Milika soni baba ŵawo ali Naholi.” 25 Jwalakwe ŵaŵechetesoni kuti, “Tukwete manyasi soni yakulya yejinji ya yinyamayi. Nambosoni tukwete malo gakuti jemanja mkagone chilochi.” 26 Paŵapikene yeleyi, jwamasengo jula jwatindiŵele pameso pa Yehofa ni ŵaligwisisye mpaka ngope jakwe pasi. 27 Kaneko jwalakwe ŵaŵechete kuti, “Achimbichikwe Yehofa, Mlungu jwa ambuje ŵangu Abulahamu. Pakuŵa jwalakwe nganaleka kwalosya ambuje ŵangu chinonyelo chakwe changamala soni kulupichika kwakwe. Yehofa alongolele une ku nyumba ja achalongo achimjawo ŵa ambuje ŵangu.”

28 Pelepo jwamkongwejo ŵawutwiche ni kuja kwasalila wosope ŵakutama pa nyumba ja mamagwe ya ngani jeleji. 29 Sambano Labeka ŵakwete mchimwenegwe lina lyakwe Labani. Myoyo Labani ŵamwutuchile mundu jula juŵaliji kusa kwa msinda pachisima pala. 30 Labani paŵajiweni ndolo jila soni paŵayiweni yibangili m’makono mwa mchemwali jwakwe jula nambosoni paŵapikene maloŵe ga mchemwali jwakwejo gakuti, “Ayi ni yasalile mundujo,” ndaŵi jijojo jwalakwe ŵapite kukusimana ni mundu jula jwele ŵaliji ali ajimi yimpepe ni ngamila sila pachisima pala. 31 Paŵamsimene, Labani ŵamsalile mundu jula kuti, “Kwende tulongane kunyumba. Wawo ali mundu jwele Yehofa ampele upile. Ligongo chichi agambile kwima akuno? Unetu linganyisye kala nyumba jakuti akayichile soni malo ga ngamilasi.” 32 Pelepo mundu jula ŵapite kuja kwinjila m’nyumbamo. Mwamti jwalakwe* ŵasigopwele ngamila sila ni kusipa manyasi soni yakulya yine. Nambosoni ŵampele mesi mundu jula kuti ajojesye sajo syakwe soni sajo sya achalume ŵaŵaliji nawo. 33 Nambo mundujo paŵampele yakulya kuti alye jwaŵechete kuti, “Unetu ngandya chitema mpaka ndili mbechete yambichile akuno.” Pelepo Labani ŵatite, “Aŵechetetu!”

34 Myoyo jwalakwe ŵatandite kuŵecheta kuti, “Une ndili jwamasengo jwa Abulahamu. 35 Yehofa ŵapele upile wekulungwa ambuje ŵangu. Mwamti ŵatendekasisye kuŵa ŵakusichila mnope, mwakwapa ngondolo, ng’ombe, silifa soni golide, ŵamasengo ŵachalume ni ŵachakongwe, soni ngamila ni abulu ŵajinji. 36 Konjechesya pelepo, Sala ŵali ŵamkwawo ambuje ŵangu, ŵaŵelechele ambuje ŵanguwo mwanache jwamlume, ŵalakwewo ali akalambele. Mwamti ambuje ŵanguwo chachimpa mwanachejo yosope yakwete. 37 Myoyo ambuje ŵanguwo ŵandendekasisye une kulumbila kuti, ‘Mkasimjigala jwamkongwe kutyochela pasikati pa ŵanache ŵa Akanani ŵangutama pasikati pawo kuti alombane ni mwanache jwangu. 38 Nambo mkusosekwa mjawule ku nyumba ja baba ŵangu soni kwa achalongo achimjangu kuti mkamjigalile jwamkongwe mwanache jwangu.’ 39 Nambo une nawusisye ambuje ŵanguwo kuti, ‘Nambi wuli naga jwamkongwejo akakaneje kwika ni une akuno?’ 40 Pelepo ambuje ŵanguwo ŵanjanjile kuti, ‘Yehofa jwele jwambele ndili mkwenda pameso pakwe, chachitumisya lilayika lyakwe kuti limlongolele, soni chachilolechesya nditu kuti awupele upile ulendo wenu. Mkusosekwa mkamjigalile jwamkongwe mwanache jwangu ku nyumba ja baba ŵangu soni kwa achalongo achimjangu. 41 Naga mmwejo mkwawula kwa achalongo achimjangu, ni yikusimanikwa kuti jemanjajo akumkanya kumjigala jwamkongwe, nikuti mmwejo chimchiŵa jwagopoka pa kulumbililana kweleku. Yeleyo ni yayichimtendekasya kuti mmwejo mŵe ŵagopoka.’

42 “Panayiche pachisima lelo, naŵechete kuti, ‘Yehofa, Mlungu jwa ambuje ŵangu Abulahamu, chonde atende yakuti yinjendele chenene paulendo wanguwu. 43 Apatu njimi pachisima chamesi. Myoyo yachiyitendekwe yiŵe yakuti, naga msikana akwika kukuteka mesi, une chinamsalile kuti, “Chonde mungayile mesi gagali mu lulo lwenulo kuti mwe panandi,” 44 soni jwele juchajanje kuti, “Aga mesi amwe, soni chinasitechelesoni mesi ngamila syawosi kuti simwe.” Nguŵenda kuti jwelejo aŵe jwamkongwe jwele Yehofa amsagulile mwanache jwa ambuje ŵangu.’

45 “Mkanimalisye kuŵecheta mumtima mwangu, nam’weni Labeka ali mkwika soni ali atwichile lulo pekoyo pakwe. Kaneko nam’weni ali mkwawula pachisima ni kutanda kuteka mesi. Pelepo ni namŵendile kuti, ‘Mungayile mesi gakumwa.’ 46 Myoyo jwalakwe mwachitemachitema ŵatulwisye lulo lula pekoyo pakwe ni kusalila kuti, ‘Aga mesi amwe, soni chinasipesoni ngamila syawosi mesi kuti simwe.’ Ni une namwele, nambosoni jwalakwe ŵasipele mesi ngamilasi. 47 Kaneko namwusisye jwalakwe kuti, ‘Ana mmwejo mli mwanache jwacheni?’ Pelepo jwamkongwejo ŵajanjile kuti, ‘Unetu ndili mwanache jwa Betuwelo. Baba ŵanguwo baba ŵawo ali Naholi soni mama ŵawo ali Milika.’ Pelepo nam’wechiche ndolo pambula jakwe nambosoni yibangili m’makono mwakwe. 48 Kaneko natindiŵele pameso pa Yehofa, ni naligwisisye mpaka ngope jangu pasi ni kutanda kumchimbichisya Yehofa, Mlungu jwa ambuje ŵangu Abulahamu, jwele alongolele une pa litala lyakuŵajilwa kuti ngapate jwamkongwe jwa mwanache jwa ambuje ŵangu kutyochela kwa mlongo mjawo jwa ambuje ŵanguwo. 49 Sambanotu asalile naga akusaka kwalosya ambuje ŵangu chinonyelo changamala soni kulupichika. Nambo naga iyayi, asalile kuti ndole yakutenda.”

50 Pelepo Labani ni Betuwelo ŵajanjile kuti, “Yeleyitu yityochele kwa Yehofa. Myoyo kwa m’weji nganituŵa tukombwele kusala kuti elo kapena iyayi.* 51 Labeka ngati aju. Amjigale ajawuleje najo kuti akaŵe jwamkongwe jwa mwanache jwa ambuje ŵawowo, mpela mwaŵechetele Yehofa.” 52 Jwamasengo jwa Abulahamujo paŵapikene maloŵe gelega, papopo ŵatindiŵele pameso pa Yehofa mpaka ngope jakwe pasi. 53 Pelepo jwamasengo jula ŵatandite kukoposya yindu yakusalala, yasilifa soni yagolide nambosoni yakuwala ni kumpaga Labeka. Jwamasengojo ŵapelechesoni yindu yine yapenani mnope kwa mchimwenegwe Labeka nambosoni kwa mamagwe. 54 Pambesi pakwe, jwamasengojo pampepe ni achalume ŵaŵaliji nawo ŵala ŵalile soni kumwa, mwamti ŵagonile kukoko.

Mundu jula paŵajimwiche kundaŵi, jwatite, “Angunde kuti njawuleje kwa ambuje ŵangu sambano.” 55 Pelepo mchimwenegwe Labeka jula soni mamagwe ŵatite, “Uli atukunde kuti tutame ni msikanaju kwa masiku 10 basi. Kaneko chamjigale ni kwawulaga najo.” 56 Nambo mundu jula ŵajanjile kuti, “Chonde akanjelewekasya, pakuŵa Yehofa awupele upile ulendo wanguwu. Chonde angunde kuti nyakuche, ngusaka njawuleje kwa ambuje ŵangu.” 57 Myoyo jemanjajo ŵatite, “Uli tumŵilanje msikanajo kuti tumwusye msyene.” 58 Jemanjajo ŵamŵilasile Labeka ni kumwusya kuti, “Ana chimjawule yimpepe ni munduju?” Jwalakwe ni ŵajanjile kuti, “Elo, ndili jwakoseka kwawula nawo.”

59 Myoyo jemanjajo ŵamkundile Labeka kuti ajawuleje pampepe ni msikana jwakwe jwakumkamuchisya* nambosoni jwamasengo jwa Abulahamu jula pampepe ni achalume ŵaŵaliji nawo. 60 Pelepo jemanjajo ŵatandite kumsosela yambone Labeka ni kumsalilaga kuti, “Mlumbugwetu, mkole ŵanache ŵajinji, soni winji wakwe aŵe mamiliyoni gejinji. Nambosoni ŵanache* ŵenuwo chajigale yipata* ya ŵandu ŵakwaŵenga jemanjajo.” 61 Myoyo Labeka pampepe ni asikana ŵakumtumichila, ŵanyakwiche ni ŵakwesile ngamila sila ni kumkuyaga mundu jula. Myoyo mundujo ŵamjigele Labeka ni kwawulaga najo.

62 Isaki ŵaliji mkutama m’chilambo cha Negebu. Sambano lisiku line jwalakwe ŵaliji mkwenda pa litala lyakutyochela ku Beeli-lahai-loi. 63 Chakwigulo, Isaki ŵapite mumgunda winewakwe kuti akaganichisyeje mwakusokoka.* Kaneko jwalakwe paŵalolite, ŵasiweni ngamila sili mkwika. 64 Nombenajo Labeka paŵalolite kusogolo, ŵam’weni Isaki. Pelepo jwalakwe mwachitemachitema ŵatulwiche pa ngamila jaŵakwesile jila. 65 Kaneko ŵamwusisye jwamasengo jula kuti, “Ana mundu jwakwika kutyochela mumgunda jula ali ŵani?” Pelepo jwamasengo jula ŵajanjile kuti, “Ŵeleŵa ali ambuje ŵangu.” Paŵapikene yeleyo, jwalakwe ŵajigele nguwo ni kuliwunichila. 66 Kaneko jwamasengo jula ŵamsalile Isaki yosope yiŵatesile kuŵapite kula. 67 Panyuma pakwe Isaki ŵamjigalile Labeka mutenti ja Sala, ŵaŵaliji mamagwe. Kutandila pelepo, Labeka ŵaŵele ŵamkwakwe Isaki, mwamti Isakijo ŵamnonyele mnope jwalakwe. Pelepo mtima wa Isaki watemi mmalo panyuma pa chiwa cha mamagwe.