Masalimo
Kwa jwakulongolela nyimbo. Nyimbo ja Daudi.
68 Mlungu anyakuche, adani* ŵakwe abalalikangane,
Soni ŵandu ŵakusaŵengana ni jwalakwejo atile pameso pakwe.
2 Mpela mwalikusatendela lyosi pakuwululuka ni mbungo, ŵabalalikanganye jemanjajo.
Mpela mwagakusatendela masyega pakusungunukuka ni moto,
Myoyosoni ŵakusakala ajonasiche pameso pa Mlungu.
3 Nambo ŵakulungama asangalale.
Jemanjajo asangalale mnope pameso pa Mlungu.
Jemanjajo asechelele ligongo lyakusangalala.
4 Amjimbile Mlungu. Ajimbe nyimbo syakulichimbichisya* lina lyakwe.
Amjimbile nyimbo Jwele jwakupita mu yipululu.
Ya* ni lina lyakwe. Jemanja asangalale pameso pakwe.
5 Mlungu jwele jwakusatama kumalo gakwe geswela
Ali baba jwa ŵanache ŵamasije soni jwakwachenjela* achakongwe ŵamasije.
6 Mlungu akusampa malo gakutama mundu jwakusoŵa ŵakumkamuchisya.
Jwalakwe akusiŵagopola ŵandu ŵali mukayidi ni kwatendekasya kuti yindu yajendeleje chenene.
Nambo ŵandu ŵamakani* akusiŵaleka kuti atameje m’chilambo chejumu.
7 Wawo Mlungu, paŵalongolelaga* ŵandu ŵawo,
Pandaŵi jaŵapitaga m’chipululu, (Selah)
8 Chilambo chatenganyiche.
Ligongo lya wawojo Mlungu, kwinani kwagwisisye wula.*
Litumbi ali lya Sinai lyatenganyiche ligongo lya Mlungu, Mlungu jwa Ayisalayeli.
9 Wawo Mlungu, wawojo ŵatendekasisye wula kuti jigwe jejinji.
Ŵandu ŵawo ŵaŵaliji ŵakupela, wawojo ŵapelesoni machili.
10 Jemanjajo ŵatamaga pampepe m’matenti.
Wawo Mlungu, ligongo lya umbone wawo, wawojo ŵakamuchisyaga ŵandu ŵakulaga.
11 Yehofa ŵalamwile ŵandu ŵakwe.
Achakongwe ŵakulalichila ngani syambone ali gulu jekulungwa ja asilikali.
12 Mamwenye pampepe ni asilikali ŵawo akutila, nditu akutila!
Jwamkongwe juŵasigele kunyumba akupochela nawo yindu yapatile kungondo.
13 Atamose kuti jemanja achalume mwatemitemi ku matenti genu ni kotaga moto,*
Kweleko kuchiyika njuŵa jakola mapapiko gegumbilile ni silifa,
Soni mang’omba gaguluchila ga golide jwambone mnope.*
14 Jwamachili gosopejo paŵagabalalikangenye mamwenye ga m’chilambocho,
Ku Salimoni kwagwile mesi gagakusaŵa gekamulane ligongo lyakusisima.
15 Litumbi lya Basana lili litumbi lya Mlungu.*
Litumbi lya Basana likwete malo gejinji gelewu mnope.
16 Mmwe litumbi lyalikwete malo gejinji gelewulewu, ligongo chichi mkulilola mwajelasi
Litumbi lyalisagwile* Mlungu kuti liŵe malo gakwe gakutama?
Nditu, Yehofa chachitama kweleko mpaka kalakala.
17 Magaleta* ga ngondo ga Mlungu gali gejinji mnope, gali masausande masausande.
Yehofa ayiche kumalo geswela kutyochela ku Sinai.
18 Wawojo ŵakwesile kumalo gakwela mnope.
Wawojo ŵajigele achikapolo.
Ŵajigele achalume kuti aŵe mpela mituka.
Nditu, ŵajigele atamose ŵandu ŵamakani kuti wawojo akatameje pasikati pa jemanjajo, wawo Ya, Mlungu jwetu.
19 Achimbichikwe Yehofa Mlungu jwakusatunyakulila katundu jwetu jwakusitopa lisiku lililyose,
Mlungu jusyesyene jwali jwakutukulupusya. (Selah)
20 Mlungu jusyesyene ali Mlungu jwetu jwakusatukulupusya.
Soni Yehofa Ambuje Ŵakulungwa Mnope, akusapeleka litala lyakulupuchila kuchiwa.
21 Mlungu chachikasanya mitwe ja adani ŵakwe,
Elo, chachikasanya chikalakasa cha mundu jwalijose jwakupitilisya kutenda yakulemwa.*
22 Yehofa aŵechete kuti, “Chinjijawula kukwajigala jemanjajo atamose ku Basana.
Chinjijawula kukwajigala jemanjajo atamose pasi pa nyasa jakusokoka mnope,
23 Kuti lusajo* lwenu lunyoŵe ni myasi ja adani ŵenu
Soni kuti mbwa syenu silapite myasi jawo.”
24 Wawo Mlungu, ŵandu chachawona ŵandu ŵawo ali mkwenda mwakusangalala,
Ali mkusangalalila Mlungu jwangu jwali mwenye jwangu pakwinjila kumalo geswela.
25 Ŵakwimba nyimbo chachilongolela soni ŵakwimba ni yida yangonji chachiŵa panyuma,
Asikana chachiŵa ali mkwimba tugoma pasikati pa maguluga.
26 Mumchimbichisyeje Mlungu pasikati pa mpingo wekulungwa.*
Mumchimbichisyeje Yehofa, jemanja wosope ŵakutyochela kwa Nangolo jwa Isalayeli.
27 Benjamini jwali jwamnandi akwagomeka ŵandu.
Nambosoni ŵakulamulila ŵa ku Sebuloni, ŵakulamulila ŵa ku Nafitali,
Soni ŵakulamulila ŵa ku Yuda pampepe ni ŵandu ŵakusangalala akwagomekasoni jemanjajo.
28 Mlungu jwenu alamwile kuti chimchipochela machili.
Alosye machili gawo, wawo Mlungu ŵakusatukamuchisya.
29 Ligongo lya nyumba jawo jajili ku Yelusalemu,
Mamwenye gachiyika ni mituka kwa wawojo.
30 Ayijamuche yinyama yayikusatama m’matete,
Gulu ja ng’ombe syamkambako pampepe ni ŵanache ŵawo.
Atende yeleyi mpaka pachachiyika ŵandu ni kupeleka silifa ali atindiŵele pameso pawo.
Nambo wawojo chachabalalikanganya ŵandu ŵakusanonyela ngondo.
31 Yindu yakupanganya ni kopa yichiyika kutyochela ku Iguputo.*
Kusi chachiyika mwachitemachitema kuti akapeleche mituka kwa Mlungu.
32 Maulamusi gosope ga pachilambo chapasi gamjimbile Mlungu.
Gamjimbile Yehofa nyimbo syakumchimbichisya.* (Selah)
33 Amjimbile jwele jwakusajenda kwinani kwakwapali kutandila kalakala.
Alole! Jwalakwejo akusalindima ni maloŵe gakwe, maloŵe gakwe gamachili.
34 Amchimbichisye Mlungu ligongo ali jwamachili.
Ulamusi wekulungwa uli pasikati pa Ayisalayeli,
Soni machili gakwe gali mwinani.*
35 Mlungu akusasaka kuti ŵandu amjogopeje soni amchimbichisyeje pali kumalo gakwe geswela gagali gakuchimbichika.
Jwalakwe ali Mlungu jwa Ayisalayeli,
Jwalakwe akusiŵalimbisya ŵandu soni kwapa machili.
Amchimbichisye Mlungu.