Lute
1 Mundaŵi jele ŵakwelusya ŵaliji mkulongolela, m’chilambomo mwapali sala. Ni yatendekwe kuti mundu jwine jwatyosile mumsinda wa Betelehemu ku Yuda ni kuja kutama mpela mlendo m’chilambo cha Mowabu. Jwalakwe ŵatyosile pampepe ni ŵamkwakwe soni ŵanache ŵakwe ŵaŵili ŵachalume. 2 Munduju lina lyakwe ŵaliji Elimeleki* soni ŵamkwakwe lina lyawo ŵaliji Naomi.* Ŵanache ŵakwewo mena gawo galiji Maloni* ni Kiliyoni.* Jemanjaji ŵaliji ŵakutyochela ku Efulata mumsinda wa Betelehemu ku Yuda. Ŵanduŵa ŵapite ku chilambo cha Mowabu ni kuja kutamilichika kweleko.
3 Pali papite ndaŵi, Elimeleki, ŵamkwakwe Naomi ŵala ŵajasiche. Myoyo jwalakwe ŵasigele ni ŵanache ŵakwe ŵaŵili ŵachalume ŵala. 4 Kaneko ŵanache ŵala ŵalombele achakongwe ŵa Chimowabu, jwine lina lyakwe ŵaliji Olipa soni jwinejo ŵaliji Lute. Jemanjaji ŵatemi kweleko chiŵandika yaka 10. 5 Kaneko ŵanache ŵaŵili ŵala, Maloni ni Kiliyoni, nombenawo ŵajasiche. Mwamti Naomi ŵasigele ali jwangali ŵanache ŵakwe ŵaŵili ŵala soni ŵamkwakwe. 6 Myoyo jwalakwejo yimpepe ni achakwegwe ŵakwe ŵala ŵawutandite ulendo wakutyoka ku Mowabu kuwujila kumangwakwe. Ŵatesile yeleyi ligongo lyakuti ali ku Mowabu kula jwalakwe ŵapikene yakuti Yehofa ŵakumbuchile ŵandu ŵakwe mwakwapa yakulya.
7 Myoyo ŵatyosile kumalo kuŵatamaga ni achakwegwe ŵakwe ŵala. Paŵaliji mkwenda mwitala pakuwujila ku chilambo cha Yuda, 8 Naomi ŵasalile achakwegwe ŵakwewo kuti, “Wujilani, jwalijose ajawule kunyumba ja mamagwe. Yehofa amlosye jemanja chinonyelo changamala, mpela yamtesile pakulosya une yimpepe ni achiŵamkwenu ŵaŵajasiche ŵala. 9 Yehofa ampe upile jemanja kuti mpate ulombela ni kuŵa pambone.”* Kaneko ŵakumbatilene mwachinonyelo* soni ŵalisile mnope mwakwesya maloŵe. 10 Nambo jemanjaji ŵaliji mkwasalila akwegwe ŵawowo kuti, “Iyayi, m’weji chitujawule kwa ŵandu ŵa mtundu wawo.” 11 Nambo Naomi ŵatite, “Wujilani achiŵanangu. Ligongo chichi mkusaka kulongana ni une? Ana mumbelelemu, mpaka mbeleche ŵanache ni kuŵa achiŵamkwenu? 12 Chonde wujilani achiŵanangu, ligongo une ngalambele mwamti nganimba lombedwesoni. Atamose yili mkuti lombedwe chilochi ni kuŵeleka ŵanache, 13 ana mpaka mkombole kwalinda ŵanachewo kuti akule? Ana mpaka mtame ngalombedwa kwalinda jemanjajo? Iyayi achiŵanangu. Uneji ngumtendela chanasa jemanja, ligongo mkono wa Yehofa unjimuchile.”
14 Wosopewo ŵalisilesoni mwakwesya maloŵe. Kaneko Olipa ŵalangangene mwachinonyelo* ni akwegwe ŵakwe ŵala, ni ŵawujile kumangwakwe. Nambo Lute ŵakanile kuwujila. 15 Myoyo Naomi ŵatite, “Mlole! Mlongo mjenu jwamasije awujile kwa ŵandu ŵakwe soni kwa milungu jakwe. Mmwejosoni mwujile najo yimpepe.”
16 Nambo Lute ŵatite, “Akanganganichisya kuti naleche, kuti ngalongana ni wawojo. Kulikose kwachajawule wawojo, unesoni chinjawule kukoko. Nambosoni kulikose kwachakagone, unesoni chingagone kukoko. Ŵandu ŵawo chakaŵesoni ŵandu ŵangu, Mlungu jwawo chakaŵe Mlungu jwangu. 17 Kuchakawile wawojo unesoni chingawile kukoko, soni kwele ni kuchakasiche m’malembe. Yehofa ambe chilango* chekulungwa naga chilichose chikundekanganya ni wawojo, akaŵe chiwape basi.”
18 Naomi paŵayiweni kuti Lute akukakamila kwawula nawo, ŵalesile kumsalila kuti awuje. 19 Jemanjaji ŵapitilisye ulendo wawo mpaka ŵayiche ku Betelehemu. Paŵagambile kwika ku Betelehemu ŵandu wosope mumsindamo ŵatandite kuŵecheta ya jemanjajo. Mwamti achakongwe ŵawusyanaga kuti, “Ana aju ngaŵa Naomi aju?” 20 Nambo jwalakwe ŵajangaga achakongwewo kuti, “Mkasimungolangaga une kuti Naomi.* Nambo mungolanjeje kuti Mala,* pakuŵa Jwamachiligosopejo atendekasisye umi wangu kuŵa wakupweteka. 21 Nakwete chilichose panatyokaga akuno, nambo Yehofa andendekasisye kuwuja yalayalape. Ni ligongo chichi mkungolanga kuti Naomi, chitamilecho Yehofa anganile une, soni Jwamachiligosopejo andendekasisye une kuti nayiwone yakupweteka?”
22 Mwelemu ni muŵawujile Naomi kutyochela ku chilambo cha Mowabu pampepe ni Lute juŵaliji mkwegwe jwakwe jwa Chimowabu. Jemanjaji ŵayiche ku Betelehemu chakundanda kwa ndaŵi jagowola balele.