Yoswa

6 Sambano msinda wa Yeliko ŵawuwugele mwamachili mnope kuti Ayisalayeli akapita, mwamti pangali juŵakopokaga kapena kwinjila.

2 Kaneko Yehofa ŵamsalile Yoswa kuti, “Mpikane. Une nawupeleche kwa mmwejo msinda wa Yeliko, mwenye jwakwe soni asilikali ŵakwe ŵamachili. 3 Mmwejo ni achalume wosope ŵakuputa ngondo mwusyungulileje msindawo mli mkuguba kamope palisiku. Mtende yeleyi kwa masiku 6. 4 Mwasalile ŵakutaga mbopesi 7 kuti ajendeje pasogolo pa libokosi lya chilanga ali ajigele malipenga 7 ga misengo ja ngondolo. Nambo palisiku lya 7 mwusyungulile msindawo ka 7 mli mkuguba. Kaneko ŵakutaga mbopesi alisye malipenga ga misengo gala. 5 Pachagambe kulisya malipenga ga misengo ja ngondologo soni jemanja pachimgambe kupikana kulilako, ŵandu wosope agumile mpela yakusati pagumila ŵandu kungondo. Kaneko mapupa ga msindawo tigachigwa mpaka pasi. Pelepo jwalijose, kutyochela pajimipo, ajinjile mumsindawo.”

6 Myoyo Yoswa mwanache jwa Nuni ŵaŵilasile ŵakutaga mbopesi wosope ni kwasalila kuti, “Mjigale libokosi lya chilanga, soni ŵakutaga mbopesi ŵane 7 ajigale malipenga 7 ga misengo ja ngondolo ni ajendeje pasogolo pa libokosi lya chilanga lya Yehofalyo.” 7 Kaneko Yoswa ŵasalile asilikali kuti, “Kwende tunyakuche, tukajende mwakuwusyungulila msindawo tuli mkuguba. Asilikali ŵane yimpepe ni yida yawo akajendeje pasogolo pa libokosi lya chilanga lya Yehofa.” 8 Yoswa paŵagambile kumalisya kuŵechetana ni asilikaliwo, ndaŵi jijojo ŵakutaga mbopesi 7 ŵakujigala malipenga 7 ga misengo ja ngondolo pasogolo pa Yehofa, ŵanyakwiche ni kutanda kulisya malipengago. Kaneko ŵakutaga mbopesi ŵakunyakula libokosi lya chilanga lya Yehofa ŵatandite kwakuya jemanjajo. 9 Nombe nawo asilikali ni yida yawo ŵanyakwiche ni kwawula pasogolo pa ŵakutaga mbopesi ŵaŵajimbaga ni malipenga ga misengo ja ngondolo, soni asilikali ŵane ŵayikaga panyuma pa libokosi lya chilanga, kwineku ŵakutaga mbopesi ŵakwimba ŵala ali mkupitilisya kwimba.

10 Sambano Yoswa ŵalamwile ŵanduwo kuti, “Jwalijose akagumila kapena kuŵecheta chilichose. Pakamwa penu pakakopoka liloŵe lililyose mpaka palisiku lyele chinjimsalila kuti, ‘Mgumile!’ Pelepo chimgumile.” 11 Palisiku lyeleli libokosi lya chilanga lya Yehofa lyasyungulile msindawo kamo mpela muŵalamulile Yoswa. Kaneko wosopewo ŵawujile ku masakasa gawo ni kuja kugona.

12 Palisiku lyakuyichisya, Yoswa ŵajimwiche kundaŵindaŵipe soni ŵakutaga mbopesi ŵanyakwile libokosi lya chilanga lya Yehofa. 13 Kaneko ŵakutaga mbopesi ŵakujigala malipenga 7 ga misengo ja ngondolo ŵajendaga pasogolo pa libokosi lya chilanga lya Yehofa kwineku ali mkwimbape. Pasogolo pa jemanjaji pajendaga asilikali ŵaŵajigele yida soni asilikali ŵane ŵayikaga panyuma pa libokosi lya chilanga lya Yehofa, kwineku ŵakutaga mbopesi ŵakwimba ŵala ali mkupitilisya kwimba. 14 Jemanjaji ŵawusyungulilesoni msindawo kamo ali mkuguba palisiku lyaŵili, kaneko ŵawujile ku masakasa gawo. Yeleyi ni yaŵatesile kwa masiku 6.

15 Palisiku lya 7 ŵajimwiche kundaŵindaŵipe kusa kuli kugambile kutanda kucha. Jemanjaji ŵasyungulile msindawo mwakuguba mpela muŵatendelaga masiku gosope, nambo palisikuli ŵawusyungulile msindawo kwa maulendo 7, mwamti lisiku alipeli ni liŵawusyungulile msindawo mwakuguba kwa maulendo 7. 16 Paulendo wa 7, ŵakutaga mbopesi ŵalisisye malipenga ga misengo gala. Kaneko Yoswa ŵalamwile ŵanduwo kuti, “Mgumile, ligongo Yehofa ampele msindawu! 17 Msindawu nambosoni yosope yayili mwelemo yikusosekwa kuyijonanga, ligongo yosopeyo yili ya Yehofa. Nambo Lahabi lihule lila soni wosope ŵam’nyumba jakwe akajonanga ligongo jwalakwe ŵasisile ŵakusonda ŵatwatumisye ŵala. 18 Nambo msamale ni yindu yamkusosekwa kuyijonanga kogopela kuti mpaka myikumbile ni kujigala. Naga mkujigala yinduyo chimchitendekasya kuti Ayisalayeli wosope asimane ni yipwetesi nikuŵa ŵakwenela kwajonanga. 19 Nambo silifa soni golide josope nambosoni yindu yosope yakupanganya ni kopa soni ayiloni yili yeswela kwa Yehofa. Yindu yeleyi yijawule mwakusunjila chipanje cha Yehofa.”

20 Pelepo ŵalisisye malipenga ga misengo ja ngondolo gala, kaneko ŵanduwo ŵagumisile. Ŵanduwo paŵagambile kupikana kulila kwa misengojo soni paŵagumisile mnope mpela yakusati pagumila kungondo, mapupa ga msindawo gagwile mpaka pasi. Kaneko jwalijose, kutyochela paŵajimi, ŵajinjile mumsindamo ni kuwusumula. 21 Yaumi yosope ya mumsindamo ŵayiwuleje ni upanga*, chinga mundu jwamlume kapena jwamkongwe, mwanache kapena jwamkulungwa, ng’ombe, ngondolo, nambosoni bulu.

22 Kaneko Yoswa ŵasalile achalume ŵaŵili ŵaŵapite kukusonda chilambo ŵala kuti, “Mjawule m’nyumba ja lihule lila, ni mkamkoposye jwalakwejo pampepe ni wosope ŵali mwelemo, mwakamulana ni yamwatite pakulumbila pameso pakwe.” 23 Myoyo ŵakusondawo ŵajinjile m’nyumbamo ni ŵamkopwesye Lahabi pampepe ni babagwe, mamagwe, achalumbugwe soni wosope ŵaŵatamaga nawo, elo ŵalikopwesye liŵasa lyakwe lyosope. Ŵakopwesye jemanjaji ali ŵambonembonepe ni ŵaŵisile kusa kwa masakasa ga Ayisalayeli.

24 Kaneko msindawo ŵawuchomile moto pampepe ni yosope yayaliji mwelemo. Nambo silifa, golide, nambosoni yindu yosope yakupanganya ni kopa soni ayiloni ŵayipeleche kuti akayiŵiche mwakusunjila chipanje m’nyumba ja Yehofa. 25 Yoswa nganamwulaga Lahabi lihule lila soni wosope ŵaŵatamaga nawo nambosoni wosope ŵa m’nyumba ja babagwe, mwamti jwalakwe akutamape mu Isalayeli mpaka lelojino. Lahabi nganamwulaga ligongo lyakuti ŵasisile ŵakusonda ŵele Yoswa ŵatumisye kuti akasonde msinda wa Yeliko.

26 Pandaŵi jelejo, Yoswa ŵalumbile* mwakuŵecheta kuti, “Mundu jwalijose juchachitaŵasoni msinda wa Yeliko chachiŵa jwakulweseka* pameso pa Yehofa. Pachachigamba kutanda kutaŵa fendeshoni jakwe, mwanache jwakwe jwandanda chachiwa, soni mwanache jwakwe jwakumalisya chachiwa pachachigamba kuŵika matanga gakwe.”

27 Myoyo Yehofa ŵapitilisye kumkamuchisya Yoswa mwamti mbili jakwe* japikaniche pachilambo chosope.