Masalimo
Nyimbo jakwimba pakwela kwawula ku msinda. Nyimbo ja Daudi.
122 Nasangalele paŵasalile kuti:
“Kwende tujawule ku nyumba ja Yehofa.”
2 Sambanotu sajo* syetu sijimi
M’mageti genu, Mmwe Yelusalemu.
3 Msinda wa Yelusalemu ŵawutaŵile
Mpela chindu chimo chakamulana.
4 Mbumba* sipite kweleko,
Mbumba sya Ya* sipite
Kuti sikaliyamichile lina lya Yehofa,
Mwakamulana ni yaŵalamwile kwa Ayisalayeli kuti ayikumbuchileje.
5 Kweleko ŵaŵisile mipando jakweluchisya magambo,
Elo, mipando jaumwenye ja nyumba ja Daudi.
6 Mŵende kuti mumsinda wa Yelusalemu muŵe mwana mtendele.
Mmwe msinda, wosope ŵakumnonyela mmwejo chachitamaga mwangajogopa chilichose.
7 Nguŵenda kuti mtendele upitilisye kuŵa mkati mwa ndenje syenu,*
Elo, wosope ŵakutama mu sanja syenu syakulimbangana atameje mwangajogopa chilichose.
8 Ligongo lyakwanonyela ŵandu ŵangu soni achimjangu, chinjiŵecheta kuti:
“Mmwe Yelusalemu, mwa mmwejo muŵe mwana mtendele.”
9 Ligongo lyakuti ngusajinonyela nyumba ja Yehofa Mlungu jwetu,
Chinjimsosela mmwejo yambone yosope.