Ekisodo
24 Kaneko jwalakwe ŵamsalile Mose kuti, “Mkwele kwitumbi kwandili une Yehofa, mmwejo pampepe ni Aloni, Nadabu soni Abihu nambosoni achakulungwakulungwa 70 ŵa Ayisalayeli. Ni mkatindiŵale mli mjimi pakutalichila. 2 Mmwejo Mose ni ŵamkusosekwa kuŵandichila kwandili une Yehofa, nambo ŵanewo akaŵandichila soni ŵandu wosope akamkuya mmwejo.”
3 Kaneko Mose ŵayiche kuŵaliji ŵanduwo ni kwasalila maloŵe gosope gaŵaŵechete Yehofa soni malamusi gosope gaŵaŵechete jwalakwe, mwamti ŵandu wosope ŵajanjile pampepe kuti, “Yosope yaŵechete Yehofa chituyitende.” 4 Myoyo Mose ŵalembile maloŵe gosope gaŵamsalile Yehofa. Kaneko jwalakwe ŵajimwiche kundaŵindaŵipe ni ŵataŵile malo gakupelechela mbopesi soni yipilala yakwana 12 mwakamulana ni mbumba* 12 sya Isalayeli. Ŵataŵile yeleyi cha mumbali mwa litumbi. 5 Panyuma pakwe jwalakwe ŵatumile anyamata ŵa Chiyisalayeli soni anyamatawo ŵapeleche kwa Yehofa mbopesi syakutinisya nambosoni mbopesi sya ng’ombe kuti siŵe mbopesi sya mkamulano. 6 Kaneko Mose ŵajigele myasi jine ni kujiŵika mu mbale, soni myasi jine ŵajimisile pa malo gakupelechela mbopesi. 7 Pelepo Mose ŵajigele buku ja chilanga ni kujiŵalanga mwakwesya maloŵe pameso pa ŵanduwo. Ni ŵanduwo ŵajanjile kuti, “Yosope yaŵechete Yehofa chituyitendeje soni chitumpikanileje.” 8 Myoyo Mose ŵajigele myasi ni kujimisila pa ŵanduwo, ni jwaŵechete kuti, “Jeleji jili myasi ja chilanga chele Yehofa atesile ni jemanja mwakamulana ni maloŵe gosope gaŵechetega.”
9 Sambano Mose soni Aloni, Nadabu soni Abihu ni achakulungwakulungwa 70 ŵa Ayisalayeli ŵala ŵakwesile mwitumbimo, 10 mwamti ŵamweni Mlungu jwa Ayisalayeli. Pasi pa sajo syakwe paliji chindu chakuwoneka mpela liganga lya safilo, soni chinducho chaliji chakusalala mnope mpela kwinani. 11 Jwalakwe nganiŵajonanga ŵandu ŵakuchimbichika ŵa Ayisalayeli. Jemanjajo ŵagaweni mesomkulola ga Mlungu jwakuwona mwamti ŵalile soni kumwa.
12 Sambano Yehofa ŵamsalile Mose kuti, “Mkwele mwitumbimo kuti myiche kwandili une, soni mtame mmomo. Une chinampe maganga gakusepa gele une chilembepo chilamusi soni maloŵe gakuti jemanjajo agakuyeje.” 13 Myoyo Mose ŵanyakwiche pampepe ni jwakutumichila jwakwe Yoswa. Soni Mosejo ŵakwesile mu litumbi lya Mlungu jwakuwona. 14 Nambo Mose ŵasalile achakulungwakulungwawo kuti, “Jemanja mtame panopano soni mtujembecheyeje mpaka tuwuje. Pana Aloni soni Hula ŵachimŵe nawo yimpepe. Jwalijose jwakwete magambo ajawuleje kwa jemanjaji.” 15 Kaneko Mose ŵakwesile mu litumbi mula. Pandaŵiji liwunde lyaliji mkuwunichila litumbilyo.
16 Uchimbichimbi wa Yehofa walijipe pa litumbi lya Sinai soni liwunde lyawunichile litumbilyo kwa masiku 6. Palisiku lya 7, Mlungu ŵamŵilasile Mose kutyochela pasikati pa liwunde lila. 17 Nambo Ayisalayeli ŵaŵalolaga yayatendekwagayo ŵawuweni uchimbichimbi wa Yehofa uli mkuwoneka mpela moto wakolela mnope penani pa litumbilyo. 18 Kaneko Mose ŵajinjile mu liwundemo ni kukwela mwitumbimo. Jwalakwe ŵatemi mwitumbimo kwa masiku 40 chilo ni musi.