Numeli
27 Kaneko ŵanache ŵachakongwe ŵa Selofekadi ŵayiche kwa Mose. Selofekadi ŵaliji mwanache jwa Hefa, jwele juŵaliji mwanache jwa Giliyadi. Giliyadi ŵaliji mwanache jwa Makili, jwele juŵaliji mwanache jwa Manase. Jemanjaji ŵaliji ŵakutyochela m’liŵasa lya Manase mwanache jwa Yosefe. Sambano ŵanache ŵa achakongwe ŵa Selofekadiwo ŵaliji Mala, Nowa, Hogila, Milika soni Tilisa. 2 Jemanjaji ŵayiche kumlango wa chitenti chakusimanilana ni kwima pameso pa Mose, jwakutaga mbopesi Eliyesala, achakulungwakulungwa ŵa Ayisalayeli nambosoni pameso pa Ayisalayeli wosope. Ni ŵaŵechete kuti, 3 “Baba ŵetu ŵawilile m’chipululu, nambo babawo ngaŵa kuti ŵaliji mu gulu ja ŵandu ŵaŵaliji kumbali ja Kola ŵaŵakamulene kuti amjimuchile Yehofa. Mmalomwakwe ŵawile ligongo lya yakulemwa yawo. Nambo paŵawagapo ŵaliji ali ŵangali mwanache jwalijose jwamlume. 4 Nambi yisyene lina lya baba ŵetu liwe ku liŵasa lya babawo ligongo lyakuti nganakola mwanache jwalijose jwamlume? Chonde m’wejisoni atupe malo pasikati pa achalongo achimjawo baba ŵetu kuti gaŵe chipanje chetu.” 5 Myoyo Mose ŵajijigele nganiji ni kujipeleka kwa Yehofa.
6 Pelepo Yehofa ŵamsalile Mose kuti, 7 “Ŵanache ŵachakongwe ŵa Selofekadiwo akusala yisyene. Nditu mkusosekwa kwapa jemanjajo malo pasikati pa achalongo achimjawo ŵa baba ŵawo kuti gaŵe chipanje chawo. Myoyo mwape jemanjajo malo gasosekweje kupochela baba ŵawogo. 8 Soni mwasalile Ayisalayeli wosope kuti, ‘Naga mundu jwamlume awile mkanakole mwanache jwamlume, pelepo chipanje cha mundujo chijawuleje kwa mwanache jwakwe jwamkongwe. 9 Nambo naga jwalakwe jwangali mwanache jwamkongwe jwine jwalijose, chipanje chakwecho chijawuleje kwa akuluŵawo kapena apwawo jwamlumejo. 10 Naga ŵangali akuluŵawo kapena apwawo, chipanje chakwecho chijawuleje kwa akuluŵawo baba ŵawo jwamlumejo kapena apwawo baba ŵawo. 11 Nambo naga baba ŵawo ŵaliji ŵangali akuluŵawo kapena apwawo, chipanje chakwecho chijawuleje kwa jwachibale jwakwe jwali najo paulongo wa pakuŵandika, mwamti ŵelewo ajigaleje chipanjecho ni kuŵa chawo. Yanamlamwile pelepayi, yiŵe lilamusi lyakuti Ayisalayeli wosope akuyeje. Mtendeje yeleyi mwakamulana ni yatite Yehofa pakumlamula Mose.’”
12 Panyuma pakwe, Yehofa ŵamsalile Mose kuti, “Mkwele mu litumbi lya Abalimu kuti mkachiwone chilambo changusaka kwapa Ayisalayeli. 13 Pachimkachiwone chilambocho, kaneko chimkawe ni kusichidwa m’malembe mpela muyaŵelele ni achinangolo ŵenu soni mpela mwayiŵelele ni achimwene ŵenu Aloni. 14 Yeleyi yili myoyo ligongo lyakuti jemanja nganimpikanila yanamlamwile, soni nganimunjimbichisya une pameso pa Ayisalayeli pamwakoposyaga mesi. Mwatesile yeleyi pandaŵi jele jemanjajo ŵakanganile ni une pamesi ga ku Meliba ku Kadesi m’chipululu cha Sina.”
15 Kaneko Mose ŵamsalile Yehofa kuti, 16 “Wawo Yehofa, Mlungu jwakusapeleka umi kwa ŵandu wosope, asagule mundu pasikati pa ŵanduŵa 17 jwachiŵalongoleleje jemanjajo pa yindu yiliyose yachatendeje, ni chakulinga chakuti ŵandu ŵa Yehofaŵa akaŵa mpela ngondolo syangali m’busa.” 18 Pelepo Yehofa ŵamjanjile Mose kuti, “Mumjigale Yoswa mwanache jwa Nuni, mundu jwele jwali jwakuŵajilwa kuŵa jwakulongolela, ni mumsajiche mkono wenu pamtwe pakwe. 19 Mumjimiche jwalakwejo pameso pa jwakutaga mbopesi Eliyesala soni pameso pa ŵandu wosope. Kaneko mumŵiche jwalakwejo kuŵa jwakulongolela, ŵandu wosopewo ali mkulola. 20 Mumpe jwalakwejo gane mwa maudindo genu* ni chakulinga chakuti Ayisalayeli wosope ampikanileje jwalakwejo. 21 Jwalakwe ayicheje pameso pa jwakutaga mbopesi Eliyesala jwele juchawuchisyeje lunda kwa Yehofa mmalo mwa jwalakwejo pakamulichisya masengo Ulimu* kuti amanyilile yalamwile Mlungujo. Yiliyose yachalamuleje, ayikuyeje jwalakwejo soni Ayisalayeli wosope.”
22 Myoyo Mose ŵatesile yosope yaŵamlamwile Yehofayi. Jwalakwe ŵamjigele Yoswa ni kumjimika pameso pa jwakutaga mbopesi Eliyesala soni pameso pa Ayisalayeli wosope. 23 Kaneko Mose ŵasajiche makono gakwe pamtwe pa jwalakwe ni kumŵika jwalakwe kuŵa jwakulongolela, mwakamulana ni yaŵatite Yehofa pakumlamula Mosejo.