Ŵakulamula
10 Panyuma pa Abimeleki payiche Tola kuti ŵakulupusye Ayisalayeli. Jwalakweju ŵaliji mwanache jwa Puwa soni chisukulu cha Dodo. Jwalakweju ŵatyochelaga mu mbumba* ja Isakala. Tola ŵatamaga ku Samilu mu dela jamatumbi ja mbumba ja Efulayimu. 2 Jwalakweju ŵaŵele jwakwelusya jwa Ayisalayeli kwa yaka 23. Kaneko Tola ŵawile ni ŵamsichile m’malembe ku Samilu.
3 Panyuma pa jwalakwe payiche Yayili jwakutyochela ku Giliyadi. Jwalakweju ŵaŵele jwakwelusya jwa Ayisalayeli kwa yaka 22. 4 Yayili ŵakwete ŵanache 30 ŵachalume, soni jwalijose ŵakwete bulu jwakwe juŵakwelaga nambosoni jwalijose ŵakwete msinda wakwe. Misinda josope pampepe japali 30. Misinda jeleji jili m’chilambo cha Giliyadi soni jikusamanyika ni lina lyakuti Hafoti-yayili mpaka lelo. 5 Pambesi pakwe Yayili ŵawile ni ŵamsichile m’malembe ku Kamoni.
6 Sambano Ayisalayeli ŵatandilesoni kutenda yindu yayaliji yakusakala pameso pa Yehofa. Jemanjaji ŵatandite kuyitumichila yiwanichisyo ya Baala, yiwanichisyo ya Asitoleti, milungu ja ŵandu ŵa ku Alamu,* milungu ja ŵandu ŵa ku Sidoni, milungu ja ŵandu ŵa ku Mowabu, milungu ja Aamoni soni milungu ja Afilisiti. Jemanjaji ŵamlesile Yehofa soni ŵalesile kumtumichila. 7 Kaneko Yehofa ŵatumbilile mnope Ayisalayeli, mwamti ŵapeleche* mmyala mwa Afilisiti soni Aamoni. 8 Myoyo jemanjaji ŵalosisye yipwetesi soni kwalagasya mnope Ayisalayeli chaka chelecho. Kwa yaka 18 jemanjaji ŵalagasisye Ayisalayeli wosope ŵaŵatamaga ku lisi line lya lusulo lwa Yolodani m’chilambo cha Giliyadi, chachaliji chilambo cha Aamoli. 9 Aamoni ŵajombokagasoni lusulo lwa Yolodani ni kwawula kukumenyana ni ŵa mu mbumba ja Yuda, mbumba ja Benjamini nambosoni ŵa mu mbumba ja Efulayimu, mwamti Ayisalayeli ŵatamilaga kudandawula mnope. 10 Kaneko Ayisalayeli ŵatandite kumŵenda Yehofa kuti ŵakamuchisye. Ŵatite, “M’weji twalemwechesye wawojo. Twalesile wawojo ŵali Mlungu jwetu, ni kutanda kutumichila yiwanichisyo ya Baala.”
11 Nambo Yehofa ŵajanjile Ayisalayeliwo kuti, “Ana uneji nganinamkulupusya jemanja pamwalagasikaga ku Iguputo soni paŵamlagasyaga Aamoli, Aamoni, Afilisiti, 12 Asidoni, Aamaleki soni Amidiyani? Jemanja pamwaliji mkulilila une, une namkulupusyaga mmyala mwa jemanjajo. 13 Nambo jemanja mulesile une ni kutanda kutumichila milungu jine. Paligongo lyeleyi, unesoni nganamkulupusya jemanja. 14 Mjawule kwa milungu jenu jamwajisagwilejo, mkajiŵende jelejo kuti jimkamuchisye. Milungu jeleji ni jachijimkulupusyeje jemanja pandaŵi ja yipwetesi.” 15 Nambo Ayisalayeliwo ŵamjanjile Yehofa kuti, “M’weji twalemwechesye wawojo. Atutende chilichose chakuchiwona kuti chili chambone m’meso mwawo. Nambo yatukusaka m’weji lelo ni yakuti atukulupusye basi, chonde.” 16 Myoyo jemanjajo ŵatyosisye pasikati pawo milungu ja ŵandu ŵamitundu jine ni kutanda kumtumichila Yehofa. Ŵatesile yeleyi ni chakulinga chakuti Mlungu akagambaga kwalola Ayisalayeliwo ali mkulaga.
17 Pali papite ndaŵi, gulu ja asilikali ŵa Aamoni ŵasongene pampepe ni kukunga matenti gawo ku Giliyadi. Nombenawo Ayisalayeli ŵasongene pampepe ni kukunga matenti gawo ku Misipa. 18 Ŵandu soni ŵakulamulila ŵa mu Giliyadi ŵatandite kukambilana kuti, “Ana ŵani ŵachatulongolele pakuja kumenyana ni Aamoni? Mundu juchatulongolelejo chaŵe mwenye jwa ŵandu wosope ŵa ku Giliyadi.”