Buku Jandanda ja Samuyele
12 Pambesi pakwe Samuyele ŵasalile Ayisalayeli wosope kuti, “Ndesile yosope yamwambendile une jemanja, mwamti sagwile mwenye jwakuti amlamulileje. 2 Sambano aju ni mwenye jwakumlongolela. Nambo une ngalambele soni ngwete wuli, nambosoni ŵanache ŵangu ali yimpepe ni jemanja. Sonitu une namlongolele kutandila pa unyamata wangu mpaka lelo jino. 3 Une ndili apano. Msale pameso pa Yehofa soni pameso pa jwakusagulidwa jwakwe naga mkwete magambo galigose ni une. Ana pakwete panjigele ng’ombe kapena bulu jwa mundu jwine? Ana ŵani ŵanatendele yachinyengo kapena kwalagasya? Ana pakwete pambochele yipupu kwa mundu jwine ni chakulinga chakuti akapochela chilango?* Naga pakwete pandesile yeleyi, chinamwuchisye yinduyo jemanja.” 4 Pelepo jemanjajo ŵajanjile kuti, “Nganimtutendelejepo yachinyengo kapena kutulagasya, kapenasoni kupochela chindu chilichose kwa mundu jwine.” 5 Myoyo jwalakwe ŵajanjile jemanjajo kuti, “Yehofa ali mboni pasikati pa une ni jemanja. Soni jwakusagulidwa jwakwe ali mboni lelo jino kuti jemanja nganimpata chakulemwecheka chilichose mwa une.” Pelepo jemanjajo ŵajanjile kuti, “Elo Mlungu* ali mboni.”
6 Kaneko Samuyele ŵasalile ŵanduwo kuti, “Yehofa juŵamkamulichisye masengo Mose ni Aloni soni jwele ŵakopwesye achinangolo ŵenu ku Iguputo ali mboni. 7 Sambano jwalijose ajime pamalo gakwe, soni une chinamlamule jemanja pameso pa Yehofa mwakamulana ni yindu yosope ya chilungamo yele Yehofa aŵele ali mkumtendela jemanja soni yaŵele ali mkwatendela achinangolo ŵenu.
8 “Kutandila pandaŵi jele Yakobo ŵayiche ku Iguputo soni pele achinangolo ŵenu ŵatandite kumŵenda Yehofa kuti ŵakamuchisye, Yehofajo ŵamtumisye Mose soni Aloni kuti akalongolele achinangolo ŵenu pakukopoka m’chilambo cha Iguputo soni ŵatendekasisye jemanjaji kuti atame malo agano. 9 Nambo jemanjajo ŵamliŵalile Yehofa Mlungu jwawo, mwamti jwalakwe ŵasumisye jemanjajo mmyala mwa Sisela juŵaliji jwamkulungwa jwa gulu ja asilikali ja Hasoli, soni ŵasumisye mmyala mwa Afilisiti ni mmyala mwa mwenye jwa ku Mowabu. Sonitu wosopeŵa ŵamenyene ni jemanjajo. 10 Kaneko jemanjajo ŵatandite kumŵenda Yehofa kuti ŵakamuchisye, mwamti ŵatite, ‘M’weji tulemwisye, pakuŵa tumlesile Yehofa ni kujitumichila milungu jakolanjikwa kuti Baala soni yiwanichisyo ya Asitoleti. Sambano atukulupusye mmyala mwa adani ŵetu ni chakulinga chakuti twatumichile wawojo.’ 11 Panyuma pakwe Yehofa ŵamtumisye Yelubala, Bedani soni Yefita ni Samuyele kuti amkulupusye jemanja mmyala mwa adani ŵenu wosope ŵaŵamsyungulile. Jwalakwe ŵatesile yeleyi ni chakulinga chakuti jemanja mkatamaga mwawoga. 12 Jemanja pamwam’weni Nahasi mwenye jwa Aamoni ali mkwika kuti alimbane ni jemanja, mwasalilaga une kuti, ‘Iyayi, m’we tusimichisye kuti tukole mwenye jwakuti atulamulileje!’ Mwaŵechetaga yeleyi atamose kuti Yehofa Mlungu jwenu ni jwali Mwenye jwenu. 13 Sambano aju ni mwenye jwele jemanja mwamsachile soni jumwaŵendile. Mlole! Yehofa asagwile mwenye jwakuti amlamulileje. 14 Naga mkumjogopa Yehofa ni kumtumichila jwalakwe soni kupikanila maloŵe gakwe, nambosoni naga ngamkugajimuchila malamusi ga Yehofajo, soni naga jemanja pampepe ni mwenye jwenu jwakumlamulila mkumkuya Mlungu jwenu, nikuti yili chenene. 15 Nambo naga ngamkugapikanila maloŵe ga Yehofa soni naga mkugajimuchila malamusi ga Yehofajo, mkono wa Yehofa uchimpa chilango jemanja pampepe ni achatati ŵenu. 16 Sambano jemanja mjime pamalo genu kuti mlole chindu chakusimonjesya chachatende Yehofa pameso penu. 17 Ana lelo nganiliŵa lisiku lyakutyosya tiligu mumgunda? Nambotu une chinamŵende Yehofa kuti atende yakuti kulindime soni kugwe wula. Pelepo ni pachimmanyilile soni kupikanichisya kuti mtesile chindu chakusakala pameso pa Yehofa mwakuŵenda kuti mkole mwenye.”
18 Pelepo Samuyele ŵaŵendile kwa Yehofa, soni Yehofajo ŵatendekasisye kuti kulindime soni kugwe wula. Mwamti ŵandu wosope ŵamjogwepe mnope Yehofa soni Samuyele. 19 Kaneko ŵandu wosopewo ŵamsalile Samuyele kuti, “Mwapopelele ŵakutumichila ŵenu kwa Yehofa Mlungu jwenu ligongo ngatukusaka kuwa. Pakuŵa m’weji tujonjechesye chindu chine chakusakala pa ulemwa wetu mwakuŵenda kuti tukole mwenye.”
20 Myoyo Samuyele ŵasalile ŵanduwo kuti, “Mkatenda woga. Yili yisyene kuti mtesile chindu chakusakala mnope chelechi. Nambope mkaleka kumkuya Yehofa soni mumtumichile jwalakwe ni mtima wenu wosope. 21 Mkagalawuchila kwine ni kutanda kukuya yindu yangali mate,* yindu yele yili yangakamuchisya soni yanganiyiŵa yimkulupwisye, ligongotu yindu yeleyo yili yangali mate.* 22 Ligongo lya lina lyakwe lyekulungwa, Yehofa ngasiŵaleka ŵandu ŵakwe, pakuŵa Yehofa ŵamsagwile jemanja kuti mŵe ŵandu ŵakwe. 23 Nambo kwa une ngandeka kumpopelela jemanja. Ligongo naga nguleka mpaka kuŵe kulemwa pameso pa Yehofa. Soni une chimbitilisye kumlongolela jemanja mu litala lyambone soni lyakuŵajilwa. 24 Nambo mkusosekwa kumjogopa Yehofa ni kumtumichila jwalakwe ni mtima wenu wosope soni mwakulupichika,* pakuŵa mkusosekwa kukumbuchila yindu yakusimonjesya yele jwalakwe amtendele jemanja. 25 Nambo naga mkukakamila kutenda yindu yakusakala, jwalakwe chachimpyajila, jemanja pampepe ni mwenye jwenujo.”