Masalimo
95 Ayiche kuti tumjimbile Yehofa mwakusangalala!
Kwende tulujimbile mwakusangalala Lwala lwetu lwalukusatukulupusya.
2 Kwende tukawonechele pameso pakwe kuti tukamyamichile.
Kwende tukamjimbile jwalakwejo mwagumila soni mwakusangalala.
3 Pakuŵa Yehofa ali Mlungu jwamkulungwa,
Ali Mwenye jwamkulungwa kujipunda milungu jine josope.
4 Malo gakusokoka mnope ga chilambo chapasi gali mmyala mwakwe.
Matumbi gamalewulewu gali gakwe.
5 Nyasa jaŵajipanganyisye jwalakwejo jili jakwesoni.
Soni jwalakwe ŵapanganyisye mkuli ni makono gakwe.
6 Ayiche kuti tumtindiŵalile Mlungu mpaka ngope syetu pasi.
Kwende tutindiŵale pameso pa Yehofa, Mkupanganya jwetu.
7 Pakuŵa jwalakwe ali Mlungu jwetu,
Soni m’weji tuli ŵandu ŵakwe.
Jwalakwe akusatusamalila* mpela ngondolo syapamalo gakwe gakulichisya yilango.
Yikaliji chenene mli mpikanile maloŵe gakwe lelo.
8 Mkajumusya mitima jenu mpela yaŵatesile achinangolo ŵenu ku Meliba,*
Soni mpela yaŵatesile m’chipululu palisiku lyaŵaliji ku Masa.*
9 Pandaŵi jelejo achinangolo ŵenu ŵalinjile une.
Ŵasisyene ni une, atamose kuti ŵaliji ali agaweni masengo gangu.
10 Kwa yaka 40 m’bado* welewo waliji mkusakalisya, mwamti natite:
“Ŵandu ŵeleŵa ndaŵi syosope m’mitima jawo akusaganisya yakutindana ni yakusaka yangu.
Mpaka apano nganaŵe kugamanyilila matala gangu.”
11 Myoyo une ndili ndumbile, nalumbile kuti:
“Jemanjaji ngasajinjila mu lisiku lyangu lyakupumula.”