Ngani Syambone Syaŵalembile Maliko

14 Sambano paliji pali pasigele masiku gaŵili kuti patendekwe Pasika soni Chisangalalo cha Mikate* Jangali Chakusasaŵisya. Sambano ŵakulolela ŵakutaga mbopesi ni alembi ŵaliji mkusosasosa litala lyakuti amkamulile* Yesu mwakalamuka kuti amwulaje. 2 Nambo jemanjajo ŵaŵechetaga kuti, “Tukamkamula pa lisiku lya chisangalalo, kogopela kuti ŵandu mpaka atandisye yachiwawa.”

3 Sambano jwalakwe paŵaliji ku Betaniya, ali mkulya m’nyumba ja Simoni jwamatana, jwayiche jwamkongwe jwine ali ajigele libotolo* lya mawuta gakununjila mnope gakupanganyidwa ni nado* jusyesyene soni gakudula mnope. Jwalakwe jwawugwile libotololyo mwakwamba kulikasa kukamwa kwakwe ni jwatandite kumtaga Yesu mawutago mumtwe. 4 Pelepo ŵane ŵatumbile ni ŵatandite kuŵechetana kuti, “Ligongo chichi akonanga mawutaga? 5 Pakuŵa tukasumisye mawutaga mbiya syakupunda madinali 300 soni mbiyasyo ni kwapa ŵandu ŵakulaga.” Myoyo jemanjajo yasakalisye mnope yaŵatesile* jwamkongwejo. 6 Nambo Yesu ŵatite, “Mumleche jwamkongweju. Ligongo chichi mkusaka kumlagasya? Jwalakwejutu andendele yindu yambone. 7 Pakuŵa ŵakulagawo chimtameje nawo ndaŵi syosope, soni mpaka mwatendele yindu yambone ndaŵi jilijose jamkusaka, nambo une ngasimba ni jemanja mpaka kalakala. 8 Jwalakweju atesile yakombwele. Andasile mawutaga pakuchikosechelesya chilu changu kuchisika m’malembe. 9 Nditu ngumsalichisya jemanja kuti, kulikose kwele ngani syambone sichilalichidwa pachilambo chosope, ŵandu chachimkumbuchilaga jwamkongweju pakusala yajwatesile.”

10 Kaneko Yudasi Isikaliyoti, juŵaliji jumo mwa ŵakulijiganya 12 ŵala, jwapite kwa ŵakulolela ŵakutaga mbopesi kuti akakambilane yakumpeleka Yesu kwa jemanjajo. 11 Ŵakulolela ŵakutaga mbopesiwo paŵapikene yeleyi, ŵasangalele nayo mwamti ŵakamulene yakuti champe mbiya syasilifa. Myoyo jwalakwe jwatandite kusosasosa ndaŵi jambone jakuti ampelechele Yesu.

12 Sambano pa lisiku lyandanda lya chisangalalo cha Mikate Jangali Chakusasaŵisya, pa lisiku lyakusapeleka mbopesi ja Pasika, ŵakulijiganya ŵakwe ŵamwusisye jwalakwejo kuti, “Ana akusaka kuti tujawule tukalinganye kwapi malo gakulila Pasika?” 13 Pelepo jwalakwe ŵatumisye ŵakulijiganya ŵakwe ŵaŵili ni kwasalila kuti, “Mjawule mumsindamo. Mwelemo chimkasimane ni mundu ali anyakwile lulo lwa mesi. Mkamkuye jwalakwejo, 14 soni nyumba jachakajinjile, mkamsalile msyene nyumbajo kuti, ‘Mwalimu akuti, “Ana chipinda cha achalendo chili kwapi chele une ngusaka kulila Pasika ni ŵakulijiganya ŵangu?”’ 15 Jwalakwejo chakamlosye jemanja chipinda chekulungwa chamwinani chachikwete yindu yosope yakusosekwa. Mkatulinganyichisye Pasika mwelemo.” 16 Myoyo ŵakulijiganyawo ŵapite kuja kwinjila mumsindamo mwamti yaŵasalile Yesu yila yatendekwe, soni jemanjajo ŵalinganyisye yakusosechela yosope ya Pasika.

17 Chakwigulo, jwalakwe ŵayiche ni ŵakulijiganya ŵakwe 12 ŵala. 18 Paŵatemi mwakusyungulila tebulo ni kulyaga, Yesu ŵatite, “Nditu ngumsalichisya kuti, jumo mwa jemanja jwakulya pampepe ni une, chambeleche.” 19 Jemanjajo ŵatandite kudandawula mnope mwamti jwalijose jwatandite kumwusya jwalakwejo kuti, “Ana kapena ndili une?” 20 Jwalakwejo ŵajanjile jemanjajo kuti, “Ali jumo mwa jemanja, jwangupamba najo yimpepe mu mbalemu. 21 Pakuŵa Mwanache jwa mundu akwawula mpela mugaŵechetele Malemba, nambo akwete likungu* mundu jwakumpeleka Mwanache jwa mundu. Yikaliji chenene kwa mundu jweleju yikaŵe kuti nganapagwa.”

22 Paŵapitilisyaga kulya, Yesu ŵajigele mkate, ŵapopesile, kaneko ŵawugaŵenyegaŵenye ni kwapa ŵakulijiganya ŵakwe, ni ŵasalile kuti, “Mjigale mkatewu mlye. Mkate welewu ukwimila chilu changu.” 23 Kaneko paŵajigele chikapu cha finyo ni kuyamika, ŵapele ŵakulijiganyawo, soni wosope ŵamwele. 24 Ni ŵasalile jemanjajo kuti, “Finyo jweleju jukwimila ‘myasi jangu ja chilangano’ jajichisulula mmalo mwa ŵandu ŵajinji. 25 Nditu ngumsalila jemanja kuti, une ngasimwasoni chakumwa chilichose chakuchipanganya kutyochela ku yisogosi ya mpeleya, mpaka pa lisiku lyele chinjimwa chakumwa chasambano mu Uchimwene wa Mlungu.” 26 Pambesi pakwe ŵajimbile nyimbo syakumchimbichisya Mlungu,* kaneko ŵapite ku Litumbi lya Maolifi.

27 Kaneko Yesu ŵasalile jemanjajo kuti, “Wosopemwe chimundile, pakuŵa Malemba gakusati, ‘Chinjimwulaga jwakuchinga mwamti ngondolo sichibalalikangana.’ 28 Nambo pachinjijimuka, chinjilongolela kwawula ku Galileya.” 29 Nambo Petulo ŵamsalile jwalakwejo kuti, “Atamose wosopeŵa ali ŵatisile, nambo une nganimba natisile.” 30 Pelepo Yesu ŵamsalile jwalakwejo kuti, “Nditu ngumsalichisya kuti lelo, nguti chilo chinochino, tambala mkanalile kaŵili, chimungane katatu kose kuti ngamkumanyilila une.” 31 Nambo jwalakwe jwapitilisye kuŵecheta mwakulimba mtima kuti, “Atamose ali atite kuti chambulaje pampepe ni wawojo nambo une nganimba nakanile ata panandi.” Ŵakulijiganya ŵane wosopewo ŵasasilesoni myoyo.

32 Kaneko Yesu ni ŵakulijiganya ŵakwe ŵayiche mumgunda wa Getisemane, ni jwalakwe ŵasalile jemanjajo kuti, “Mtame kaje apano, une ngusaka ngapopele.” 33 Ni jwalakwe ŵamjigele Petulo, Yakobo soni Yohane. Soni pakuŵa ŵaganichisyaga ya yindu yachiyimtendechele, jwalakwe ŵatandite kulagasika mnope nganisyo, soni kupikana kupweteka mnope mumtima. 34 Jwalakwe ŵasalile jemanjajo kuti, “Mumtima mwangu ngulagasika mnope mwakupundanganya malile. Jemanja mtame apano soni mpitilisye kuŵa mesope.” 35 Paŵapite pasogolo panandi, jwalakwe jwatindiŵele ni kutanda kupopela kuti ndaŵi jakusawusyajo jikayika pa jwalakwejo, naga yili yakomboleka. 36 Ni ŵaŵechete kuti, “Abba,* Atati, yindu yosope yili yakomboleka kwa ŵalakwe. Nguŵenda kuti andyochesye chikapuchi.* Nambope ngaŵa mwakusaka kwangu, nambo mwakusaka kwawo.” 37 Jwalakwe paŵawujile kwa ŵakulijiganya ŵakwe ŵala, ŵasimene ali mkugona, ni ŵamwusisye Petulo kuti, “Simoni, ana mkugona? Ana jemanja nganimŵa mtemi mesope pampepe ni une kwa ndaŵi jamnono? 38 Mŵe mesope soni mpitilisye kupopela, kuti mkagwila mu kulinjidwa. Yisyene, mtima uli wakusachilila, nambo chilu chili changali machili.” 39 Kaneko jwalakwe jwapitesoni kukupopela. Kweleko ŵaŵechetesoni maloŵe galagala. 40 Jwalakwe paŵawujilesoni ŵasimene jemanjajo ali mkugona, ligongo meso gawo gasitopelwe ni lugono, mwamti jemanjajo ŵasoŵile chakuŵecheta. 41 Jwalakwe paŵawujilesoni kwa jemanjajo katatu, ŵawusisye kuti, “Ana yisyene jemanja mkugona soni kupumula pandaŵi mpela ajino? Basi, ndaŵi jikwanile! Mlole! Mwanache jwa mundu akupelechedwa mmyala mwa ŵandu ŵakulemwa. 42 Mjimuche, kwende tujawuleje. Jwakumbeleka jula juŵandichile.”

43 Ali mkuŵecheta yeleyi, Yudasi, jumo mwa ŵakulijiganya ŵakwe 12 ŵala, jwayiche pampepe ni gulu ja ŵandu jili jijigele maupanga* soni yimbonga. Jemanjaji ŵatumidwe ni ŵakulolela ŵakutaga mbopesi, alembi soni achakulungwa. 44 Sambano mundu jwakumpelekajo ŵaliji ali ŵapele ŵanduwo chimanyisyo chiŵakamulene. Jwalakwe jwasalile kuti, “Mundu jwele jutingamkomasye mwachinonyelo,* ni jwelejo, akamkamule ni kwawulaga najo, ngamkulupusya.” 45 Kaneko Yudasi jwapite paŵaliji Yesu ni kuŵecheta kuti, “Labi!” ni ŵamkomasisye mwachinonyelo. 46 Myoyo gulu ja ŵandujo jayiche ni jamkamwile Yesu ni kumtaŵa. 47 Nambo jumo mwa ŵandu ŵaŵaliji ni Yesu, jwaswekwile upanga wakwe ni kukata liwiwi lya kapolo jwa jwamkulungwa jwa ŵakutaga mbopesi. 48 Nambo Yesu ŵajiwusisye gulu ja ŵandujo kuti, “Ligongo chichi jemanja myiche kukungamula une mli mjigele maupanga soni yimbonga mpela ndili jwachiswamba? 49 Lisiku lililyose naŵaga ni jemanja ku nyumba ja Mlungu ni kwiganyaga, nambo jemanja nganimungamula. Nambope, yeleyi yitendekwe kuti yikwanilisye Malemba.”

50 Pelepo ŵakulijiganya ŵakwe wosope ŵamlesile ni kutila. 51 Nambope, mnyamata jwine juŵagambile kuliwunichila nguwo jakwe jambone, ŵatandite kumkuya Yesu chapakuŵandika, mwamti gulu ja ŵandujo jasachile kumkamula. 52 Nambo jwalakwe ŵajilesile nguwo jakwe jila mmyala mwa ŵanduwo ni kutila ali awete chakuwala chamkatipe.*

53 Sambano jemanjaji ŵamjigalile Yesu kwa jwamkulungwa jwa ŵakutaga mbopesi. Kweleko ŵasongangene ŵakulolela ŵakutaga mbopesi, achakulungwa ni alembi. 54 Nambo Petulo ŵaliji mkukuya chapakutalichila mpaka jwayiche m’luŵala lwamkati lwa nyumba ja jwamkulungwa jwa ŵakutaga mbopesi. Jwalakwe jwatemi pampepe ni ŵakutumichila ŵa panyumbapo ni kotaga nawo moto. 55 Sambano ŵakulolela ŵakutaga mbopesi soni wosope ŵa mu Luŵala Lwekulungwa lwa Ayuda, ŵasosagasosaga umboni wakumlambuchisya Yesu ni chakulinga chakuti amwulaje, nambo nganawupata umboni uliwose. 56 Ŵajinji ŵapelekaga maumboni gaunami gakwamba jwalakwe, nambo maumboni gawogo nganigakamulanaga. 57 Nambosoni ŵane ŵajimaga ni kupelekaga umboni waunami wakuti, 58 “Twampikene mundu jweleju ali mkuŵecheta kuti, ‘Chinjigwisya nyumba ja Mlunguji jele jataŵidwe ni makono, soni kwa masiku gatatu chinjitaŵasoni jine jangataŵidwa ni makono.’” 59 Nambope atamose kuti ŵaŵechetaga yeleyi, nambo maumboni gawo nganigakamulanaga.

60 Kaneko jwamkulungwa jwa ŵakutaga mbopesi jwajimi pasikati pawo ni kumwusya Yesu kuti, “Wuli ngamkwanga chilichose? Ana mkuti wuli pa yakuŵecheta ŵanduŵa pakwamba ya mmwejo?” 61 Nambo Yesu ŵagambile kutama jii ngajanga chilichose. Sambano jwamkulungwa jwa ŵakutaga mbopesi jula jwamwusisyesoni jwalakwejo kuti, “Ana mmwejo mli Klistu Mwanache jwa Mlungu Jwamswelajo?” 62 Yesu ŵajanjile kuti, “Elo, ndili une, soni jemanja timchimwona Mwanache jwa mundu ali atemi kumkono wamlyo wamachili soni ali mkwika m’mawunde gakwinani.” 63 Kaneko jwamkulungwa jwa ŵakutaga mbopesi jula jwapapwile yakuwala yakwe, ni jwaŵechete kuti, “Ana tukusosekwasoni umboni wine pelepa? 64 Jemanja mlipikanile mwachimsyene jweleju ali mkunyosya Mlungu. Jamani, akuti wuli pelepa?”* Wosopewo ŵakamulene kuti jwalakwejo akwenela kuwa. 65 Sambano ŵane ŵatandite kumsunila mata soni ŵamsiŵile kungope. Ŵane ŵamputaga yibagela ni kumwusyaga kuti, “Naga mli jwakulochesya, mtusalile, ŵani ŵamputile?” Kaneko asilikali ŵamputile makofi ni kumjigala.

66 Sambano Petulo paŵatemi mu luŵala lwa nyumbajo lwalwaliji pasi, jwayiche msikana jwamasengo jwa jwamkulungwa jwa ŵakutaga mbopesi. 67 Paŵam’weni Petulo ali mkota moto, ŵamlolechesye jwalakwejo ni kumsalila kuti, “Wawojosoni ŵaliji ni Yesu jwa ku Nasaletiju.” 68 Nambo jwalakwe jwakanile kuti, “Une ngangummanyilila mundu jweleju soni ngangupikanichisya yamkuŵechetayo.” Myoyo Petulo jwakopweche ni kwawula pamlango wakwinjilila ku nyumbajo. 69 Ali pelepo, msikana jwamasengo jwam’weni ni jwatandite kwasalila ŵaŵajimi pelepowo kuti, “Ajusoni ali jumo jwa ŵakulijiganya ŵakwe.” 70 Nambo jwalakwe jwakanilesoni. Pali papite kandaŵi kamnono, ŵandu ŵaŵajimi pelepowo ŵatandite kumsalilasoni Petulo kuti, “Nditu, mmwejosoni mli jumo mwa jemanjaji, pakuŵa mkuwoneka kuti mli jwa ku Galileya.” 71 Nambo jwalakwe jwatandite kulitembelela soni kulumbila kuti, “Nditu, ngangummanyilila mundu jwakwambajo!” 72 Ndaŵi jijojo tambala jalisile kaŵili. Pelepo Petulo jwakumbuchile yaŵaŵechete Yesu kuti, “Tambala mkanalile kaŵili, chimungane katatu kose kuti ngamkumanyilila une.” Kaneko jwalakwe yampweteche mnope mumtima mwamti ŵatandite kulila.