Genesesi
8 Sambano Mlungu ŵamkumbuchile Nowa pamo ni yinyama yakwitinji soni yinyama yakulanga yosope yayaliji ni jwalakwe m’chombo mula. Kaneko Mlungu ŵatendekasisye kuti mbungo jipuje pachilambo chapasi, mwamti mesi gatandite kupwa. 2 Malo gakopoka mesi gakusokoka mnope soni yakuwugalila mesi yosope yakwinani yawugaliche mwamti wula jalesile kugwa* kutyochela kwinani. 3 Kaneko mesigo gatandite kunandipilanandipila pachilambo chapasi. Pagamalaga masiku 150, mesigo galiji gali ganondipe. 4 M’mwesi wa 7, pa lisiku lya 17 lya mwesiwo, chombocho chajile kwima penani pa matumbi ga Alalati. 5 Mesigo gapitilisye kupwa mpaka kwika m’mwesi wa 10. M’mwesi wa 10 welewo, pa lisiku lyandanda lya mwesiwo, songa sya matumbi syatandite kuwonechela.
6 Pagamasile masiku 40, Nowa ŵawugwile liwindo lya chombo liŵaŵisile lila. 7 Jwalakwe ŵalikopwesye likungulu kupitila pa liwindopo. Likungululyo lyagambaga guluka pasa pa chombocho ni kuwujilaga mkati mpaka pele mesi gajumwile pachilambo.
8 Kaneko jwalakwe ŵajitumisye ngunda kuti amanyilile naga mesi gapwele pachilambo chapasi. 9 Nambo ngundajo nganijipata malo galigose gakuti jitule. Ni jawujile kwa jwalakwejo ligongo mesi galiji gali gapalipe pachilambo chosope chapasi. Myoyo jwalakwe ŵakopwesye mkono wakwe pasa ni kujijinjisya ngundajo mkati mwa chombo. 10 Jwalakwe ŵajembecheye kwa masiku ganesoni gakwana 7. Ni ŵajikopwesyesoni ngundajo kutyochela m’chombo mula. 11 Ngundajo pajawujile kwa jwalakwe chakwigulo, Nowa ŵajiweni kuti jijigele lisamba lyeŵisi lya chitela cha maolifi kukamwa kwakwe. Pelepo Nowa ŵayimanyi kuti mesi gapwele pachilambo chapasi. 12 Jwalakwe ŵajembecheyesoni masiku gane gakwana 7. Ni ŵajikopwesyesoni ngunda jila, nambo nganijiwujilasoni kwa jwalakwe.
13 Sambano mu chaka cha 601, m’mwesi wandanda wa chakacho soni pa lisiku lyandanda lya mwesiwo, mesi gapwele kwene pachilambo chapasi. Pelepo Nowa ŵawamwile mbali jine ja msakasa wa chombocho, kaneko ŵalolite pasa ni ŵayiweni kuti pachilambo patandite kumula. 14 M’mwesi waŵili, pa lisiku lya 27 lya mwesiwo, pachilambo chapasi paliji pali pajumwile nditu.
15 Sambano Mlungu ŵamsalile Nowa kuti: 16 “Sambano mkopoche m’chombomo pampepe ni ŵamkwenu, ŵanache ŵenu soni achiŵamkwawo ŵa ŵanache ŵenu. 17 Myikoposyesoni m’chombomo yaumi yosope ya mtundu uliwose, yaguluka yosope soni yinyama yosope nambosoni yinyama yosope yakwaŵa pachilambo chapasi. Mtende yeleyi kuti yiŵelekane mnope soni kuti yitupe pachilambo chapasi.”
18 Myoyo Nowa ŵakopweche mu chombo mula pampepe ni ŵanache ŵakwe ŵachalume, ŵamkwakwe soni achiŵamkwawo ŵa ŵanache ŵakwe. 19 Chaumi chilichose, chinyama chilichose chakwaŵa soni yaguluka yosope ni chilichose chakwenda pachilambo chapasi, yosope yakopweche m’chombomo mwakamulana ni mitundu jakwe. 20 Kaneko Nowa jwataŵile malo gakupelechela mbopesi kwa Yehofa. Ni ŵajigele yine mwa yinyama yosope yakuswejela soni yine mwa yaguluka yosope yakuswejela ni ŵayipeleche mbopesi pamalo gakupelechela mbopesi gala. 21 Pelepo Yehofa ŵatandite kupikana kaliwungo kambone kakusangalasya.* Myoyo Yehofa ŵaŵechete mumtima mwakwe kuti, “Ngasinachitembelelasoni chilambo chapasi ligongo lya yitendo ya ŵandu, pakuŵa nganisyo sya mumtima mwa mundu sikusaŵa syakusakala kutandila pali mwanache. Ngasinjonangasoni yaumi yosope mpela mwandendelemu. 22 Kutandila apano mpaka msogolo chilambo chapasi ngasichileka kukola ndaŵi jakupanda mbeju soni kugowola, ndaŵi jakusisima soni jachitukuka, chawu soni chuku, nambosoni musi ni chilo.”