Ngani Syambone Syaŵalembile Yohane
9 Yesu paŵaliji mkwenda, ŵam’weni mundu jwine juŵaliji jwangalola chipagwile. 2 Myoyo ŵakulijiganya ŵakwe ŵamwusisye jwalakwejo kuti, “Labi, kuti mundu jweleju apagwe jwangalola, ana ni ŵani ŵaŵalemwisye, jwalakweju kapena achinangolo ŵakwe?” 3 Pelepo Yesu ŵajanjile kuti, “Ulemwa wa mundu jweleju kapena wa achinangolo ŵakwe nganiwumtendekasya kuti apagwe jwangalola. Nambo yeleyi yatendekwe kuti masengo ga Mlungu gawonechele. 4 Tukusosekwa kukamula masengo ga Jwele juŵandumile une pakuli chiŵela musi, ligongo chilo chikwika pele mundu nganaŵa akamwile masengo. 5 Pandaŵi jandili m’chilambochi, ndili lilanguka lya chilambo.” 6 Panyuma pakuŵecheta yeleyi, jwalakwe ŵasunile mata pasi ni kuwunya litaka, kaneko ŵapakesye matopego m’meso mwa mundujo. 7 Ni ŵamsalile kuti, “Mjawule mkasukusule ku litanda lya Silowamu” (kugopolela kuti “Kopoka kwa Mesi”). Myoyo mundujo ŵapite ni kuja kusukusula, kaneko ŵawusile ali mkulola.
8 Sambano ŵandu ŵakuŵandikana nawo soni ŵane ŵaŵamanyililaga kuti jwalakwejo ali jwakuŵendaŵenda, ŵatandite kuŵecheta kuti, “Ana mundu jweleju, ngaŵa ni juŵatamaga pasi ni kuŵendagaŵendaga jula?” 9 Ŵandu ŵane ŵaŵechetaga kuti, “Ni jujuju.” Nambo ŵane ŵaŵechetaga kuti, “Nganaŵa, agambile kulandana najo.” Mundujo jwaliji mkwajanga kuti, “Nditu, ni unejo.” 10 Myoyo jemanjajo ŵamwusisye kuti, “Sano yikomboleche uli kuti mtande kulola?” 11 Jwalakwe ŵajanjile kuti, “Mundu jwine lina lyakwe Yesu ŵawunyile litaka ni kumbakasya matopego m’meso mwangu. Kaneko ŵasalile kuti, ‘Mjawule ku Silowamu mkasukusule.’ Myoyo napite kuja kusukusula kaneko natandite kulola.” 12 Pelepo jemanjajo ŵamwusisye kuti, “Ana mundu jwelejo ali kwapi?” Jwalakwe ŵatite, “Ngangumanyilila.”
13 Ŵanduwo ŵamjigele mundu juŵaliji jwangalolajo ni kwawula najo kwa Afalisi. 14 Yagambile kutendekwasoni kuti lisiku lyele Yesu ŵawunyile litaka ni kuwugula meso ga mundujo lyaliji lya Sabata. 15 Myoyo nombenawo Afalisiwo ŵatandite kumwusya mundujo yayatendekwe kuti atande kulola. Jwalakwe ŵajanjile jemanjajo kuti, “Mundujo ŵambakesye matope m’meso mwangu, ni napite kuja kusukusula, kaneko natandite kulola.” 16 Afalisi ŵane ŵatandite kuŵecheta kuti, “Mundu jwelejo nganatyochela kwa Mlungu, ligongo ngakusunga Sabata.” Nambo ŵane ŵaŵechetaga kuti, “Ana mundu jwakulemwa mpaka akombole kutenda yakusimonjesya mpela yeleyi?” Pelepo jemanjajo ŵalekangene nganisyo. 17 Myoyo jemanjajo ŵamwusisyesoni mundu juŵaliji jwangalola jula kuti, “Ana mmwejo mpaka msale yamtuli pakwamba ya jwalakwejo, pakuŵa ni jwatendekasisye kuti meso genu gawuguche?” Mundujo ŵajanjile kuti, “Jwalakwejo ali jwakulochesya.”
18 Nambo Ayuda nganakulupililaga kuti mundujo jwaliji jwangalola soni kuti apano atandite kulola, mpaka ŵaŵilasile achinangolo ŵakwe. 19 Myoyo ŵawusisye kuti, “Ana jweleju ali mwanache jwawo? Soni ana yisyene kuti jwapagwile jwangalola? Sambano yikomboleche uli kuti atande kulola?” 20 Achinangolo ŵakwewo ŵajanjile kuti, “Elo, jweleju ali mwanache jwetu soni jwapagwile jwangalola. 21 Nambo yayitendekwe kuti atande kulola, ngatukuyimanyilila, soni ngatukummanyilila mundu jwamwugwile meso. Amwusye msyenejo, ali jwamkulungwa. Mpaka alijanjile jika.” 22 Achinangolo ŵakwewo ŵaŵechete yeleyi ligongo lyakuti ŵajogopaga Ayuda. Pakuŵa Ayudawo ŵaliji ali akamulene kala kuti jwalijose jwakwitichisya kuti Yesu ali Klistu, mundu jwelejo akusosekwa kumtyosya mu sunagoge. 23 Ni ligongo lyakwe achinangolo ŵakwe ŵala ŵaŵechete kuti, “Ali jwamkulungwa, amwusye msyenejo.”
24 Myoyo jemanjajo ŵamŵilasilesoni mundu juŵaliji jwangalola jula ni kumsalila kuti, “Msale yakuwona pameso pa Mlungu. M’weji tukumanyilila kuti mundu jwejulajo ali jwakulemwa.” 25 Jwalakwe ŵajanjile kuti, “Yakuti jwalakwejo ali jwakulemwa, une nganguyimanyilila. Nambo changumanyilila ni chakuti, naliji jwangalola, ni apano ndandite kulola.” 26 Kaneko jemanjajo ŵamwusisye jwalakwejo kuti, “Ana yaŵele uli kuti mtande kulola? Ana ŵamtesile chichi?” 27 Jwalakwe ŵajanjile jemanjajo kuti, “Nasalile kala, nambo jemanja nganapikanila. Sambano ligongo chichi akusaka kupikanasoni kane? Kapena jemanjasoni akusaka kuŵa ŵakulijiganya ŵakwe?” 28 Pelepo jemanjajo ŵamjanjile mwaukali kuti, “Mmwejo ni ŵamli jwakulijiganya jwa mundu jwelejo, nambo m’weji tuli ŵakulijiganya ŵa Mose. 29 M’we tukumanyilila kuti Mlungu ŵaŵechetaga ni Mose, nambo mundu jweleju ngatukumanyilila kuŵatyochele.” 30 Mundujo ŵajanjile jemanjajo kuti, “Yeleyitu yili yakusimonjesya kwabasi. Jemanja ngakumanyilila kuŵatyochele jwalakwejo, nambo chitamilecho ambugwiletu une meso. 31 Tukumanyilila kuti Mlungu jwangapikanila ŵandu ŵakulemwa, nambo akusapikanila jwalijose jwakusamjogopa Mlungujo soni kutenda yakusaka yakwe. 32 Sonitu, kutandila kalakala nganitupikaneje kuti mundu jwinejwakwe awugwile meso ga mundu juŵapagwile jwangalola. 33 Yikaŵe kuti mundu jweleju nganatyochela kwa Mlungu, ngamkanakombola kutenda chilichose.” 34 Jemanjajo ŵamjanjile jwalakwejo kuti, “Mmwejo mwapagwile mli ŵagumbale ni ulemwa, sambano ana mkutujiganyasoni m’weji?” Kaneko jemanjajo ŵamtyosisye* mundujo.
35 Sambano Yesu ŵapikene yakuti mundu jula amtyosisye. Myoyo paŵasimene najo ŵamwusisye kuti, “Ana mkumkulupilila Mwanache jwa mundu?” 36 Mundujo ŵajanjile kuti, “Chonde asalile kuti namkulupilile. Ana jwelejo ali ŵani?” 37 Yesu ŵatite, “Mmwejo mum’weni kala, soni ni jwamkuŵechetana najoju.” 38 Mundujo ŵatite, “Ambuje, ngwakulupilila.” Pelepo mundujo ŵamtindiŵalile Yesu. 39 Kaneko Yesu ŵaŵechete kuti, “Une nayiche pa chilambo kuti ŵandu alamulidwe, kuti ŵandu ŵangalola atande kulola soni ŵandu ŵakulola aŵe ŵangalola.” 40 Afalisi ŵane ŵaŵaliji pelepo paŵapikene yindu yeleyi, ŵamwusisye jwalakwejo kuti, “Ana mkuganisya kuti m’wejisoni tuli ŵangalola?” 41 Yesu ŵajanjile jemanjajo kuti, “Yikaŵe kuti jemanja mli ŵangalola, ngamkanimŵa ŵakulemwa. Nambo ligongo lyakuti mkuŵecheta kuti, ‘Tukusalola,’ nikuti mli ŵakulemwa.”