Esala

1 M’chaka chandanda cha ulamusi wa Mwenye Kolesi jwa ku Pelesiya, Yehofa ŵalimbikasisye mtima wa Mwenye Kolesi kuti ajenesye utenga mu ulamusi wakwe wosope. Jwalakwe ŵatesile yeleyi kuti maloŵe gaŵaŵechete Yehofa kupitila mwa Yelemiya gakwanilichikwe. Mwenyewo ŵawulembilesoni utengawo. Utenga wakwe waliji wakuti:

2 “Ayi ni yakuŵecheta Kolesi mwenye jwa ku Pelesiya, ‘Yehofa Mlungu jwakwinani ambele une maulamusi gosope ga pachilambo chapasi. Jwalakwejo andumilesoni kuti ngamtaŵile nyumba jakwe ku Yelusalemu m’chilambo cha Yuda. 3 Jwalijose jwali mu gulu ja ŵandu ŵakusamtumichila jwalakwe, Mlungujo ampe upile jwalakwejo, soni amkunde kuti ajawule ku Yelusalemu m’chilambo cha Yuda. Ajawule kweleko kuti akajitaŵesoni nyumba ja Yehofa Mlungu jwa Ayisalayeli, jwali Mlungu jusyesyene, jwele nyumba jakwe jaliji ku Yelusalemuko.* 4 Mundu jwalijose jwakutama mpela mlendo, kulikose kwakutamako, ŵandu ŵakuŵandikana nawo amkamuchisye jwalakwejo. Amkamuchisye mwakumpa silifa, golide, katundu jwawo jwine, soni yilango. Pampepe ni yindu yeleyi, ampesoni yindu yine yakuti akayipeleche ku nyumba ja Mlungu jusyesyene ku Yelusalemu mpela mbopesi syakusapeleka mundu mwakusaka kwakwe.’”

5 Pelepo ŵakulongolela m’maŵasa gakumanyika ni mena ga achinangolo ŵawo ŵa mu mbumba* ja Yuda soni mu mbumba ja Benjamini, nambosoni ŵakutaga mbopesi ni Alefi, kwamba kuti jwalijose juŵamlimbikasisye Mlungu jusyesyene, ŵakoseche kuti ajawule akajitaŵesoni nyumba ja Yehofa ku Yelusalemu. 6 Ŵandu wosope ŵakuŵandikana nawo ŵakamuchisye jemanjajo mwakwapa* yiwiya* ya silifa, yiwiya ya golide, jwine mwa katundu jwawo, yilango soni yindu yine yamtengo wapenani. Konjechesya pelepa, ŵapelesoni yindu yine yakuti akayipeleche mpela mbopesi syakusapeleka mundu mwakusaka kwakwe.

7 Nombenajo Mwenye Kolesi ŵayiwuchisye yiwiya ya m’nyumba ja Yehofa yaŵajigele Nebukadinesala kutyochela ku Yelusalemu ni kuyiŵika m’nyumba ja mlungu jwakwe. 8 Kolesi mwenye jwa ku Pelesiya ŵamtumile Mitiledati juŵaliji jwakusunga chipanje kuti ayikoposye yinduyo, kaneko jwalakwe ŵayiŵalasile ni kuyipeleka kwa Sesibasala,* jwakulongolela jwa mu mbumba ja Yuda.

9 Sambano kuŵalanjila kwa yinduyo kwajesile chamti myi: yiwiya yagolide yakuwoneka mpela lukalala* yakwanile 30, yiwiya yasilifa yakuwoneka mpela lukalala yakwanile 1,000, yiwiya yinesoni yakuwoneka mpela lukalala yakwanile 29, 10 mbale syamwana syamsimbo syagolide syakwanile 30, mbale syamwana syamsimbo syasilifa syakwanile 410, soni yiwiya yine yakwanile 1,000. 11 Yiwiya yosope yagolide soni yasilifa yapali 5,400. Sesibasala ŵayiche nayo yindu yosope yeneyi ku Yelusalemu pandaŵi jaŵatyokaga ŵandu ku ukapolo ku Babulo kuwujila ku Yelusalemuko.