Genesesi

30 Sambano Lakele paŵayiweni kuti nganamŵelechela Yakobo ŵanache, ŵatandite kumtendela jelasi mkulugwe jula. Lakele ŵagambaga kumsalila Yakobo kuti, “Mumbe ŵanache, soni naga ngamumba bola ngambe kuwa.” 2 Pelepo Yakobo ŵapile mtima mnope ligongo lya yaŵaŵechete Lakele, mwamti ŵamjanjile kuti, “Ana une ndili Mlungu jwakumlepelekasya mmwejo kuŵelekajo?” 3 Myoyo jwalakwe ŵatite, “Amjigale Biliha kapolo jwangu jwamkongweju kuti agone najo ni chakulinga chakuti ambelechele une ŵanache. Nambosoni kuti kupitila mwa jwalakweju unesoni ngole ŵanache.” 4 Pelepo jwalakwe ŵamjigele Biliha jwamasengo jwakwe jula, ni kumpeleka kwa Yakobo kuti aŵe ŵamkwakwe, mwamti Yakobo ŵagonile najo. 5 Biliha ŵakwete msigo mwamti mkupita kwandaŵi ŵamŵelechele Yakobo mwanache jwamlume. 6 Pelepo Lakele ŵatite, “Mlungu aŵele mpela jwakuwelusya jwangu soni agapikene maloŵe gangu, mwamti jwalakwe ambele mwanache jwamlume.” Ni ligongo lyakwe jwalakwe ŵampele mwanachejo lina lyakuti Dani.* 7 Biliha, jwamasengo jwa Lakele jula, ŵakwetesoni msigo wine mwamti mkupita kwa ndaŵi ŵamŵelechele Yakobo mwanache jwamlume jwaŵili. 8 Pelepo Lakele ŵatite, “Une limbene mwamachili ni mkulugwangu. Mwamti mbundile pakulimbanako.” Myoyo jwalakwe ŵampele mwanachejo lina lyakuti Nafitali.*

9 Sambano Leya paŵayiweni kuti alesile kuŵeleka ŵanache, ŵamjigele Silipa jwamasengo jwakwe ni kumpeleka kwa Yakobo kuti aŵe ŵamkwakwe. 10 Mkupita kwa ndaŵi Silipa, jwamasengo jwa Leya jula, ŵamŵelechele Yakobo mwanache jwamlume. 11 Pelepo Leya ŵatite, “Ngwete upile.” Myoyo ŵampele mwanachejo lina lyakuti Gadi.* 12 Panyuma pakwe Silipa, jwamasengo jwa Leya jula, ŵamŵelechele Yakobo mwanache jwamlume jwaŵili. 13 Pelepo Leya ŵatite, “Ndili jwakusangalala mnope, pakuŵa sambano achakongwe changolanjeje kuti jwana upile.” Myoyo jwalakwe ŵampele mwanachejo lina lyakuti Aseli.*

14 Sambano Lubeni ŵaliji mkwenda mwitinji mundaŵi jagowola tiligu. Kaneko jwalakwe ali mwitinjimo ŵapatile mandeleki.* Myoyo jwalakwe ŵagajigele ni kwawula nago kwa Leya ŵaŵaliji mamagwe. Kaneko Lakele ŵamŵendile Leya kuti, “Chonde mungayile mandeleki gajigele mwanache jwenujo.” 15 Myoyo Leya ŵamjanjile jwalakwejo kuti, “Ana mkujiwona mpela ngani jamwana kuti mmwejo mwasumwile ŵamkwangu? Sambano apa mkusakasoni kusumula mandeleki ga mwanache jwangu?” Pelepo Lakele ŵatite, “Chambone. Ni tujile myi, lelo ŵalumeŵa chakagone kumangwenu kuti tuchenganye ni mandeleki ga mwanache jwenuju.”

16 Kaneko Yakobo paŵatyochelaga kumigunda ligulo, Leya ŵapite kuja kumchingamila jwalakwe niŵatite, “Lelo wawo chagone ni une ligongo nasumile ni mandeleki ga mwanache jwangu.” Myoyo chilo chelecho Yakobo ŵagonile ni Leya. 17 Sambano Mlungu ŵampikanile Leya soni ŵajanjile yajwaŵendile mwamti jwalakwe ŵakwete msigo soni panyuma pakwe ŵamŵelechele Yakobo mwanache jwamlume jwamsano. 18 Pelepo Leya ŵatite, “Mlungu ambele une malipilo gangu ligongo namjigele jwamasengo jwangu ni kumpeleka kwa ŵamkwangu.” Myoyo jwalakwe ŵampele mwanachejo lina lyakuti Isakala.* 19 Kaneko Leya ŵakwetesoni msigo wine mwamti panyuma pakwe ŵamŵelechele Yakobo mwanache jwamlume jwa 6. 20 Sambano Leya ŵatite, “Mlungu ambele une mtuka wambone, apatu sambano ŵamkwangu chatande kunonyela mnope pakuŵa naŵelechele ŵanache ŵachalume ŵakwana 6.” Myoyo jwalakwe ŵampele mwanachejo lina lyakuti Sebuloni.* 21 Panyuma pakwe jwalakwe ŵaŵeleche mwanache jwamkongwe ni ŵampele lina lyakuti Dina.

22 Pambesi pakwe Mlungu ŵamkumbuchile Lakele, mwamti Mlungujo ŵampikanile jwalakwe soni ŵamjanjile yaŵaŵendile mwakumtendekasya kuti akole msigo. 23 Panyuma pakwe jwalakwe ŵakwete msigo mwamti ŵaŵeleche mwanache jwamlume. Kaneko jwalakwe ŵatite, “Mlungu atyosisye kunyoseka kwangu.” 24 Myoyo jwalakwe ŵampele mwanachejo lina lyakuti Yosefe,* ni jwaŵechete kuti, “Yehofa anjonjechesyesoni mwanache jwine jwamlume.”

25 Lakele paŵagambile kuŵeleka Yosefe, Yakobo ŵamsalile Labani kuti, “Angunde kuti njawuleje sambano ku chilambo cha kumangwetu. 26 Ambe achiŵamkwangu soni ŵanache ŵangu ŵele napatile ligongo lyakwatumichila wawojo. Ngusaka njawuleje pakuŵa wawojo akumanyilila yambele ndili mkutenda pakwatumichila.” 27 Pelepo Labani ŵamjanjile jwalakwe kuti, “Naga mpaka musalalile mtima, chonde mkatyoka. Unetu mbatile umboni* wakulosya kuti Yehofa akumba upile ligongo lya mmwejo.” 28 Labani ŵaŵechetesoni kuti, “Msale malipilo genu soni une chinampe.” 29 Myoyo Yakobo ŵamjanjile jwalakwe kuti, “Wawojo akumanyilila yandite pakwatumichila soni yandesile pakuyisamalila chenene yilango yawo. 30 Une mkanimbe kwika akuno wawojo ŵakwete yindu yamnono. Aloletu sambano apano yilango yawo yili yejinji soni yitupile mnope. Sonitu panagambile kwika uneji, Yehofa ŵapele wawojo upile wekulungwa. Sambano ana une chinjilijimila pajika chakachi kuti ndende yindu ya panyumba jangu?”

31 Kaneko Labani ŵamwusisye kuti, “Sambano mkusaka nampe chichi?” Pelepo Yakobo ŵajanjile kuti, “Akamba chilichose. Nambo naga akundendela chindu changusaka kuŵendachi une chinjipitilisya kusamalila ngondolo syawo ni kusilolela. 32 Lelo chinjende pasikati pa ngondolo syawo syosope. Wawojo akatyosye ni kusiŵika pajika ngondolo syosope syasili syamadondomadondo soni syosope syasili syamaŵalamaŵala. Nambosoni akaŵiche pajika ngondolo syamwanamwana syelume syasili syepiliwu. Akatyosyesoni ni kusiŵika pajika mbusi syosope syekongwe syasili syamaŵalamaŵala soni syamadondomadondo. Panyuma pakwe, syosope syasipagweje sya mtundu watyosisyewu ni gachigaŵeje malipilo gangu. 33 Chilungamo changu chichiwonechela* chenene palisiku lyele wawojo chachiyika kukulola malipilo gangu. Pa mbusi syosope syekongwe naga chachijisimana jine jangali madondomadondo kapena jine jangali maŵalamaŵala, soni pa ngondolo syosope naga chachijisimana jine janganijiŵa jepiliwu ni kuti jelejo ndesile kwiŵa.”

34 Pelepo Labani ŵajanjile kuti, “Pelepotu ni yili chenene. Basi yiŵe mumŵechetelemo.” 35 Myoyo palisiku lyelelyo Labani ŵatyosisye ni kusiŵika pajika mbusi syosope syelume syamiselemisele soni syamaŵalamaŵala. Ŵaŵisilesoni pajika mbusi syosope syekongwe syamadondomadondo soni syamaŵalamaŵala. Jwalakwe ŵatyosisyesoni ni kusiŵika pajika ngondolo syosope syamwanamwana syelume syasyaliji syeswela soni syepiliwu. Kaneko ŵapele ŵanache ŵakwe kuti asisamalileje. 36 Panyuma pakwe Labani ŵayijigele yilango yakwe ni kwawula nayo kumalo kwakwaliji palutando lyakwenda masiku gatatu kutyochela kuŵaliji Yakobo. Nambo Yakobo ŵapitilisye kusamalila yilango ya Labani yayasigeleyo.

37 Kaneko Yakobo ŵajigele tutela tweŵisi twa sitolakisi,* alimondi* soni twa pulane.* Ni ŵatugwagulaga tutelato pane ni pane kuti chitimatima chamkati chiwonecheleje. 38 Kaneko jwalakwe ŵajigele tutela tuŵatugwagwileto ni kutuŵika mungalande soni mu yindu yine yakumwela yilango. Ŵatendaga yeleyi ni chakulinga chakuti yinyamayo payiyiche kukumwa mesi ni kulola tutelato yimemesyeje.

39 Myoyo yilangoyo payilolite tutelato yatandaga kumemesya mwamti panyuma pakwe yaŵelekaga ŵanache ŵamiselamisela, ŵamadondomadondo soni ŵamaŵalamaŵala. 40 Kaneko Yakobo ŵajigele ngondolo syamwana syelume ni kusiŵika pajika. Kaneko ŵasiŵisilesoni pajika ngondolo syosope syamiselemisele soni syepiliwu syasyaliji pasikati pa ngondolo sya Labani. Ni ŵasigalawisye ngondolo syakusigala sya Labanisyo kuti silolegane ni ngondolo syamiselemisele soni syepiliwu sila. Myoyo Yakobo ŵayiŵisile pajika yilango yakweyo, mwamti nganayipwatikanya ni yilango ya Labani. 41 Yilango yakwimbala payitandite kumemesya Yakobo ŵajigalaga tutela tula ni kutuŵika mungalande chakusogolo kwa yilangoyo. Ŵatendaga yeleyi ni chakulinga chakuti yimemesyeje yili mkulola tutelato. 42 Nambo naga yilangoyo yili yaganda jwalakwe nganaŵikaga tutelato mungalande mula. Myoyo yilango yosope yagandayo yaŵaga ya Labani, nambo yakwimbalayo ni yayaŵaga ya Yakobo.

43 Myoyo Yakobo ŵasichile mnope mwamti ŵakwete magulu ga ngondolo gejinji soni ŵakwete ŵamasengo ŵachalume ni ŵachakongwe nambosoni ngamila ni abulu.