Nehemiya

9 Palisiku lya 24 lya mwesi welewu, Ayisalayeli ŵasongene pampepe. Jemanjaji ŵalijimaga kulya ali awete yiguduli soni ali alitasile luwundu. 2 Kaneko Ayisalayeli wosope ŵalilekangenye ni ŵandu ŵamitundu jine josope. Jemanjaji ŵajimi ni kutanda kusala yakulemwa yawo soni yakulemwa ya achinangolo ŵawo. 3 Kaneko jemanjajo ŵajimi m’malo gawo ni kuŵalanga mwakwesya maloŵe buku ja Chilamusi cha Yehofa Mlungu jwawo kwa maawala gatatu. Nambosoni kwa maawala gane gatatu, ŵasasile yakulemwa yawo ni kumtindiŵalilaga Yehofa Mlungu jwawo.

4 Sambano Yesuwa, Bani, Kadimiyele, Sebaniya, Buni, Selebiya, Bani soni Kenani ŵajimi pa sanja ja Alefi ni kutanda kuŵecheta mwagumila kwa Yehofa Mlungu jwawo. 5 Kaneko Yesuwa, Kadimiyele, Bani, Hasabineya, Selebiya, Hodiya, Sebaniya soni Petahiya ŵaŵaliji Alefi ŵatite, “Ajime, soni amchimbichisye Yehofa Mlungu jwawo, kutandila apano mpaka kalakala. Wawo Mlungu ŵakunde jemanjaji kuti alichimbichisye lina lyawo lyakuchimbichika soni lyalili lyekulungwa kupunda upile soni uchimbichimbi uliwose wampaka ŵandu apeleche.

6 “Wawo Yehofa jika, ŵapanganyisye kwinani, elo, kwinani kwa kwinani mnopeko soni yosope yayili kweleko. Ŵapanganyisyesoni chilambo ni yosope yayili pachilambopo, nambosoni ŵapanganyisye nyasa ni yosope yayili mwelemo. Akusayisunga ni umi yindu yosopeyi, soni yindu yosope yakwinani yikwatindiŵalila wawojo. 7 Wawo ali Yehofa Mlungu jusyesyene, jwele ŵamsagwile Abulamu soni ŵamkopwesye jwalakwe mu msinda wa Uli wa Kalideya. Nambosoni ŵampele jwalakwejo lina lyakuti Abulahamu. 8 Wawo ŵawuweni mtima wa jwalakwe kuti uli wakulupichika pameso pawo. Myoyo wawojo ŵatesile chilanga ni jwalakwe kuti chachimpa jwalakwejo pampepe ni ŵanache ŵakwe chilambo cha Akanani, Ahiti, Aamoli, Apelesi, Ayebusi soni cha Agiligasi. Wawo ŵatesile yaŵaŵecheteyi, ligongo lyakuti wawojo ali ŵakulungama.

9 “Myoyo wawo ŵakuweni kulagasika kwa achinangolo ŵetu ku Iguputo, soni ŵapikene kulila kwawo pa Nyasa Jechejewu. 10 Kaneko wawo ŵatesile yimanyisyo soni yakusimonjesya kuti ampe chilango* Falawo, ŵakutumichila ŵakwe wosope soni ŵandu wosope ŵa m’chilambocho. Wawo ŵatesile yeleyi ligongo ŵamanyilile kuti jemanjaji atesile yindu yakulikwesya paŵalagasyaga ŵandu wawo. Pelepo wawo ŵalipanganyichisye lina lyalili lyakumanyika mpaka lelojino. 11 Wawo ŵajigaŵenye nyasa pameso pa ŵandu ŵawo kuti jemanjajo ajomboche pejumu. Soni ŵandu ŵaŵakuyaga jemanjajo ŵatiŵisye m’mesi gakusokoka mpela yakusati mundu pakuponya liganga pamesi gakusokoka pagakutenda matumbela gamachili. 12 Musi, wawojo ŵalongolelaga jemanjaji pakamulichisya masengo liwunde lyakwima mpela chipilala. Soni chilo ŵalongolelaga jemanjaji pakamulichisya masengo moto wakwima mpela chipilala kuti wamulichileje litala lyakusosekwa kupita. 13 Wawojo ŵatulwiche pa Litumbi lya Sinai ni kuŵechetana ni jemanjaji kutyochela kwinani. Soni ŵapele jemanjaji malamusi gachilungamo soni gasyesyene,* ŵapele malangiso gambone soni yakusosekwa kutenda. 14 Ŵatesile yakuti jemanjaji amanyilile kuti lisiku lyawo lya sabata lili lyapadela. Ŵapelesoni jemanjaji yindu yakusosekwa kuti akuyeje soni Chilamusi chaŵapeleche kupitila mwa jwakutumichila jwawo Mose. 15 Wawo ŵapele jemanjaji mkate* kutyochela kwinani pandaŵi jiŵaliji ni sala, soni ŵapele mesi kutyochela mu lwala pandaŵi jiŵaliji ni njota. Ŵasalilesoni jemanjaji kuti ajinjile ni kuchijigala chilambo chele wawojo ŵalumbile kuti chachapa.

16 “Nambo jemanjaji, achinangolo ŵetuŵa, ŵatesile yindu mwakulikwesya, soni ŵajumwisye mitima jawo. Nambosoni nganapikanila yindu yaŵalamwile. 17 Jemanjaji ŵakanile kupikanila, nganakumbuchila yindu yekulungwa yele wawojo ŵatendele, mwamti ŵajumwisye mitima jawo. Soni ŵasagwile jwakwalongolela kuti awujile ku ukapolo ku Iguputo. Nambo wawo ali Mlungu jwakoseka kukululuchila, ŵambone mtima soni ŵachanasa. Wawo ali ŵangatumbila chitema soni chinonyelo chawo chakulupichika chili chekulungwa, mwamti wawojo nganiŵajasa jemanjaji. 18 Jemanjaji ŵalipanganyichisye chiwanichisyo cha chisyano cha mwanache jwa ng’ombe ni kuŵechetaga kuti, ‘Jemanja Ayisalayeli, aju ni Mlungu jwenu juŵamkopwesye jemanja m’chilambo cha Iguputo.’ Chelechitu chaliji chipongwe chekulungwa. 19 Nambo atamose yaliji myoyo, ligongo lyakuti wawojo ali ŵachanasa nganiŵaleka jemanjaji pandaŵi jiŵaliji m’chipululu. Mwamti liwunde lyakwima mpela chipilala lila lyele lyalyalongolelaga jemanjajo musi litala lyakuti apite nganilityoka. Soni moto wakwima mpela chipilala wawamulichilaga chilo palitala lyakuti apite nganiwutyoka. 20 Wawo ŵapele jemanjaji msimu wawo wambone kuti aŵe ŵalunda. Nganiŵajima jemanjaji mana kuti apate yakulya, soni ŵapele jamanjaji mesi pandaŵi jiŵaliji ni njota. 21 Kwa yaka 40 yele jemanjaji ŵaliji m’chipululu wawo ŵapele jemanjaji yakulya. Nganasoŵaga kandu. Yakuwala yawo nganiyimala, soni sajo syawo nganisiyimba.

22 “Wawo ŵapele jemanjajo maumwenye soni mitundu ja ŵandu. Ŵagaŵenye jemanjaji malo gakulekanganalekangana ni chakulinga chakuti atameje chilambo cha Sihoni, chachili chilambo cha mwenye Hesiboni, nambosoni chilambo cha Ogi mwenye jwa ku Basana. 23 Wawo ŵatesile yakuti ŵanache ŵa jemanjaji atupe mpela ndondwa sya kwinani. Kaneko wawojo ŵajinjisye jemanjaji m’chilambo chele wawojo ŵasalile achinangolo ŵawo kuti chachijinjila ni kuŵa chawo. 24 Myoyo ŵanache ŵa jemanjajo ŵajinjile m’chilambocho ni kuchijigala kuti chiŵe chawo. Mwamti wawojo ŵagomeche Akanani ŵaŵatamaga m’chilambocho jemanjaji ali mkulola. Soni ŵapeleche Akananiwo mmyala mwa jemanjaji pampepe ni mamwenye gawo soni ŵandu ŵaŵatamaga m’chilambocho kuti atende nawo yiliyose yakusaka. 25 Jemanjaji ŵasumwile misinda soni chilambo chachajila. Nambosoni ŵajigele nyumba syegumbale ni yindu yambone yakulekanganalekangana. Ŵajigelesoni yisima yayaliji yesole kala, migunda ja mipeleya,* migunda ja maolifi soni yitela yejinji ya yisogosi. Myoyo jemanjaji ŵalyaga soni ŵajikutaga mwamti ŵajimbele ni kutanda kusangalala ni umbone wawo wekulungwa.

26 “Nambope jemanjaji nganapikanila soni ŵajimuchile wawojo, nambosoni ŵalesile kukuya Chilamusi chawo. Jemanjaji ŵawuleje ŵakulochesya ŵawo ŵaŵakalamusyaga kuti awujile kwa wawojo, soni ŵatesile yindu yekulungwakulungwa yangachimbichisya wawojo. 27 Ligongo lya yeleyi wawo ŵapeleche jemanjaji mmyala mwa adani ŵawo ŵele ŵalagasyaga. Nambo pasimene ni yakusawusya, jemanjaji ŵalililaga wawojo, mwamti wawojo ŵapikanaga kulila kwawo ali kwinaniko. Wawo ŵapaga jemanjaji ŵandu ŵakuti ŵakulupusye mmyala mwa adani ŵawo.

28 “Nambo adani ŵawo pagambile kuleka kwalagasya, jemanjaji ŵatandilagasoni kutenda yakusakala pameso pawo. Pelepo wawojo ŵalekaga jemanjajo kuti adani ŵawowo ŵalagasyeje. Kaneko jemanjaji ŵawujilagasoni ni kutanda kwalilila wawojo kuti ŵakamuchisye, mwamti wawojo ŵapikanaga kutyochela kwinani soni ŵakulupusyaga jemanjajo mwakuwilisyawilisya ligongo lya chanasa chawo chekulungwa. 29 Atamose kuti wawojo ŵakalamusyaga jemanjajo ni chakulinga chakuti atandilesoni kukuya Chilamusi chawo, nambo jemanjajo ŵatendaga yindu mwakulikwesya mwamti ŵakanaga kupikanila malamusi gawo. Soni jemanjaji ŵatesile yakutindana ni malamusi gawogo. Malamusi gele naga mundu akugakuya akusakola umi. Jemanjaji ŵawugele mawiwi gawo kuti akapikanila wawojo soni ŵajumwisye lukosi lwawo. 30 Kwa yaka yejinji ŵatendaga yindu mwakuwusimana mtima ni jemanjaji, soni ŵapitilisye kwakalamusya pakamulichisya masengo msimu wawo kupitila mwa ŵakulochesya. Nambope jemanjaji ŵakanile kwapikanila wawojo. Pambesi pakwe wawo ŵapeleche jemanjaji mmyala mwa ŵandu ŵa m’yilambo yine. 31 Nambo ligongo lyakuti wawo ali ŵachanasa chekulungwa nganiŵajonanga jemanjaji kapena kwajasa, pakuŵa wawo ali Mlungu jwambone mtima soni jwachanasa.

32 “Sambano wawo Mlungu jwetu, Mlungu jwamkulungwa soni jwamachili, Mlungu jwakutenda yakusimonjesya jwele akusasunga yilanga, soni jwakusalosya chinonyelo chakulupichika, chonde akayinondiya yakusawusya yosope yatusimene nayoyi. Akayinondiya yakusawusya yagasimene nayo mamwenye getu, ŵakulongolela ŵetu, ŵakutaga mbopesi ŵetu, ŵakulochesya ŵetu, achinangolo ŵetu soni yakusawusya yasimene nayo ŵandu ŵawo wosope kutandila m’masiku ga mamwenye ŵa ku Asiliya mpaka kwika lelojino. 33 Wawo aŵele ŵakulungama payindu yosope yatusimene nayo. Soni wawojo atesile yindu mwakulupichika. Nambo m’weji ni ŵatutesile yindu yakusakala. 34 Nambosoni mamwenye getu, ŵakulongolela ŵetu, ŵakutaga mbopesi ŵetu, soni achinangolo ŵetu nganakuya Chilamusi chawo soni nganapikanila yindu yosope yaŵakumbusyaga jemanjaji kuti atendeje. Wawo ŵakalamusyaga jemanjaji ni yindu yeleyi. 35 Atamose pandaŵi jele jemanjaji ŵaliji mu umwenye wawo ni kusangalalaga ni umbone wekulungwa wele wawojo ŵapele jemanjaji. Soni atamose kuti jemanjaji ŵaliji m’chilambo chekulungwa soni chachajila chele wawojo ŵapele, nambope jemanjaji nganiŵatumichila wawojo, soni nganaleka kutenda ndamo syawo syakusakala. 36 Myoyo m’we lelo tuli achikapolo, elo tuli achikapolo, m’chilambo chele wawojo ŵapele achinangolo ŵetu kuti alye yisogosi yakwe soni yindu yambone ya m’chilambocho. 37 Yindu yambone ya m’chilambocho ŵakulya ali mamwenye gele wawojo ŵagaŵisile kuti gatulamulileje m’weji ligongo lya yakulemwa yetu. Jemanjaji akusayilamulila yilu yetu soni yilango yetu mwampaka asachile, mwamti m’weji tukulaga mnope.

38 “Myoyo ligongo lya yindu yosopeyi m’weji tulembile mkamulano wakudalilichika. Mwamti ŵakulongolela ŵetu, Alefi ŵetu, soni ŵakutaga mbopesi ŵetu ajitichisye mwakuwudinda ni chidindo chakudindila.”