Buku Jandanda ja Samuyele

18 Daudi paŵagambile kumalisya kuŵechetana ni Sauli, Yonatani ni Daudi ŵatandite kunonyelana mnope soni ŵaŵele paujakwe, mwamti Yonatani ŵatandite kumnonyela mnope Daudijo mpela yaŵatiga pakulinonyela msyene. 2 Kutandila palisikuli, Sauli jwatesile yakuti Daudi atamejepe ni jwalakwe, mwamti Saulijo nganamkunda Daudi kuwujila ku nyumba ja babagwe. 3 Nambosoni Yonatani ni Daudi ŵatesile chilanga pasikati pawo, ligongo lyakuti Yonatanijo ŵamnonyelaga Daudi mpela yaŵatiga pakulinonyela msyene. 4 Kaneko Yonatani ŵajigele malaja gakwe gakusa gangali makono gaŵawete ni kumpa Daudi. Ŵampelesoni yakuwala yakwe yakungondo, upanga* wakwe, ukunje wakwe, soni lamba jwakwe. 5 Daudi jwatandite kwawula kungondo, mwamti yindu yamjendelaga chenene kulikose kwele Sauli ŵamtumaga jwalakwejo. Myoyo Sauli ŵamŵisile jwalakwejo kuti ŵalongoleleje achalume ŵakuputa ngondo, soni yeleyi yasangalesye ŵandu wosope pampepe ni ŵamasengo ŵa Sauli.

6 Daudi pampepe ni ŵandu ŵane paŵawujaga kutyochela kukwawulaga Afilisiti, achakongwe ŵayikaga kutyochela ku misinda josope ja Ayisalayeli kukusimana ni Mwenye Sauli kwineku ali mkwimba soni kuŵina. Jemanjaji ŵajigalaga kagoma* ali mkwimba mwakusangalala. Ŵajigalagasoni yakwimbila yangonji. 7 Achakongweŵa ŵaliji mkusangalala ni kwimbaga kuti,

8 Nyimboji jamsakalisye mnope Sauli soni jwalakwe ŵatumbile mnope, mwamti jwaŵechete kuti, “Ŵanduŵa akumlapilila Daudi kuti awuleje ŵandu masausande gangaŵalanjika, nambo une akuti mbuleje ŵandu masausandepe. Pelepatu chachisigele kuli kumpa umwenye basi.” 9 Kutandila palisikuli Sauli ŵatandite kumkayichila Daudi ni kumtendelaga jelasi.

10 Palisiku lyakuyichisya msimu wakusakala wakutyochela kwa Mlungu wamkamwile Sauli, mwamti jwalakwe ŵatandite kutenda yindu yakusimonjesya paŵaliji m’nyumba. Pandaŵiji Daudi ŵaliji ali mkwimba nyimbo pakamulichisya masengo chida chakwe changonji chakwimbila mpela mwaŵatendelaga ndaŵi sine syosope. Sauli ŵanyakwile lipanga mmyala mwakwe, 11 ni jwalakwe ŵaliponyisye lipangalyo ni kuliŵechetelaga mumtima mwakwe kuti, “Chinamsome Daudi ni kumtwinyichisya kwipupa.” Nambo Daudi ŵalisyembile lipangalyo kaŵilikose. 12 Panyuma pakwe Sauli ŵatandite kumjogopa Daudi ligongo Yehofa ŵaliji ni Daudijo nambo ŵamlesile Sauli. 13 Myoyo Sauli ŵamtyosisye Daudijo kuti akatamaga najo, ni ŵamtumisye kuti akalongoleleje gulu ja asilikali ja ŵandu 1000, mwamti Daudi jwalongolelaga asilikaliŵa pakwawula kungondo. 14 Yindu yosope yaŵatendaga Daudi yaliji kumjendela chenene, soni Yehofa ŵaliji ni jwalakwe. 15 Sauli paŵayiweni kuti yindu yikumjendela chenene Daudi, ŵatandite kumjogopa mnope. 16 Nambo Ayisalayeli soni Ayuda wosope ŵamnonyelaga Daudi, ligongo jwalakweju ŵalongolelaga jemanjaji kungondo.

17 Kaneko Sauli ŵamsalile Daudi kuti, “Une chinampe mmwejo Melabu mwanache jwangu jwamkongwe jwamkulungwaju kuti aŵe ŵamkwenu. Nambope mkusosekwa kupitilisya kundosya une kuti mli ŵakulimba mtima soni mputeje ngondo sya Yehofa.” Sauli ŵaŵechete yeleyi ligongo mumtima mwakwe ŵaliŵechetelaga kuti, ‘Jwelejutu awulajidwe ni Afilisiti nambo ngaŵaga ni une.’ 18 Pelepo Daudi ŵamwusisye Saulijo kuti, “Ana une ndili ŵani, soni achalongo achimjangu ŵa m’liŵasa lya baba ŵangu mu Isalayeli muno ali ŵani, kuti une mbe akwegwe ŵawo mwenye?” 19 Nambo ndaŵi pajakwanile jakuti mwanache jwamkongwe jwa Sauli lina lyakwe Melabu ampeleche kwa Daudi yasimanikwe kuti Melabu ŵaliji ali ampeleche kala kuti aŵe ŵamkwakwe ŵa Adiliyele jwa ku Mehola.

20 Sambano mwanache jwamkongwe jwa Sauli lina lyakwe Mikala ŵamnonyelaga Daudi. Ŵandu ŵamsalile yeleyi Sauli, mwamti yamsangalesye Saulijo. 21 Myoyo Sauli jwatite, “Une chinampeleche mwananguju kwa Daudi, kuti aŵe mpela chitega kwa jwalakwejo. Chindende yeleyi ni chakulinga chakuti Daudijo awulajidwe ni Afilisiti.” Kaneko Sauli ŵamsalilesoni Daudijo kuti, “Mmwejo ni une* tutende mkamulano wa ulombela lelo.” 22 Nambosoni Sauli ŵalamwile ŵakutumichila ŵakwe kuti, “Mjawule mkaŵechetane ni Daudi pambali soni mkamsalile kuti, ‘Mwenye akusangalala mnope ni mmwejo, soni atamose ŵakutumichila ŵakwe wosope akumnonyela mnope mmwejo. Myoyo mtende mkamulano wa ulombela ni mwenyewo.’” 23 Ŵakutumichila ŵa Sauli paŵamsalile Daudi yeleyi, Daudijo ŵatite, “Ana jemanja mkuyiwona kuti chili chindu chamwana kutenda mkamulano wa ulombela ni mwenye chitamilecho une ndili jwakulaga soni jwakutuluka?” 24 Kaneko ŵakutumichila ŵa Sauli ŵamsalile Saulijo maloŵe gaŵaŵechete Daudi gala.

25 Pelepo Sauli ŵatite, “Mkamsalile Daudijo kuti, ‘Mwenyewo ngakusaka mbiya silisyose syakulowolela. Chakusaka chili mapende gakwana 100 gakusonga gachimkakate kuyalo kwa Afilisiti, ni chakulinga chakuti ŵawuchisye adani ŵa mwenyewo.’” Sauli jwaŵechete yeleyi ligongo ŵasakaga kuti Daudi awulajidwe ni Afilisiti. 26 Myoyo ŵakutumichila ŵakwe ŵala ŵamsalile maloŵega Daudi, soni Daudi ŵasangalele kuti chatende mkamulano wa ulombela ni mwenye. Mkanijikwane ndaŵi jaŵakamulene, 27 Daudi yimpepe ni achalume ŵakwe ŵanyakwiche ni kuja kwawulaga Afilisiti ŵakwana 200. Kaneko jwalakwe ŵayiche nago kwa mwenye mapende gosope gakusonga gaŵakatile kuyalo kwa ŵanduŵa kuti atende mkamulano wa ulombela ni mwenyewo. Myoyo Sauli ŵampela Daudi mwanache jwakwe Mikala kuti aŵe ŵamkwakwe. 28 Sauli ŵamanyilile kuti Yehofa ali ni Daudi soni kuti mwanache jwakwe Mikala akusamnonyela Daudijo. 29 Yeleyi yamtendekasisye Sauli kuti amjogopeje mnope Daudi, soni Daudi ŵaŵele mdani jwa Sauli kwa umi wakwe wosope.

30 Sambano achimlongola ŵa Afilisiti ŵajawulaga kungondo. Nambo paŵajawulagajawulaga kungondo, Daudi ŵagomekaga mnope jemanjajo kwapunda asilikali ŵa Sauli. Mwamti lina lya Daudi lyamanyiche mnope.