Genesesi
45 Pelepo Yosefe jwalepele kulilimbisya pasikati pa ŵamasengo ŵakwe wosope. Myoyo jwalakwe ŵaŵechete mwagumila kuti, “Jwalijose akopoche amuno.” Pandaŵi jele Yosefe ŵaliji mkulimanyikasya kwa achalongo achimjakwe, paliji pangali mundu jwine jwalijose.
2 Kaneko jwalakwe ŵatandite kulila mnope, mwamti Aiguputo soni ŵandu wosope ŵa m’nyumba ja Falawo ŵapikene kulilako. 3 Pambesi pakwe Yosefe ŵasalile achalongo achimjakwewo kuti, “Une ndili Yosefe. Ana baba ŵangu ali chiŵela umi?” Pelepo jemanjajo ŵalepele kumjanga jwalakwejo, ligongo paŵamanyilile kuti jwakuŵechetajo ali Yosefe ŵasimonjile mnope. 4 Myoyo Yosefe ŵasalile achalongo achimjakwewo kuti, “Ambandichile chonde.” Pelepo jemanjajo ŵamŵandichile jwalakwe.
Kaneko jwalakwe ŵatite, “Une ndili Yosefe, mlongo mjenu, jwele jemanja mwamsumisye ku Iguputo. 5 Nambo mkadandawula kapena kwimbana magambo kuti mwasumisye une akuno, pakuŵa Mlungu ni juŵandumisye une akuno kuti longolele ni chakulinga chakuti ngulupusye umi wa ŵandu. 6 Achino chili chaka chaŵili cha sala m’chilambo muno, soni yikwika yaka yine msano yele chikuŵe kwangali kulima kapena kugowola. 7 Nambo Mlungu ŵandumisye une kuti longolele akuno ni chakulinga chakuti mtundu wenu ukamala pachilambo chapasi. Nambosoni kupitila mu litala lyeleli, Mlungu chamkulupusye jemanja mwakusimonjesya mwamti chimtame ni umi. 8 Myoyo ngaŵa kuti jemanja ni ŵamwandumisye akuno. Nambo jwaliji Mlungu jwakuwona. Ŵatesile yeleyi ni chakulinga chakuti asagule une kuŵa nduna jakumkamuchisya Falawo, soni kuti mbe ambuje jwa nyumba jakwe josope nambosoni kuti mbe jwakulolela chilambo chosope cha Iguputo.
9 “Mwujile mwachitema kwa baba ŵangu, ni mkasalile kuti, ‘Ayi ni yaŵechete mwanache jwawo Yosefe. Jwalakwe atite, “Mlungu asagwile une kuti mbe ambuje ŵa chilambo chosope cha Iguputo. Myoyo ayiche kwa une soni akachelewa. 10 Kutandila wawojo, ŵanache ŵawo, yisukulu yawo, ngondolo syawo, ng’ombe syawo soni chilichose chakwete, ayiche nayo ni kutamaga m’chilambo cha Goseni mwakuŵandikana ni une. 11 Une chinjapaga yakulya kweleko pakuŵa yisigele yaka yine msano ya sala. Ligongo naga yeleyi ngayitendekwa, nikuti wawojo soni ŵandu ŵa m’nyumba jawo chachilaga ni sala pampepe ni yindu yosope yakwete.”’ 12 Jemanja pampepe ni Benjamini mpwangaju, mkuyiwona ni meso genu kuti une ni jwanguŵecheta yeleyi kwa jemanja. 13 Myoyo mkasalile baba Ŵangu ya uchimbichimbi wosope wangwete akuno ku Iguputo nambosoni yindu yosope yamyiweni akuno. Sambano mjanguye, mjawule mkajigale baba ŵanguwo ni kwika nawo akuno.”
14 Kaneko jwalakwe ŵamkumbatile Benjamini mpwakwe jula ni kutanda kulila, mwamti nombenajo Benjamini jwatandite kulila ali amkumbatile Yosefe. 15 Kaneko Yosefe ŵakomasisye mwachinonyelo* achalongo achimjakwewo kwineku ali mkulila. Panyuma pakwe achalongo achimjakwewo ŵatandite kuŵechetana najo.
16 Kaneko ngani japikaniche ku nyumba ja Falawo kuti, “Achalongo achimjakwe ŵa Yosefe ayiche.” Falawo pampepe ni ŵakutumichila ŵakwe paŵapikene yeleyi, ŵasangalele mnope. 17 Myoyo Falawo ŵamsalile Yosefe kuti, “Mwasalile achalongo achimjenuwo kuti, ‘Mtende ayi: Mkwesye katundu jwenu pa yinyamayo ni mjawule ku chilambo cha Kanani. 18 Mkajigale baba ŵenu soni ŵandu wosope ŵa m’nyumba jenu ni kwika nawo akuno kwandili une. Une chinjimpa jemanja yindu yambone ya m’chilambo cha Iguputo. Sonitu jemanja chimchilya yindu yambone mnope ya m’chilambochi. 19 Nambosoni ngumlamula kuti mwasalile jemanjajo kuti, ‘Mtende ayi: Mjigale ngolo kutyochela m’chilambo cha Iguputo muno syakuti mkanyakulile ŵanache ŵenu ni achiŵamkwenu, soni ngolo jine mkusosekwa mkajigalile baba ŵenu ni kwika nawo akuno. 20 Ngamkusosekwa kudandawula ya yindu yamkwete, pakuŵa yindu yambone mnope yosope yayili m’chilambo cha Iguputo yili yenu.”’”
21 Pelepo ŵanache ŵa Isalayeli ŵatesile yaŵasalileyo, mwamti Yosefe ŵapele jemanjajo ngolo mwakamulana ni yaŵalamwile Falawo. Ŵapelesoni yakulya yakuti alyeje paulendowo. 22 Jwalakwe ŵampele jwalijose chakuwala chakuti achenjeje, nambo Benjamini ŵampele mbiya syasilifa syakwana 300 soni yakuwala msano yakuti achenjeje. 23 Jwalakwe ŵatumichisyesoni babagwe yindu ayi: abulu 10 ali anyakwile yindu yambone ya m’chilambo cha Iguputo, soni abulu ŵane ŵachakongwe ŵakwana 10 ali anyakwile tiligu soni mkate, nambosoni yakulya yakuti babagwewo akalyeje paulendo. 24 Myoyo jwalakwe ŵasalile achalongo achimjakwewo kuti anyakuche. Nambo jemanjajo paŵanyakukaga, jwalakwe ŵasalile kuti, “Jemanjatu mkakangana mwitala.”
25 Pelepo jemanjajo ŵatyosile ku chilambo cha Iguputo ni kwawula ku chilambo cha Kanani kwa Yakobo, baba ŵawo ŵala. 26 Kaneko jemanjajo ŵasalile baba ŵawowo kuti, “Yosefe ali chiŵela umi, mwamti jwalakwe ali jwakulamulila jwa chilambo chosope cha Iguputo.” Nambo Yakobo nganiyimkwaya mumtima mwakwe yeleyi ligongo jwayiwonaga kuti yili yaunami. 27 Nambo jemanjajo paŵasalile baba ŵawowo maloŵe gosope gaŵaŵechete Yosefe soni baba ŵawowo paŵasiweni ngolo syaŵatumisye Yosefe kuti syanyakule sila, mtima wa Yakobo, baba ŵawowo, watemi mmalo. 28 Pelepo Isalayeli ŵaŵechete mwakwesya maloŵe kuti, “Apa sambano ngulupilile. Nayiweni kuti mwanangu Yosefe ali umi. Ngusosekwa kuti njawule ngamlole mkanimbwe.”