Detulonomo
18 “Ayisalayeli wosope pachachipochelaga malo mpela chipanje chawo, ŵakutaga mbopesi ŵa Chilefi pampepe ni ŵandu wosope ŵa mu mbumba* ja Lefi, ngasapochela malo. Jemanjajo chakalyeje mbopesi syakocha pamoto syakupeleka kwa Yehofa. Mbopesi syelesi sili mbali jakwe jakusapochela jwalakwejo. 2 Myoyo jemanjaji akapochela malo mpela chipanje chawo pasikati pa achalongo achimjawo. Yehofa ni jwali chipanje chawo, mpela muŵaŵechetele msyenejo kwa jemanjajo.
3 “Sambano aji ni mbali jachakapocheleje ŵakutaga mbopesi kutyochela pa mbopesi syachakapelecheje ŵandu: Mundu jwalijose payiche kukupeleka mbopesi, chinga ng’ombe jamkambako kapena ngondolo, akajigaleje chidali, chipundi soni chiwukala ni kuyipeleka kwa jwakutaga mbopesi. 4 Mkajigalejesoni mbeju syenu syandanda kukomala, finyo jwenu jwandanda jwasambano, mawuta genu gandanda gasambano nambosoni ubweya* wa ngondolo syenu wandanda kusenga, ni kuyipeleka yindu yeleyi kwa jwakutaga mbopesi. 5 Mkatendeje yeleyi pakuŵa Yehofa Mlungu jwenu ŵamsagwile Lefi pampepe ni ŵanache ŵakwe ŵachalume kutyochela mu mbumba syenu syosope kuti atumichileje mu lina lya Yehofajo ndaŵi syosope.
6 “Nambo naga jwamlume jwa mu mbumba ja Lefi akusagula kusama mumsinda waŵatamaga pa misinda ja mu Isalayeli mwamti akusaka kuti akatameje kumalo gachakasagule* Yehofa, 7 jwalakwejo mpaka akatumichileje kweleko mu lina lya Yehofa Mlungu jwakwe mpela mwakutendela achalongo achimjakwe wosope ŵali Alefi ŵakutumichila kweleko pameso pa Yehofa. 8 Jwalakwe chakapocheleje yakulya yakulandana ni yakusapochela jemanjajo, atamose kuti jwalakwejo akwete kala mbiya syapatile pasumisye yindu yaŵamlechele achinangolo ŵakwe.
9 “Pachimkajinjile m’chilambo chakumpa Yehofa Mlungu jwenu mkaja kulijiganya yindu yakusakala yakusatenda ŵandu ŵamitundu jine ni kwasyasyaga. 10 Pasikati penu pakaja kusimanikwa mundu jwalijose jwakocha pamoto* mwanache jwakwe jwamlume kapena jwamkongwe, jwakusagamila yamsogolo, jwakutenda yamasenga, jwakulondola chisango soni jwamkomale. 11 Pakaja kusimanikwasoni mundu jwakumloga mjakwe, jwakuŵechetana ni misimu, jwakusala yamsogolo, kapena jwakuwuchisya lunda kwa ŵandu ŵawe. 12 Mundu jwalijose jwakutenda yindu yeleyi ali jwakunyalaya kwa Yehofa, mwamti ligongo lyakuti ŵandu ŵamitundu jine akutenda yakunyalaya yeleyi, Yehofa Mlungu jwenu akwatopola jemanjajo pameso penu. 13 Nambo jemanja mkalolechesyeje kuti mkajakukola ulemwa wine uliwose pameso pa Yehofa Mlungu jwenu.
14 “Ŵandu ŵamitundu jine ŵachimkasumule chilambo chawocho aŵele ali mkwapikanila ŵandu ŵakutenda yamasenga soni ŵakusagamila yamsogolo. Nambo Yehofa Mlungu jwenu ngakusaka kuti jemanja mkatendeje yindu mpela yeleyi. 15 Yehofa Mlungu jwenu chachimsagula jwakulochesya mpela une pasikati pa achalongo achimjenu ni kumpa jemanja. Mkampikanileje jwalakwejo. 16 Yeleyi yichiŵa myoyo pakwanga yamwamŵendile Yehofa Mlungu jwenu ku Holebe kula palisiku lyamwasongene lila. Palisiku lyelelyo mwasasile kuti, ‘Ngatukusakasoni kupikana maloŵe ga Yehofa Mlungu jwetu kapena kuwuwonasoni moto wekulungwawu, ligongo ngatukusaka kuwa.’ 17 Pelepo Yehofa ŵasalile une kuti, ‘Yaŵechete ŵanduŵa yili chenene. 18 Une chinjitendekasya kuti pasikati pawo papagwe* jwakulochesya jwine mpela mmwejo, mwamti chinjiŵika maloŵe gangu mkamwa mwakwe, soni jwalakwejo chachasalila jemanjajo yosope yachinjimlamula. 19 Nditu une chinjimjimba magambo mundu jwalijose jwele ngasapikanila maloŵe gangu gachachiŵechetaga jwalakwejo m’lina lyangu.
20 “‘Naga jwakulochesya akulikwesya mwakuŵecheta m’lina lyangu yindu yanganinamlamula, kapena naga jwalakwe akuŵecheta m’lina lya milungu jine, jwakulochesya jwelejo akusosekwa kuwulajidwa. 21 Nambope, mwine mpaka mliwusye mumtima mwenu kuti, “Ana tuchimanyilila chamtuli kuti Yehofa nganamsalila maloŵe gaŵechetego?” 22 Chimchimanyilila naga yaŵaŵechete jwakulochesyajo m’lina lya Yehofa nganiyikwanilichikwa kapena nganiyitendekwa. Pelepo nikuti maloŵe gaŵaŵechetego nganigatyochela kwa Yehofa. Jwakulochesyajo ŵaŵechete yeleyo ligongo lya kulikwesya. Jwalakwejo ngamkusosekwa kumjogopa.’