Numeli
30 Kaneko Mose ŵasalile ŵakulongolela mbumba* sya Isalayeli kuti, “Ayi ni yalamwile Yehofa. 2 Naga jwamlume atesile chilanga kwa Yehofa kapena naga alumbile kuti chaŵambaleje kutenda yindu yineyakwe, mundujo akwanilisyeje maloŵe gakwe. Jwalakwe akwanilisyeje chilanga chakwe kapena yiliyose yaŵalumbileyo.
3 “Naga jwamkongwe pali jwachinandipile soni pakutama panyumba ja babagwe akutenda chilanga kwa Yehofa, kapena naga alumbile kuti chaŵambaleje kutenda yindu yineyakwe, 4 mwamti babagwe akumpikana pakutenda chilangacho kapena pakulumbila kuti chaŵambaleje kutenda yindu yineyakwe nambo ngakumkanya mwanachejo, pelepo yilanga yosope yatesile mwanachejo nambosoni yiliyose yalumbile kuti chayiŵambalejeyo yichipitilisya kukamula masengo. 5 Nambo naga babagwe akumlekasya papikene yilanga yatesileyo kapena naga akumlekasya yalumbile kuti chayiŵambalejeyo, pelepo yilangayo soni yiliyose yalumbileyo ngasiyipitilisya kukamula masengo. Yehofa chachimkululuchila jwalakwejo ligongo babagwe ni ŵamlekasisye.
6 “Nambope naga jwamkongwejo akulombela ali atesile kala chilanga kapena ali alumbile kala mkanaganichisye chenene, 7 soni naga ŵamkwakwe amanyilile chilanga chiŵatesile ŵakongwecho kapena yaŵalumbileyo nambo ngakwalekasya palisiku lyamanyililelyo, pelepo yilanga yosope yaŵatesile ŵakongwewo soni yiliyose yaŵalumbile kuti chayiŵambalejeyo yichipitilisya kukamula masengo. 8 Nambo naga ŵalumewo ŵalekasisye ŵamkwawowo palisiku lyapikenelyo, pelepo ŵalumewo amasisye yilanga yosope yaŵatesile ŵamkwawowo soni yiliyose yaŵalumbile mkanaganichisye cheneneyo, mwamti Yehofa chachakululuchila ŵakongwewo.
9 “Nambo naga jwamkongwe jwamasije kapena jwamkongwe juŵamlesile ulombela ŵamkwakwe akutenda chilanga, chilanga chilichose chatesilecho achikwanilisyeje.
10 “Nambope naga ŵakongwe, pandaŵi jali paulombela, atesile chilanga kapena naga alumbile kuti chaŵambaleje kutenda yineyakwe, 11 soni naga ŵalume akupikana pakutenda yeleyi nambo ngakwalekasya ŵamkwawowo, pelepo yilanga yosope yatesile ŵakongwewo soni yiliyose yalumbile kuti chayiŵambalejeyo yichipitilisya kukamula masengo. 12 Nambo naga ŵalumewo palisiku lyakupikana yeleyi akumasya yilanga yatesile ŵamkwawowo kapena yiliyose yalumbile ŵamkwawowo kuti chachiŵambala kuyitenda, pelepo yilanga yatesile ŵakongwewo kapena yiliyose yalumbileyo ngasiyikamulasoni masengo. Ligongo lyakuti ŵamkwakwe ni ŵamasisye yeleyi, Yehofa chachakululuchila ŵakongwewo. 13 Pakwamba ya chilanga chilichose chatesile ŵakongwe ŵali paulombela kapena chilichose chalumbile kuti chachiŵambaleje,* ŵamkwawo ni ŵakwete machili gakwitichisya yeleyo kapena kuyikana. 14 Naga ŵalumewo nganiŵakanya ŵamkwawo masiku ni kumalaga, pelepo ni kuti ŵalumewo ŵajitichisye yilanga yosope yatesile ŵakongwewo kapena yosope yalumbile kuti chaŵambaleje kuyitenda. Ligongo lyakuti ŵalumewo nganiŵalekasya ŵamkwawo palisiku lyaŵapikene ali mkutenda chilanga kapena ali mkulumbila, pelepo ni kuti ŵayijitichisye. 15 Nambo naga ŵalumewo akukana yilanga yatesile ŵamkwawo kapena yiliyose yalumbile panyuma palisiku liŵapikene ŵamkwawo ali mkutenda yeleyo, pelepo magambo ga ŵakongwewo gachagwila ŵalume.
16 “Gelega ni malamusi gele Yehofa ŵamlamwile Mose pakwamba ya ŵalume ni ŵamkwawo nambosoni pakwamba ya baba ni mwanache jwakwe jwamkongwe jwakutama najo panyumba jakwe.”