Masalimo
Kwa jwakulongolela nyimbo. Nyimbo ja ŵanache ŵa Kola.
49 Mpikane, jemanja mitundu ja ŵandu.
Mtejele mawiwi, jemanja wosope ŵamkutama pachilambo chapasi,*
2 Chinga ŵakunyoseka kapena ŵakuchimbichika,
Chinga ŵakusichila kapena ŵakulaga.
3 Pakamwa pangu pachiŵecheta yindu ya lunda,
Soni yangusaganichisya mnope mumtima mwangu, yichilosya kuti ndili jwakupikachisya yindu.
4 Chinjitejela liwiwi lyangu kuti mbikanile mwambi walunda.
Chinjisala ndagi jangu pangwimba ni chida chakwimbila.
5 Ana mpaka njogopeje chichi pandaŵi jasimene ni yakusawusya,
Pandaŵi jasyungulilidwe ni ŵandu ŵakusakala* ŵakusaka konanga umi wangu?
6 Ŵandu ŵakusadalila chipanje chawo
Soni ŵakusalikwesya ligongo lyakuti akwete chipanje chejinji,
7 Pangali jwalijose mwa jemanjajo jwampaka amwombole mlongo mjakwe
Kapena kumpa Mlungu malipilo gakumwombolela mlongo mjakwejo,
8 Ligongo mtengo wakuwombolela umi wa mundu uli wakwela mnope
Soni jemanjajo nganaŵa awukombwele mpaka kalakala.
9 Jemanjajo nganaŵa akombwele kumwombola mlongo mjawo kuti apitilisye kutama ni umi mpaka kalakala ngaliwona lisimbo.*
10 Jwalijose akusiŵawona ŵandu ali mkuwa atamose ŵalunda.
Ŵandu ŵakuloŵela soni ŵandu ŵangali lunda wosopewo akusajonasika,
Mwamti akusaleka chipanje chawo ni kujigala ŵane.
11 Jemanjajo mumtima mwawo akusakumbila nyumba syawo sili sitemi mpaka kalakala,
Akusakumbila matenti gawo gali gatemi mpaka ku mibado* jawo josope jamsogolo.
Atamose malo gawo ŵagapele mena gawo.
12 Nambope mundu ngasatama mpaka kalakala atamose kuti ali jwakuchimbichika.
Jwalakwe nganaŵa jwakupunda yinyama yayikusawaga.
13 Mwelemu ni mwayikusaŵela ni ŵandu ŵangali lunda
Nambosoni ni mwayikusaŵelasoni ni ŵandu ŵakusiŵakuya jemanjajo, ŵele ŵakusasangalala ni maloŵe gawo gangali mate. (Selah)
14 Jemanjajo chachijawula ku Malembe* mpela ngondolo jajikwawula kukuwulajidwa.
Chiwa chichalongolela jemanjajo mpela mwakusatendela m’busa pakusilongolela ngondolo.
Ŵandu ŵagoloka mtima chachalamulila jemanjajo kundaŵi.
Jemanjajo chachiwola mwamti ngasawonekasoni.
Kumangwawo kuchiŵa ku Malembe* mmalo mwa majumba gawo gakusalala.
15 Nambo Mlungu chachiwombola une ku machili ga* Malembe,*
Pakuŵa jwalakwe chachinjuwula mwelemo. (Selah)
16 Mkadandawulaga ni mundu jwasichile,
Kapena ligongo lyakuti uchimbichimbi wa nyumba jakwe ukusile,
17 Pakuŵa jwalakwe pachachiwa ngasajigala chine chilichose.
Soni jwalakwe ngasajawula ku malembe yimpepe ni uchimbichimbi wakwe.
18 Pakuŵa jwalakwe pandaŵi jali umi akusalilumba jika.
Mundu pasichile ŵandu akusamchimbichisya.
19 Nambo pambesi pakwe jwalakwe akusajawula kuŵapite achinangolo ŵakwe.
Jwalakwe pampepe ni achinangolo ŵakwewo ngasakuwonasoni kuŵala.
20 Mundu jwangapikanichisya yeleyi atamose aŵe jwakuchimbichika,
Nganaŵa jwakupunda yinyama yayikusawaga.