Ŵakulamula

6 Kaneko Ayisalayeli ŵatandilesoni kutenda yakusakala pameso pa Yehofa. Myoyo Yehofa ŵapeleche jemanjajo kwa Amidiyani, mwamti ŵaŵele mmyala mwa jemanjajo kwa yaka 7. 2 Amidiyani ŵaliji mkwalagasya Ayisalayeli. Ligongo lya Amidiyaniwo, Ayisalayeli ŵalipanganyichisye malo gakuti ajuŵeje m’matumbi, mumbanga, soni m’malo gakusawusya kuti ŵandu ayiche. 3 Ayisalayeli papandile mbeju, Amidiyani, Aamaleki, soni ŵandu ŵakungopokolyuŵa ŵayikaga kukwajimuchila jemanjajo. 4 Jemanjaji ŵayikaga ni kukunga matenti gawo pakukosechela kuti ŵajimuchile Ayisalayeliwo. Ŵajonanjilaga mbeju syawo m’chilambo chosopecho mpaka kuja kwika ku Gasa, mwamti nganiŵalechelaga yakulya yiliyose Ayisalayeli. Nganiŵalechelagasoni atamose ngondolo, ng’ombe kapena bulu. 5 Jemanjajo ŵayikaga ŵajinji mnope mpela sombe. Ŵajigalaga yilango yawo soni matenti gawo. Ŵayikagasoni ni ngamila syawo syejinji syangaŵalanjika. Jemanjajo ŵayikaga ni konanga chilambocho. 6 Ayisalayeliwo ŵalagaga mnope ligongo lya Amidiyaniwo, mwamti Ayisalayeliwo ŵamŵendile Yehofa kuti ŵakamuchisye.

7 Ayisalayeliwo paŵaŵendile kwa Yehofa kuti ŵakamuchisye ligongo lya Amidiyani, 8 Yehofa ŵatumisye jwakulochesya kwa jemanjajo kuti akasalile kuti, “Ayi ni yaŵechete Yehofa Mlungu jwa Ayisalayeli: ‘Une ni ŵanamkopwesye jemanja ku Iguputo, m’chilambo chimwaliji achikapolo. 9 Myoyo une namkulupwisye jemanja mmyala mwa Aiguputo. Namkulupwisyesoni mmyala mwa ŵandu wosope ŵaŵamlagasyaga. Natopwele jemanjaji pameso penu soni nampele jemanja chilambo chawo. 10 Une namsalile jemanja kuti, “Une ndili Yehofa Mlungu jwenu. Mkajitindiŵalilaga* milungu ja Aamoli jajili m’chilambo chamkutamachi.” Nambo jemanja nganimumbikanila.’”

11 Kaneko lilayika lya Yehofa lyayiche ni kutama pasi pa chitela chekulungwa chachaliji ku Ofula. Chitelachi chaliji cha Yowasi chisukulu cha Abi-eseli. Pandaŵiji mwanache jwakwe jwali Gidiyoni, ŵaliji mkuputa tiligu pamalo gakuminyila mipeleya ni chakulinga chakuti Amidiyani akamwona. 12 Kaneko lilayika lya Yehofa lyawonechele kwa jwalakwejo ni kumsalila kuti, “Yehofa ali ni mmwejo, mmwejo msilikali jwamachili.” 13 Pelepo Gidiyoni ŵalisalile lilayikalyo kuti, “Pepanitu ngaŵa chipongwe Ambuje ŵangu. Naga Yehofa ali ni m’weji, ligongo chichi yindu yosopeyi yikututendechela m’weji? Gali kwapi masengo gakwe gosope gakusimonjesya gaŵatusalilaga achinangolo ŵetu? Achinangolo ŵetuŵa ŵatusalilaga m’weji kuti, ‘Yehofa ni juŵatukopwesye m’weji m’chilambo cha Iguputo.’ Nambo sambano Yehofa atulesile soni atupeleche mmyala mwa Amidiyani.” 14 Pelepo Yehofa ŵamlolite jwalakwejo ni kumsalila kuti, “Ni machili gamkwetego mjawule mkakulupusye Ayisalayeli mmyala mwa Amidiyani. Ana jwangumtuma yeleyi ngaŵa une?” 15 Kaneko Gidiyoni ŵajanjile kuti, “Pepanitu Yehofa. Ana uneji mpaka ngombole chamtuli kwakulupusya Ayisalayeli? Liŵasa lyetutu lili lyangapikanika mu mbumba* ja Manase. Soni uneji ndili jwangachimbichika ata panandi m’nyumba ja baba ŵangu.” 16 Nambo Yehofa ŵamsalile jwalakwejo kuti, “Ligongo lyakuti unejo chinjiŵa ni mmwejo, mmwejo chimchikombola kwagomeka Amidiyani mpela kuti mkumgomeka mundu jumo.”

17 Pelepo Gidiyoni ŵatite, “Naga ambweni kuti ndili jwakuŵajilwa mmeso mwawo, andosye une chimanyisyo chakusimichisya kuti wawojo ni ŵakuŵechetana ni une. 18 Chonde akatyoka, ngwisa kaje ngalinganyichisye yakulya.” Myoyo jwalakwe ŵatite, “Chindame panopano mpaka mli m’wusile kweleko.” 19 Kaneko Gidiyoni ŵatyosile ni kuja kuwulaga mwanache jwa mbusi, soni ŵajigele utandi wakwana mlingo umo wa efa* ni kuteleka mkate* wangali yakusasaŵisya. Panyuma pakwe, ŵajigele nyama jila ni kujiŵika m’basiketi soni msusi wa nyamajo ŵawuŵisile m’chipoto. Kaneko ŵajigele yinduyo ni kwika nayo kwa jwalakwejo pasi pa chitela chekulungwa chila.

20 Sambano lilayika lya Mlungu jwakuwona lila lyamsalile Gidiyoni kuti, “Mjigale nyamaji soni mkate wangali yakusasaŵisyawu ni mkaŵiche paliganga lyekulungwa apo nambosoni mtaje msusiwo pelepo.” Pelepo Gidiyoni ŵatesile myoyo. 21 Kaneko lilayika lya Yehofa lila lyakwayiye nyama soni mkate wangali yakusasaŵisya ula ni songa ja ndodo jajaliji mmyala mwakwe. Ndaŵi jijojo paligangalyo pabuchile moto ni kutinisya nyama soni mkate wangali yakusasaŵisyawo. Kaneko lilayika lya Yehofalyo nganiliwonekasoni. 22 Pelepo Gidiyoni ŵamanyilile kuti lyeleli lyaliji lilayika lya Yehofa.

Paŵamanyilile yeleyi Gidiyoni ŵatite, “Jwana likungu une, wawo Yehofa Ambuje Ŵakulungwa Mnope, pakuŵa mbonegene ni lilayika lya Yehofa meso ni meso.” 23 Nambo Yehofa ŵamsalile jwalakwejo kuti, “Mtendele uŵe ni mmwejo. Mkajogopa, mmwejo ngam’wa.” 24 Myoyo Gidiyoni ŵataŵile pelepo malo gakupelechela mbopesi ga Yehofa ni kugapa lina lyakuti Yehofa-salomu. Maloga gakumanyikape ni lina lyeleli mpaka lelo. Malo gakupelechela mbopesiga gapalipe ku Ofula kumalo ga yisukulu ya Abi-eseli.

25 Chilo chichocho Yehofa ŵamsalile jwalakwejo kuti, “Mjigale ng’ombe jamwana jamkambako ja baba ŵenu jila, ng’ombe jakwe jaŵili ja yaka 7 jila. Nambosoni mjawule kumalo ga baba ŵenu gakupelechela mbopesi kwa Baala ni mkagumulanye malogo soni mkagwisye chipilala chapajika* chachili pambali pakwe. 26 Kaneko mtaŵe malo gakupelechela mbopesi kwa Yehofa Mlungu jwenu pamalo gakwelaga mwakwala maganga. Pachimmalisye kutaŵa malogo, mjigale mwanache jwa ng’ombe jwamkambako jwaŵili jula ni kumpeleka mpela mbopesi jakutinisya. Sasu syakwe siŵe masalo ga chipilala chapajika* chamgwisisye chila.” 27 Myoyo Gidiyoni ŵajigele ŵamasengo ŵakwe ŵachalume ŵakwana 10 ni kuja kutenda yaŵamlamwile Yehofa yila. Jwalakwe nganayitenda yeleyi musi, nambo ŵayitesile chilo ligongo ŵajogopaga mnope ŵa m’liŵasa lya babagwe soni achalume ŵa mumsindawo.

28 Achalume ŵa mumsindawo ali ajimwiche kundaŵindaŵipe ŵagaweni malo gakupelechela mbopesi ga Baala ali agagumulenye soni chipilala chapajika* chachaliji pambali pakwe ali achigwisisye. Ŵayiwenisoni kuti pamalogo ataŵile malo gasambano gakupelechela mbopesi soni apeleche kala mbopesi mwanache jwa ng’ombe jwamkambako jwaŵili jula. 29 Kaneko jemanjajo ŵatandite kuwusyana kuti, “Ŵani ŵatesile yeleyi?” Panyuma pakuwungunya ŵatite, “Gidiyoni mwanache jwa Yowasi ni jwatesile yeleyi.” 30 Sambano achalume ŵa mumsindawo ŵamsalile Yowasi kuti, “Myiche najo akuno mwanache jwenujo tumwulaje, ligongo agumulenye malo gakupelechela mbopesi ga Baala. Soni agwisisye chipilala chapajika* chachaliji pambali pakwe.” 31 Pelepo Yowasi ŵawusisye ŵandu wosope ŵaŵamjimuchilewo kuti, “Ana jemanja mkusaka kumchenjela Baala? Ligongo chichi mkusaka kumkulupusya jwalakwejo? Jwalijose jwakumchenjela jwalakwejo akusosekwa kuwulajidwa kundaŵi kunokuno. Msyenejo naga ali mlungu alichenjele jika, pakuŵa mundu jwine agumwile malo gakwe gakupelechela mbopesi.” 32 Myoyo palisiku lyeleli Gidiyoni ŵampele lina lyakuti Yelubala,* pakuŵa Yowasi ŵatite, “Amleche Baala msyenejo alichenjele jika, pakuŵa mundu jwine agumwile malo gakwe gakupelechela mbopesi.”

33 Sambano Amidiyani wosope, Aamaleki nambosoni ŵandu ŵakungopokolyuŵa ŵakamulene mpela gulu jimo kuti akamenyane ngondo ni Ayisalayeli. Myoyo jemanjaji ŵajombweche lusulo kwawula ku Chiŵata* cha Yeseleeli ni kukunga matenti gawo kweleko. 34 Kaneko msimu weswela wa Yehofa watandite kukamula masengo pa Gidiyoni. Myoyo jwalakwe ŵalisisye lipenga lya msengo wa ngondolo mwamti yisukulu ya Abi-eseli yayiche kuti yimkamuchisye. 35 Jwalakwe ŵatumile ŵandu kuti akapeleche utenga kwa ŵandu wosope ŵa mu mbumba ja Manase, mwamti jemanjajosoni ŵayiche kuti amkamuchisye. Ŵatumilesoni ŵandu ŵane kuti akapeleche utenga kwa ŵandu ŵa mu mbumba ja Aseli, Sebuloni, nambosoni kwa ŵandu ŵa mu mbumba ja Nafitali, mwamti ŵandu wosopeŵa ŵayiche kukusimana ni jwalakwejo.

36 Kaneko Gidiyoni ŵamsalile Mlungu jwakuwona kuti, “Naga wawojo chiŵakulupusye Ayisalayeli kupitila mwa une, mpela muŵaŵechetele pandanda pala, 37 ngusaka andosye chimanyisyo. Chimbiche ubweya* wa ngondolo pamalo gakuputila tiliguga. Naga mangame gakutenda pa ubweya pepa nambo pasi posope ni kuŵa pejumu, pelepo chimanyilile kuti wawojo chiŵakulupusye Ayisalayeli kupitila mwa une mpela muŵaŵechetele kala mula.” 38 Yeleyi ni yayatendekwe. Gidiyoni paŵajimwiche kundaŵindaŵipe palisiku lyakuyichisya, ŵaminyile ubweya wa ngondolo wula. Paŵaminyile ubweyawo, pakopweche mesi gamangame gejinji gampaka gagumbale mbale jekulungwa ja msimbo. 39 Nambope Gidiyoni ŵamsalilesoni Mlungu jwakuwona kuti, “Pepanitu akandumbilila mnope. Nambo agambe kungunda kuti naŵendesoni kane. Chonde angunde kuti ngamulichisyesoni masengo ubweya wangondolo ula pakusaka kusimichisya naga wawojo chaŵe ni une. Chonde angunde kuti paulendo awuno mangame gagambe kutenda pasi posope papali ubweyapa, nambo ubweyawu ukatenda mangame.” 40 Yeleyi ni yaŵatesile Mlungu pa chilo chelecho. Pasi posope paŵaŵisile ubweya wa ngondolo ula patesile mangame. Nambo ubweyawo nganiwutenda mangame.