Buku Jandanda ja Samuyele

31 Sambano Afilisiti ŵaliji mkumenyana ni Ayisalayeli, mwamti achalume ŵa Ayisalayeliwo ŵatisile pameso pa Afilisiti soni ŵajinji ŵawulajidwe pa Litumbi lya Gilibowa. 2 Afilisitiwo ŵamkanganiche mnope Sauli pampepe ni ŵanache ŵakwe, mwamti Afisitiwo ŵamwuleje Yonatani, Abinadabu soni Maliki-suwa ŵaŵaliji ŵanache ŵa Saulijo. 3 Ngondojo jamkulile mnope Sauli mwamti ŵakuponya mipamba ŵamsimene jwalakwe soni ŵamwulesye kwakogoya kula. 4 Kaneko Sauli ŵamsalile jwakumnyakulila yida yakwe yangondo kuti, “Mjigale upanga* wenuwo ni musome nawo ni chakulinga chakuti achalume ŵangawumbalaŵa akasimana une ni kusoma ni maupanga gawo, kaneko ni kundendela yindu mwangasa.” Nambo jwakunyakula yida yangondojo nganasaka kutenda yeleyo ligongo jwakwete woga mnope. Myoyo Sauli ŵajigele upangawo ni kuwugwila. 5 Jwakunyakula yida yangondojo paŵayiweni kuti Sauli awile, nombenajo jwajigele upanga wakwe ni kuwugwila mwamti jwawilile papopo yimpepe ni Sauli. 6 Myoyo Sauli jwawile palisiku lyelelyo pampepe ni ŵanache ŵakwe ŵatatu, jwakumnyakulila yida yakwe yangondo soni achalume ŵakwe wosope. 7 Ŵandu ŵa ku Isalayeli ŵaŵatamaga ku madela ga kuchiŵata* soni ku madela ga ku Yolodani, paŵayiweni kuti achalume ŵa ku Isalayeli atisile soni kuti Sauli pampepe ni ŵanache ŵakwe awile, ŵatandite kujileka misinda jawo ni kutilaga. Kaneko Afilisiti ŵayiche ni kutamaga m’misindajo.

8 Lisiku lyakuyichisya, Afilisiti ŵala paŵayiche kukwawula yakuwala ŵandu ŵaŵawulajidwe ŵala, ŵamsimene Sauli pampepe ni ŵanache ŵakwe ŵatatu ali awile pa Litumbi lya Gilibowa. 9 Myoyo jemanjajo ŵakatile mtwe wa Sauli soni ŵamwusile yida yakwe yangondo. Kaneko ŵatumisye maloŵe ku chilambo chosope cha Afilisiti kuti ŵandu kweleko awandisye nganiji ku nyumba sya milungu jawo soni kwa ŵandu wosope. 10 Panyuma pakwe jemanjajo ŵajigele yida yangondo ya Saulijo ni kuyiŵika m’nyumba ja yiwanichisyo ya Asitoleti, soni ŵajigele mtembo wa Saulijo ni kuwukomelela palipupa lya msinda wa Beti-sani. 11 Ŵandu ŵakutama ku Yabesi-giliyadi ŵapikene ya yindu yiŵatesile Afilisiti kwa Sauli. 12 Kaneko achalume wosope ŵakulimba mtima pakuputa ngondo ŵanyakwiche ni kwenda chilo chosope kwawula kukujigala mtembo wa Sauli soni mitembo ja ŵanache ŵakwe jaŵajikomelele palipupa lya msinda wa Beti-sani jila. Jemanjaji ŵawujile ku Yabesi kwaŵajijochile mitembojo ni moto. 13 Kaneko jemanjaji ŵajigele mawupa ga mitembojo ni kuja kugasilila pasi pa chitela cha ukwesu ku Yabesi. Panyuma pakwe jemanjaji ŵalijimile kulya kwa masiku 7.