Nehemiya
5 Nambope, papali achalume pampepe ni achiŵamkwawo ŵele ŵatandite kwadandawula Ayuda achimjawo. 2 Ŵane mwa jemanjaji ŵatandite kuŵecheta kuti, “M’weji pampepe ni ŵanache ŵetu ŵachalume soni ŵachakongwe tutupile. Tukusosekwa kupata yakulya kuti tulye ni chakulinga chakuti tuŵe ni umi.” 3 Nambosoni ŵane ŵaŵechetaga kuti, “Mundaŵi ja sala kuti tupate yakulya, m’weji tukupeleka* migunda jetu ja tiligu soni migunda jetu ja mipeleya* nambosoni nyumba syetu. Tukupelekaga yeleyi kuti uŵe umboni wakulosya kuti tuchiwusya ngongole jatwajigele kwa jemanjaji.” 4 Pele ŵane ŵaŵechetagasoni kuti, “Tupeleche migunda jetu ja tiligu soni migunda jetu ja mipeleya kuti tupate mbiya syakupelechela msongo kwa mwenye. 5 M’wejitu ni jemanjaji tuli ŵampepe soni tuli ŵapaulongo. Ŵanache ŵetu ali mpela ŵanache ŵa jemanjaji. Nambo yikusimanikwa kuti tukwapeleka ŵanache ŵetu kwa jemanjaji kuti aŵe achikapolo, mwamti ŵanache ŵetu ŵane ŵachakongwe ali kala achikapolo. Nambo nganitukola machili gakulekasya yeleyi, pakuŵa migunda jetu ja tiligu soni migunda jetu ja mipeleya jili mmyala mwa ŵandu ŵane.”
6 Une panapikene maloŵe gelega soni kudandawula kwa ŵanduŵa, yasakalisye mnope. 7 Myoyo une najiganichisye chenene nganiji mumtima mwangu. Ni naŵechetene ni ŵandu ŵakuchimbichika soni ŵakulongolela. Nasalile jemanjaji kuti, “Jemanja pamwakongwesye mbiya achalongo achimjenu mkwaŵilasyagasoni mbiya japenani.”
Nambosoni naŵilasisye msongano wekulungwa ligongo lya ngani jeleji. 8 Nasalile jemanjajo kuti, “M’weji tutesile yakomboleka kuti twawombole Ayuda achimjetu ŵele ŵasumisye kumitundu jine. Sano jemanja mkwasumisyasoni achalongo achimjenuŵa kuti m’weji twawombolesoni jemanjajo kutyochela mmyala mwenu?” Pelepo ŵanduwo ŵasoŵile chakwanga, mwamti nganaŵecheta chilichose. 9 Kaneko une nasalile jemanjaji kuti, “Yamkutendayitu nganiyiŵa yambone. Ana jemanja nganimŵa mjesile mwakumjogopa Mlungu jwetu ni chakulinga chakuti ŵandu ŵamitundu jine, ŵali adani ŵetu, akatunyosya m’weji? 10 Une, achalongo achimjangu soni ŵamasengo ŵangu tukwajasima Ayuda achimjetu mbiya soni yakulya, nambo ngatukwaŵilasya kapenani*. Ni chonde kwende tuleche kupochela kapenani patwajasime yindu achalongo achimjetu. 11 Chonde, mwawuchisye jemanjaji lelo pejino migunda jawo ja tiligu, migunda jawo ja mipeleya, migunda jawo ja maolifi soni nyumba syawo. Nambosoni mwawuchisye mbali jimo pa mbali 100 sya mbiya syawo, mbeju syawo, finyo jwawo jwasambano soni mawuta, yamwalamwile jemanjaji kuti apelecheje mpela kapenani.”
12 Pelepo jemanjajo ŵajanjile kuti, “M’we chitwawuchisye jemanjajo yindu yosopeyi soni ngatwaŵilasya kalikose. M’weji chitutende yosope mwakamulana ni yaŵecheteyo.” Myoyo une naŵilasile ŵakutaga mbopesi kuti ŵanduwo alumbile pameso pa jemanjajo kuti chatende yasasileyo. 13 Nambosoni une nakung’undile yakuwala yangu ni kuŵecheta kuti, “Mpela yandite une pakukung’unda yakuwala yanguyi, Mlungu jusyesyene atendesoni yakulandanayi ni mundu jwalijose jwele ngatenda yasasileyi. Mlungu atende yeleyi mwakumtyosya mundujo panyumba jakwe soni pa yindu yakwete. Nambosoni mpela yandite pakukung’unda yakuwalayi amkung’unde jwalakwejo ni kumleka jwangali kandu.” Pelepo ŵandu wosopewo ŵajanjile kuti, “Ame.”* Soni jemanjaji ŵamchimbichisye Yehofa mwamti ŵatesile yaŵasasileyo.
14 Kupwatika pelepa, kutyochela palisiku lyaŵambisile une kuti mbe bwanamkubwa m’chilambo cha Yuda, kutandila mu chaka cha 20 mpaka mu chaka cha 32 cha Mwenye Alitasasita, kwa yaka yakwana 12 yosopeyi, une kapena achalongo achimjangu nganitulya yakulya yakusasosekwa kupochela bwanamkubwa. 15 Nambo achibwanamkubwa ŵakala ŵaŵapali une mkanimbe kuŵa bwanamkubwa, ŵasitopesyaga ŵandu. Soni jemanjaji lisiku lililyose, ŵaŵilasyaga ŵanduwo mbiya syasilifa syakwana masekeli* 40 kuti asumileje mkate soni finyo. Nambosoni ŵamasengo ŵachibwanamkubwawo ŵatendelaga ngasa ŵandu. Nambo une nganindenda yeleyi ligongo lyakumjogopa Mlungu.
16 Konjechesya pelepa, une nakamwile nawo masengo gakutaŵa lutenjelo soni nganitukola mgunda. Nambosoni ŵakutumichila ŵangu wosope ŵasongangene kuti akamule masengogo. 17 Papali Ayuda soni ŵakulongolela ŵakwana 150 ŵaŵalyaga yimpepe ni une. Nambosoni nalyaga yimpepe ni ŵandu ŵamitundu jine ŵaŵayiche kwa m’weji. 18 Lisiku lililyose ŵambulajilaga* ng’ombe jimo, ngondolo syambone syakwana 6 soni yijuni. Nambosoni, panyuma pa masiku 10 galigose twakolaga finyo jwamjinji jwamitundu josope. Atamose kuti yaliji myoyo, nambo une nganimbilasyaga yakulya yaŵasosekwaga kupochela bwanamkubwa ligongo ŵanduwo ŵaliji ali mkukamula kala masengo gakusitopesya. 19 Wawo Mlungu jwangu, chonde angumbuchile une, soni ambe upile pa yindu yosope yanatendele ŵanduŵa.