Buku Jaŵili ja Samuyele
19 Kaneko Yowabu ŵapochele utenga wakuti, “Mwenye akulila, akumlilila Abisalomu.” 2 Myoyo, palisiku lyeleyi kusangalala kwakupunda pangondo kwasandwiche kulila kwa ŵandu wosope, ligongo lyakuti jemanjaji ŵapikene kuti mwenye akumlilila mwanache jwawo. 3 Palisiku lyeleli ŵandu ŵajinjile mu msinda mwangatenda lisegwe mpela mwakusatendela ŵandu ŵakwete sooni ligongo lyakuti atisile kungondo. 4 Mwenyewo ŵasiŵile ngope jawo ni kupitilisyaga kulila mwakwesya maloŵe kuti, “Mwanangu Abisalomu! Abisalomu mwanangu, mwanangu!”
5 Kaneko Yowabu ŵajinjile m’nyumba ja mwenyewo ni ŵasalile kuti, “Lelo ŵatendekasisye sooni ŵakutumichila ŵawo wosope ŵakulupwisye umi wa wawojo lelo, umi wa ŵanache ŵawo ŵachalume ni ŵachakongwe, wa achiŵamkwawo, soni umi wa achiŵamkwawo ŵapambali. 6 Wawojo akwanonyela ŵandu ŵakwaŵenga soni akwaŵenga ŵandu ŵakwanonyela, pakuŵa lelo wawojo alosisye chenenepe kuti ŵakulongolela soni ŵakutumichila ŵawo ali ŵangali mate kwa wawojo, ligongotu une ngusimichisya kuti yikaŵe kuti Abisalomu ali chiŵela umi lelo nambo wosope ŵenewe tuwile, yikaliji chenene kwa wawojo. 7 Sambano ajimuche ni ajawule akatamiche mtima pasi ŵakutumichila ŵawo, ligongo naga ngakutenda yeleyo nditu ngulumbila pameso pa Yehofa, pangali mundu jwachaŵe ni wawojo pakwikanaga chilochi. Yeleyitu chiyiŵe yakupweteka mnope kwa wawojo pakulandanya ni yakusawusya yosope yaŵele ali mkusimana nayo wawojo kutandila ali mnyamata mpaka lelojino.” 8 Myoyo mwenyewo ŵajimwiche ni kuja kutama pa geti ja msinda, kaneko ŵandu wosopewo wasimene utenga wakuti, “Sambano mwenye atemi pachipata.” Kaneko ŵandu wosopewo ŵayiche pameso pa mwenyewo.
Nambo Ayisalayeli ŵaliji ali atisile jwalijose jwatilile ku nyumba jakwe. 9 Kaneko ŵandu wosope ŵa mumbumba syosope sya Isalayeli ŵaliji ali mkukangana kuti, “Mwenye ŵatukulupwisye m’we mmyala mwa adani ŵetu, soni ŵatukulupwisye mmyala mwa Afilisiti, nambo ŵalakwewo atisile m’chilambo muno ligongo lya Abisalomu. 10 Nambosoni Abisalomu jwatwamsagwile kuti atulamulileje awile kungondo. Sambano ligongo chichi ngamkutenda kalikose kuti mwenye awujile?”
11 Kaneko mwenye Daudi ŵatumisye utenga kwa Sadoki soni kwa Abiyatala ŵaŵaliji ŵakutaga mbopesi. Utenga wakwe waliji wakuti, “Mŵechete ni achakulungwakulungwa ŵa Yuda, mwasalile kuti, ‘Kwangutama kuno, une mbikene kuti Ayisalayeli wosope akuŵecheta yakuti une mbujile. Sano ligongo chichi jemanja mkuchelewa kwika kukunjigala kuti mbujile ku nyumba jangu jaumwenye? 12 Jemanjatu mli achalongo achimjangu ŵamyasi jimo. Sano ligongo chichi nganimŵe kwika kukunjigala kuti mbujile?’ 13 Mkasalilesoni Amasa kuti, ‘Ana mmwejo ngati mli mlongomjangu jwamyasi jimo? Myoyo Mlungu ampe chilango* chekulungwa naga mmwejo kutandila lelo ngamŵa jwamkulungwa jwa gulu ja asilikali ŵangu mmalo mwa Yowabu.’”
14 Myoyo jwalakwe jwakopile mitima ja ŵandu wosope ku Yuda, mwamti ŵakamulene chimo. Kaneko ŵatumichisye utenga mwenyewo wakuti, “Awujile yimpepe ni ŵakutumichila ŵawo wosope.”
15 Panyuma pakwe mwenyewo ŵawutandite ulendo wakuwujila, ni ŵayiche pa lusulo lwa Yolodani. Pelepo ŵandu ŵa ku Yuda ŵayiche ku Giligala kuti asimane ni mwenyewo soni kuti ŵapechesye mwenyewo pakomboka lusulo lwa Yolodani. 16 Kaneko Simeyi mwanache jwa Gela jwa mu mbumba ja Benjamini jwakutyochela ku Bahulimu, mwachitemachitema yimpepe ni achalume ŵa ku Yuda ŵapite kuja kusimana ni Mwenye Daudi. 17 Jwalakwe ŵalijisoni yimpepe ni achalume 1000 ŵakutyochela mumbumba ja Benjamini. Nombenajo Siba jwamasengo jwa kunyumba ja Sauli pampepe ni ŵanache ŵakwe 15 soni ŵakutumichila ŵakwe 20 ŵawutuchile ku Yolodani kuti akasimane ni mwenyewo. 18 Jwalakwe* jwajombweche pakombochela kuti ŵajombosye ŵandu ŵa m’nyumba ja mwenye soni kuti atende yiliyose yakusaka mwenye. Nambo mwenyewo paŵasigele panandi komboka lusulo lwa Yolodani, Simeyi mwanache jwa Gela ŵatindiŵele ni kwinama mpaka ngope jakwe pasi pameso pa mwenyewo. 19 Simeyi ŵasalile mwenyewo kuti, “Ambuje ŵangu, chonde akambona une kuŵa jwakulemwa, soni akakumbuchila yakusakala yanatesile une jwakutumichila jwawo pa lisiku lyele wawojo ambuje ŵangu mwenye ŵakopokaga mu Yelusalemu. Chonde wawo mwenye akayikosya yeleyo, 20 pakuŵa une jwakutumichila jwawo ngumanyilila nditu kuti nalemwisye. Myoyo lelo pa ŵandu wosope ŵa m’nyumba ja Yosefe, une ndili jwandanda kwika kukusimana ni wawo ambuje ŵangu mwenye.”
21 Ndaŵi jijojo Abisayi mwanache jwa Seluya ŵaŵechete kuti, “Ana Simeyi ngakusosekwa kuwulajidwa pa yatesileyi, ligongotu jwalakwe jwanyosisye jwamsagulwe jwa Yehofa?” 22 Nambo Daudi ŵamjanjile jwalakwejo kuti, “Ana yeleyi yikumkwaya wuli jemanja ŵanache ŵa Seluya kuti mlimbane ni une lelojino? Ana lelo akusosekwa kuwulajidwa mundu mu Isalayeli muno? Ana unejo ngangumanyilila kuti lelo ndili mwenye jwa Ayisalayeli?” 23 Kaneko mwenyewo ŵamsalile Simeyijo kuti, “Mmwejo ngam’wa.” Pelepo mwenyewo ŵalumbile kwa jwalakwe.
24 Nombenajo Mefiboseti chisukulu cha Sauli ŵayiche kukusimana ni mwenyewo. Kutandila palisiku lyele mwenye ŵatyosile mpaka palisiku liŵawujile mumtendele, jwalakwe nganachesaga sajo* syakwe, kukatila ndewu syakwe soni kuchapa yakuwala yakwe. 25 Jwalakwe paŵayiche* ku Yelusalemu ni kusimana ni mwenyewo, mwenyewo ŵamwusisye jwalakwejo kuti, “Ligongo chichi nganimjawula yimpepe ni unejo Mefiboseti?” 26 Pelepo jwalakwe ni ŵajanjile kuti, “Ambuje ŵangu mwenye, wawo akumanyilila kuti une ndili jwamlemale. Une namsalile jwakutumichila jwangu kuti, ‘Mumbichile chakutamila pabulu kuti ngwele njawule yimpepe ni mwenye.’ Nambo jwakutumichila jwangujo ŵandoŵesye. 27 Nambosoni jwalakwe ŵaŵechete yaunami yakwamba unejo kwa wawojo ambuje ŵangu mwenye. Nambope wawojo ambuje ŵangu mwenye ali mpela lilayika lya Mlungu jwakuwona. Myoyo atende yiliyose yakuyiwona kuŵa yambone. 28 Ŵandu wosope ŵa m’nyumba ja baba ŵangu ŵasosekwaga kuwulajidwa ni wawojo ambuje ŵangu mwenye, nambo mmalomwakwe ŵasagwile une jwakutumichila jwawo kuti ndyeje yimpepe ni ŵandu ŵakusalya pa tebulo jawo. Sano ana pana ligongo lyakundendekasyasoni kulilila yindu yine kutyochela kwa mwenye?”
29 Nambo mwenyewo ŵamjanjile jwalakwejo kuti, “Basi mkaŵechetasoni ya ngani jeleji. Une nganisisye kuti mmwejo ni Siba mgaŵane mgunda wula.” 30 Pelepo Mefiboseti ŵajanjile mwenyewo kuti, “Amleche ajigale mgunda wosopewo. Kwa une yili chenene, bola kuti wawojo ambuje ŵangu mwenye awujile kunyumba jawo mwamtendele.”
31 Kaneko Balisilayi jwa ku Giliyadi ŵayiche kutyochela ku Logelimu ni kusimana ni mwenyewo ni chakulinga chakuti ŵapechesye ku malo gakombochela Lusulo lwa Yolodani. 32 Balisilayijo jwaliji jwamchekulupe, jwakwete yaka 80, soni jwalakwe ŵapaga mwenyewo yakulya pandaŵi jele mwenyewo ŵatamaga ku Mahanaimu pakuŵa Balisilayiju ŵaliji mundu jwamsichile. 33 Ni mwenyewo ŵamsalile Balisilayijo kuti, “Kwende mjawule yimpepe ni une, soni une chingampeje yakulya ku Yelusalemu.” 34 Nambo Balisilayi ŵajanjile mwenyewo kuti, “Ana masiku ga umi wangu gasigele galingwa kuti njawule ni wawojo mwenye ku Yelusalemu? 35 Apanotu ngwete yaka 80. Ana unejo mpaka ngombole kulekanganya chambone ni chakusakala? Ana une jwakutumichila jwawo mpaka mbikane kunong’a kwa yakulya soni yakumwa? Ana mpaka ngombole kupikana maloŵe ga achalume soni ga achakongwe ŵakwimba? Unetu jwakutumichila jwawo chingaŵe chindu chakusitopesya kwa wawojo ambuje ŵangu mwenye. 36 Yili yakwanila kwa une jwakutumichila jwawo kuti ngombwele kwapechesya wawojo mwenye ku Lusulo lwa Yolodano. Sano ligongo chichi mwenye akusosekwa kumbuchisya unejo mwakundendela yeleyi? 37 Chonde angunde une jwakutumichila jwawo kuti mbujile, kuti ngawile mu msinda wakumangwetu chiŵandika ni malembe ga baba ŵangu soni mama ŵangu. Amjigale Chimamu aju, amkunde jwalakwejo kuti ajomboche ni wawojo ambuje ŵangu mwenye, soni akamtendele jwalakwe yambone mpela mwakusachila.”
38 Myoyo mwenyewo ŵamsalile jwalakwejo kuti, “Chimamu chajawule yimpepe ni une, soni une chingamtendele yiliyose yele wawojo akuyiwona kuŵa yambone. Yiliyose yachambende chinjatendela.” 39 Sambano ŵandu wosope ŵatandite komboka lusulo lwa Yolodani. Mwenyewo ali asigele panandi kuti ajomboche ŵamkumbatile mwachinonyelo* Balisilayi ni kumpa upile. Kaneko Balisilayijo ŵawujile kunyumba. 40 Mwenyewo paŵayiche ku Giligala, Chimamu ŵaliji yimpepe ni mwenyewo soni ŵandu wosope ŵa ku Yuda ni hafu ja ŵandu ŵa ku Isalayeli ŵajesile yimpepe ni mwenyewo.
41 Kaneko achalume wosope ŵa ku Isalayeli ŵayiche kwa mwenyewo ni kwawusya kuti, “Ligongo chichi achalongo achimjetu ŵa ku Yuda ŵajigele wawojo mwakusyemba ni kwika nawo wawojo mwenye, achalume ŵawo soni ŵandu ŵa m’nyumba jawo ku Lusulo lwa Yolodani?” 42 Pelepo achalume wosope ŵa ku Yuda ŵajanjile achalume ŵa ku Isalayeliwo kuti, “Ligongo mwenyewo ali mlongomjetu. Sano jemanja pelepa mkutumbila chichi? Ana m’weji tulile chilichose pa yindu ya mwenye, kapena ana atupele mtuka uliwose?”
43 Nambo achalume ŵa ku Isalayeliwo ŵajanjile achalume ŵa ku Yuda kuti, “M’wejo tupali mbumba syakwana 10 mu umwenye wa Daudi. Myoyo tukwete ufulu wakumtendela Daudi yeleyi kumpunda jemanja. Sano ligongo chichi jemanja atunyosisye chamti myiyi? Ana m’wejo ngati ni ŵatwaliji ŵakusosekwa kuŵa ŵandanda kwika nawo mwenyewo?” Nambo achalume ŵa ku Yuda ni ŵaŵapundile pa kuŵechetanapo pakulandanya ni achalume ŵa ku Isalayeli.