Nehemiya
1 Aga ni maloŵe ga Nehemiya* mwanache jwa Hakaliya: M’mwesi wa Kisilefi* m’chaka cha 20, une naliji ku Susani* ku nyumba jaumwenye jakola yakulichenjela.* 2 Pandaŵi jeleji, Hanani juŵaliji jumo mwa achalongo achimjangu ŵayiche kutyochela ku Yuda yimpepe ni achalume ŵane. Mwamti une nawusisye jemanjaji pakwamba ya Ayuda ŵaŵasigele ŵele nganajigalidwa ku ukapolo, soni nawusisye pakwamba ya msinda wa Yelusalemu. 3 Jemanjajo ŵajanjile kuti, “Ayuda ŵasigele mu chigawo* cha kweleko ŵele nganajigalidwa kwawula ku ukapolo, akutama umi wakusawusya mnope soni wakutesya chanasa. Nambosoni mapupa ga msinda wa Yelusalemu gagwile soni mageti gakwe agajochiche moto.”
4 Panagambile kupikana maloŵe gelega, natemi pasi ni kutanda kulila, mwamti nalisile kwa masiku gejinji. Pandaŵiji nalijimile kulya soni naliji mkupopela kwa Mlungu jwakwinani. 5 Une natite, “Wawo Yehofa, Mlungu jwakwinani, wawo Mlungu jwamkulungwa soni jwakusatenda yakusimonjesya. Wawo ali Mlungu jwakusasunga chilanga, soni akusiŵalosya chinonyelo chakulupichika ŵandu ŵakusiŵanonyela wawojo soni ŵakusapikanila malamusi gawo. 6 Chonde awugule meso gawo, soni atejele mawiwi gawo kuti apikane lipopelo lya une jwakutumichila jwawo lyangupopela kwa wawojo lelo. Musi ni chilo ngupopela kwa wawojo pakwamba ya ŵakutumichila ŵawo Ayisalayeli. Ndaŵi josope pangupopela nguŵa ndili mkusala pakwamba ya ulemwa watesile ŵandu ŵawo Ayisalayeli pakwalemwechesya wawojo. M’wejitu tulemwisye, une pampepe ni ŵandu ŵa m’nyumba ja baba ŵangu. 7 Nditu m’weji twatendele wawojo yindu mwachinyengo ligongo tulepele kukuya malamusi gawo. Nambosoni tulepele kukuya yosope yaŵatulamwile kuti tutendeje yele wawojo ŵatusalile kupitila mwa jwakutumichila jwawo Mose.
8 “Chonde akumbuchile maloŵe gaŵamlamwile* jwakutumichila jwawo Mose gakuti, ‘Naga mkutenda yangakulupichika, chinjim’balalikanganya jemanja ni chimchitamaga pasikati pa ŵandu ŵamitundu jine. 9 Nambo naga jemanja mkuwujila kwa une ni kukuya malamusi gangu soni kugapikanila, atamose ŵandu ŵenu chabalalikangane mpaka kuja kwika kumbesi kwa kwinani, une chinjasonganganya jemanjajo kutyochela kweleko ni kwaŵika pamalo gamo gele unejo nagasagwile kuti gamanyicheje ni lina lyangu.’ 10 Jemanjaji ali ŵakutumichila ŵawo soni ŵandu ŵawo ŵaŵawombwele ni machili gawo gekulungwa soni ni mkono wawo wamachili. 11 Wawo Yehofa, chonde atejele mawiwi gawo ku lipopelo lya une jwakutumichila jwawo soni ku lipopelo lya ŵakutumichila ŵawo ŵakusasangalala pakulijogopa lina lyawo. Chonde angamuchisye une jwakutumichila jwawo lelo kuti yindu yinjendele chenene, soni angamuchisye une kuti mundu jweleju andendele chanasa.”
M’masiku gelego, une naliji jwakupelechela mgawo jwa mwenye.