Numeli

11 Sambano ŵanduwo ŵatandite kudandawula pameso pa Yehofa ali atumbile mnope. Yehofa paŵapikene yeleyi, ŵatumbilile mnope jemanjajo mwamti moto wakutyochela kwa Yehofa wagwilile ni kutanda kwatinisya ŵane mwa ŵandu ŵaŵaliji kusa kwa matenti. 2 Ŵanduwo paŵatandite kumlilila Mose, jwalakwejo ŵamchondelele Yehofa mwamti motowo wasimile. 3 Myoyo malogo ŵagapele lina lyakuti Tabela,* ligongo moto wakutyochela kwa Yehofa wagwilile jemanjajo pelepo.

4 Pasikati pa jemanjajo papalisoni ŵandu ŵamitundu jakulekanganalekangana ŵaŵatandite kulosya mtima wakutunduka. Nombenawo Ayisalayeli ŵatandite kulila mwakudandawula mnope ali mkuŵecheta kuti, “M’we tukusaka nyama jakuti tulye. 5 Tusisoŵile mnope somba syatwalyaga ku Iguputo mwalulele, masakaka, matikiti, adiyo soni anyesi jwamitundumitundu. 6 Nambo sambano machili gatumalile. Pangali yiliyose yatukuyiwona akuno, akaŵe manape basi.”

7 Mana galiji geswela gakuwoneka mpela tumbeju twamwanamwana, soni gawonekaga mpela utomoni wa chitela wakuwonechela mkati mpela ligalasi. 8 Ŵanduwo ŵamwasikanganaga kuja kulokotanya manago. Kaneko ŵagasyagaga ni liganga lyakusyajila kapena kugatwa mu lituli. Panyuma pakwe, ŵagatelekaga mumpika kapena kugapanganyila mikate jesyungulile. Kunong’a kwakwe kwaliji mpela makeke gakulyolyopela getaje mawuta. 9 Chilo pagakugwa mangame kumatenti gawo, nombenago mana gagwaga.

10 Sambano Mose ŵapikene ŵandu ali mkulila pampepe ni maŵasa gawo, jwalijose ali ajimi pamlango wa tenti jakwe. Pelepo Yehofa ŵatumbile mnope, soni nombenajo Mose yamsakalisye mnope. 11 Kaneko Mose ŵamsalile Yehofa kuti, “Ligongo chichi akundagasya une jwakutumichila jwawo? Ana ndesile chichi kuti wawojo akasangalala ni une, ni kundwika masengo gakusitopesya gakwalolela ŵandu wosopeŵa? 12 Ana ŵandu ŵeleŵa ŵatyochele m’chitumbo mwa une? Ana jemanjaji junaŵeleche ni une, kuti wawojo asalile kuti najangate* ŵandu ŵeleŵa ni kwawula nawo m’chilambo chaŵalumbilile achinangolo ŵawo kuti chachapa, mpela mwakusatendela jwakutumichila pakumjangata mwanache jwakumlela? 13 Ana chinajijigale kwapi nyama jakuti nalisye ŵandu wosopeŵa? Pakuŵa jemanjaji akundilila une ali mkuŵecheta kuti, ‘Mtupe nyama jakuti tulye!’ 14 Une nganimba ngombwele kwalolela jika ŵandu wosopeŵa. Masengoga gangulile. 15 Naga mwelemu ni mwachatendeleje ni une, bola agambe kumbulaga panopano. Nambo naga wawojo akusangalala ni une, akakunda kuti simane ni yakusawusya yinesoni.”

16 Pelepo Yehofa ŵamsalile Mose kuti, “Mwasagule achalume 70 kutyochela pasikati pa achakulungwa ŵa Ayisalayeli. Mwasagule achalume ŵakuŵajilwa ŵamkwawona kuti ali achakulungwakulungwa ŵa ŵanduwo. Mwajigale jemanjajo ni kwawula nawo ku chitenti chakusimanilana. Kweleko mkajimiche jemanjajo soni mmwejo mkaŵe papopo. 17 Une chingatuluche ni kuŵechetana ni mmwejo kweleko. Chingajigale mbali jine ja msimu wangu weswela wawuli mwa mmwejo ni kwapa jemanjajo, ni chakulinga chakuti amkamuchisyeje pa masengo gakusitopesya gakwalolela ŵanduŵa. Yeleyi chiyikamuchisye kuti masengo gakusitopesyaga mkakamulaga jika. 18 Ayisalayeli wosope mwasalile kuti, ‘Mundu jwalijose aliswejesye lelo, pakuŵa malaŵi chimlye nyama, ligongo Yehofa akupikene kulila kwenu pamŵecheteje kuti, “M’we tukusaka nyama jakuti tulye. Ku Iguputo kula umi wetu waliji pambone kwabasi.” Nditu Yehofa champe nyama jamkujisakajo kuti mlye. 19 Chimchilya nyamajo, ngaŵa kwa lisiku limo kapena masiku gaŵili kapena masiku msano kapena masiku 10 kapenasoni kwa masiku 20, iyayi, 20 nambo kwa mwesi wamtundu, mpaka nyamajo jichikopochelaga mu mbula mwenu soni jichimtindikwa jemanja. Yeleyi chiyitendekwe ligongo mumkanile Yehofa jwali pasikati penu, soni mŵele mli mkulila pameso pakwe ni kuŵechetaga kuti, “Ana chaŵatukopochesye m’chilambo cha Iguputo ni chichi?”’”

21 Pelepo Mose ŵatite, “Achalume ŵandili nawo pakuputa ngondo apali 600,000. Ni wawo akuti, ‘Chinape wosopewo nyama jakwanila kulya kwa mwesi wamtundu!’ 22 Atamose tuli tuwuleje ng’ombe soni ngondolo syosope, ana nyama jelejo mpaka jakwanile jemanjaji? Kapena tuli tuwuleje somba syosope sya m’nyasa, ana mpaka syakwanile ŵanduŵa?”

23 Pelepo Yehofa ŵamjanjile Mose kuti, “Ana mkono wa Yehofa uli wejipi? Sambano chimyiwone naga yimbecheteyi chiyitendekwe kapena iyayi.”

24 Sambano Mose ŵapite kwa ŵanduwo ni kwasalila maloŵe ga Yehofaga. Kaneko jwalakwe ŵasongangenye achalume 70 kutyochela pasikati pa achakulungwa ŵa ŵanduwo, ni ŵajimiche jemanjaji chiŵandika chitenti chakusimanilana. 25 Kweleko Yehofa ŵatulwiche mu liwunde ni kuŵecheta ni Mose. Kaneko ŵajigele mbali jine ja msimu weswela wawaliji mwa Mosejo ni kuwupeleka kwa jwalijose jwa achakulungwa 70 ŵala. Msimuwo pawagambile kwinjila mwa jemanjajo, ndaŵi jijojo ŵatandite kutenda yindu mpela ŵakulochesya,* nambo yeleyi nganayiwilisyasoni kuyitenda.

26 Sambano kumatenti ga Ayisalayeli kwasigele achalume ŵaŵili, ŵele mena gawo galiji Eledadi ni Medadi. Jemanjaji nganajawula nawo ku chitenti chakusimanilana kula atamose kuti mena gawo galiji mu gulu ja mena gagalembedwe ga achakulungwa ŵala. Achalume ŵeleŵa nombenawo ŵapochele msimu weswela mwamti ŵatandite kutenda yindu mpela ŵakulochesya kumatenti peko. 27 Sambano mnyamata jwine ŵawutuchile kwa Mose ni kumsalila kuti, “Eledadi ni Medadi akutendatu yindu mpela ŵakulochesya kumatentiku.” 28 Pelepo Yoswa mwanache jwa Nuni, juŵamtumichilaga Mose kutandila ali mnyamata, ŵatite, “Ambuje ŵangu Mose, akalekasye jemanjajo!” 29 Nambo Mose ŵamjanjile jwalakwejo kuti, “Ana mkutenda jelasi ligongo lyakunganichisya une? Mkatenda yeleyo. Unetu yikanonyele yikaŵe kuti ŵandu wosope ŵa Yehofa ali ŵakulochesya soni yikaŵe kuti Yehofa ŵapele msimu wakwe wosopewo.” 30 Panyuma pakwe, Mose ŵawujile kumatenti pampepe ni achakulungwa ŵa Ayisalayeli ŵala.

31 Kaneko mbungo jakutyochela kwa Yehofa jayiche, mwamti jayikasisye yiwuti kutyochela kumbali jakunyasa. Yiwutiyo yagumbalene pasi mumbali mosope mwa matenti gawogo, mwamti kumbali jimo kutyochela payatandile mpaka payapelele, lutando lwakwe mundu mpaka ajende kwa lisiku limo. Nambosoni kumbali jineji kutyochela payatandile mpaka payapelele, lutando lwakwe mundu mpaka ajendesoni kwa lisiku limo. Kutyochela penani pa yiwutiyo kuti ukayiche pasi, kusokoka kwakwe kwaliji chiŵandika makono gaŵili. 32 Myoyo ŵanduwo ŵatamile kukamula yiwutiyo musi wosope wa lisiku lyelelyo soni chilo chosope mpaka lisiku lyosope lyakuyichisya, mwamti mundu juŵakamwile yiwuti yakwana mahomeli* 10 yaliji kuti akamwile yamnono. Yijuniyo ŵaliji mkuyijanika pasi posope kusyungulila matenti gawogo. 33 Nambo ali mkati mwakulya nyama ja yijuniyo, mkanamalisye kulya, ukali wa Yehofa wagwilile ŵanduwo. Yehofa ŵatandite kwawulaga jemanjajo mwamti ŵawuleje ŵandu ŵajinji.

34 Myoyo malo gelego ŵagapele lina lyakuti Kibuloti-hatafa,* ligongo lyakuti pamalo gelega ŵasichile ŵandu ŵaŵalosisye mtima wakutunduka. 35 Paŵatyosile ku Kibuloti-hatafa ŵayiche ku Haseloti, mwamti ŵatemi ku Haselotiko.