Masalimo
115 Wawo Yehofa, m’weji ngatukuŵajilwa kutupa uchimbichimbi, ngatukuŵajilwa amta panandi.*
Nambo uchimbichimbi apeleche ku lina lyawo
Ligongo lya chinonyelo chawo chakulupichika soni kudalilichika kwawo.
2 Akalechelela ŵandu ŵamitundu jine kuti aŵecheteje kuti:
“Ana Mlungu jwawojo juli kwapi?”
3 Mlungu jwetu ali kwinani.
Jwalakwe akusatenda yindu yiliyose yayikusamsangalasya.
4 Milungu jawo jakusepa jili jasilifa soni golide,
Jakusapanganya ŵandu ni makono gawo.
5 Pakamwa jikwete, nambo jangaŵecheta.
Jikwete meso, nambo jangalola.
6 Jikwete mawiwi, nambo jangapikana.
Jikwete mbula, nambo janganuchisya.
7 Jikwete makono, nambo nganijiŵa jikamwile chindu.
Jikwete ngongolo, nambo nganijiŵa jijesile.
Kungulo kwawo kwangakopoka maloŵe galigose.
8 Ŵandu ŵakusajipanganya milungujo chachilandana najo,
Yimpepesoni ni ŵandu ŵakusajikulupilila.
9 Jemanja Ayisalayeli, mumkulupilileje Yehofa.
Jwalakwejo ni jwali jwakumkamuchisya soni chakuchijila chenu.
10 Jemanja ŵa m’nyumba ja Aloni, mumkulupilileje Yehofa.
Jwalakwejo ni jwali jwakumkamuchisya soni chakuchijila chenu.
11 Jemanja ŵamkusimumjogopa Yehofa, mumkulupilileje Yehofa.
Jwalakwejo ni jwali jwakumkamuchisya soni chakuchijila chenu.
12 Yehofa akusatukumbuchila m’weji soni chachitupa upile.
Jwalakwe chachapa upile ŵandu ŵa m’nyumba ja Isalayeli.
Jwalakwe chachapa upile ŵandu ŵa m’nyumba ja Aloni.
13 Yehofa chachapa upile ŵandu ŵakusamjogopa jwalakwejo,
Chinga ŵakuchimbichika kapena ŵangachimbichika.
14 Yehofa chachitendekasya kuti yindu yipitilisye kumjendela mnope,
Jemanja pampepe ni ŵanache ŵenu.*
15 Yehofa, juŵapanganyisye kwinani soni chilambo chapasi,
Ampe upile jemanja.
16 Pakwamba yakwinani, kwinani kuli kwa Yehofa,
Nambo chilambo chapasi jwalakwe ŵachipeleche kwa ŵanache ŵa ŵandu.
17 Ŵawe ŵangamchimbichisya Ya.
Soni pangali jwalijose jwali m’malembe jwampaka atende yeleyo.
18 Nambo m’we tuchimchimbichisya Ya
Kutandila apano mpaka kalakala.
Amchimbichisye Ya!*