Genesesi
50 Kaneko Yosefe ŵaligwichisye penani pa mtembo wa babagwewo ni kutanda kulila mnope soni kuwukumbatila mtembowo. 2 Panyuma pakwe Yosefe ŵalamwile ŵakutumichila ŵakwe ŵaŵaliji madokotala kuti awulinganye mtembo wa babagwe kuti ukajonasika. Myoyo madokotalago gawulinganyisye mtembo wa Isalayelijo. 3 Madokotalago galinganyisye mtembowo kwa masiku gakwana 40, pakuŵa kulinganya mtembo kwajigalaga ndaŵi jelewu chamti myiyi. Mwamti Aiguputowo ŵapitilisye kumlilila Yakobo kwa masiku gakwana 70.
4 Pagamasile masiku gakulila malilo ga Yakobo, Yosefe ŵaŵechete ni achakulungwakulungwa ŵa m’nyumba ja Falawo kuti, “Naga mpaka asalalile mtima, chonde ambelechele utengawu kwa Falawo: 5 ‘Baba ŵangu mkanawe ŵalumbilikasisye une soni ŵasalile kuti, “Unetu sigele panandi kuwa. Myoyo mmwejo mkusosekwa mkasiche une m’malembe gangu ganagalinganyisye m’chilambo cha Kanani.” Chonde angunde kuti njawule ngasiche baba ŵangu, kaneko chingawujeje.’” 6 Falawo ŵamjanjile jwalakwejo kuti, “Jawulani mkasiche baba ŵenu mpela yaŵatite pakumlumbilikasya.”
7 Pelepo Yosefe ŵanyakwiche ulendo wakuja kwasika babagwe. Paulendowu ŵaliji yimpepe ni ŵakutumichila wosope ŵa Falawo soni achakulungwakulungwa ŵa m’nyumba ja Falawo ni achakulungwakulungwa wosope ŵa m’chilambo cha Iguputo. 8 Papalisoni wosope ŵa m’nyumba ja Yosefe soni achalongo achimjakwe nambosoni wosope ŵa m’nyumba ja babagwe. Ŵaŵasigele ku Goseni ŵaliji ŵanachepe nambosoni ngondolo ni ng’ombe. 9 Paulendowu papalisoni magaleta* soni ŵandu ŵakwela pamahachi ŵaŵalongene nawo, mwamti gulu ja ŵandujo jaliji jekulungwa mnope. 10 Kaneko jemanjaji ŵayiche pamalo gakuputila mbeju ga Atadi gagali mu chigawo* cha Yolodani. Kweleko jemanjajo ŵalisile mwakutesya chanasa mnope, mwamti Yosefe ŵapitilisye kwalilila babagwe kwa masiku gakwana 7. 11 Ŵandu ŵakutama m’chilambocho ŵaŵaliji Akanani ŵaweni jemanjajo ali mkulila pamalo gakuputila mbeju ga Atadi. Pelepo ŵanduwo ŵaŵechete kuti, “Nambotu Aiguputoŵa ni akulila mwakutesya chanasa mnope.” Ni ligongo lyakwe malogo ŵagapele lina lyakuti Abele-misilayimu.* Malo gelega gali mu chigawo cha Yolodani.
12 Myoyo ŵanache ŵa Yakobo ŵatesile yosope mwakamulana ni yaŵasalile baba ŵawowo. 13 Ŵanache ŵakwewo ŵamjigele jwalakwe ni kwawula najo ku chilambo cha Kanani. Kweleko ŵamsichile jwalakwe mumbanga jajaliji mumgunda wa Makipela. Mgunda welewu waliji mwakulolegana ni Mamule soni ni wele Abulahamu ŵawusumile kwa Efuloni Mhiti kuti gaŵe malembe gakwe. 14 Panyuma pakwasika babagwewo, Yosefe ŵawujile ku Iguputo pampepe ni achalongo achimjakwe soni wosope ŵaŵalongene najo kukwasika babagwe m’malembe.
15 Achalongo achimjakwe ŵa Yosefe paŵayiweni kuti baba ŵawo awile, ŵatandite kuŵechetana kuti, “Kombolekatu kuti mwine Yosefe akuganichisyape yakusakala yatwamtendele yila, mwamti lisiku line chachituwuchisya nditu ligongo lya yindu yatwamtendele yila.” 16 Myoyo jemanjaji ŵatumisye utenga kwa Yosefe wakusala kuti, “Baba ŵenu mkanaŵe kuwa, ŵasasile kuti, 17 ‘Ayi ni yachimchisosekwa kumsalila Yosefe, “Chonde ngumŵenda kuti mwakululuchile achalongo achimjenu ligongo lya chakusakala chaŵamtendele mmwejo soni ligongo lya chakulemwa chiŵatesile jemanjaji chachatendekasisye kuti mmwejo msimane ni yakupweteka.”’ Myoyo m’weji tukumŵenda kuti chonde mwakululuchile ŵakutumichila ŵa Mlungu jwa baba ŵenu.” Yosefe paŵapikene yaŵaŵechete jemanjajo, ŵalisile. 18 Nombenawo achalongo achimjakwewo, ŵaligwichisye pasi pameso pa Yosefe ni kuŵechetaga kuti, “Atujigale kuti tuŵe achikapolo ŵawo basi.” 19 Pelepo Yosefe ŵasalile jemanjajo kuti, “Mkatenda woga. Ana une njigele malo ga Mlungu sambano? 20 Atamose kuti jemanja mwakwete chakulinga chakundendela yakusakala, nambope Mlungu jwatendekasisye kuti pambesi pakwe yindu yiŵe chenene soni kuti akulupusye umi wa ŵandu ŵajinji mpela mwakutendela apano. 21 Sambano jemanja mkatenda woga. Une chimbitilisyepe kumpa yakulya jemanja pampepe ni ŵanache ŵenu.” Pelepo Yosefe jwatendekasisye kuti mitima ja achalongo achimjakwewo jiŵe mmalo soni jwaŵechetene nawo mwakwalimbikasya.
22 Yosefe pampepe ni ŵandu wosope ŵa m’nyumba ja babagwe, ŵapitilisye kutama ku Iguputo mwamti jwalakwe ŵatemi ni umi kwa yaka 110. 23 Yosefe ŵatemi ni umi mpaka kuwuwona m’bado* watatu wa ŵanache wa Efulayimu, mwamti jwalakwe ŵawenisoni ŵanache ŵa Makili juŵaliji mwanache jwa Manase. Ŵanache wosopeŵa ŵapagwile pamakongolo* ga Yosefe. 24 Pambesi pakwe Yosefe ŵasalile achalongo achimjakwewo kuti, “Une sigele panandi kuwa, nambo Mlungu ngasalepela kumkumbuchila jemanja soni jwalakwe chachimkoposya nditu m’chilambo achino ni kumjawusya ku chilambo chiŵamlumbilile Abulahamu, Isaki soni Yakobo.” 25 Pelepo Yosefe ŵalumbilikasisye ŵanache ŵa Isalayeli pakwasalila kuti, “Mlungu ngasalepela kumkumbuchila jemanja. Myoyo chimjigale mawupa gangu pakutyoka akuno.” 26 Kaneko Yosefe ŵawile ali ni yaka 110, mwamti mtembo wakwe ŵawulinganyisye kuti ukajonasika soni ŵawuŵisile mwibokosi ku Iguputoko.