Buku Jaŵili ja Samuyele
2 Panyuma pakwe Daudi ŵamwusisye Yehofa kuti, “Ana njawule ku umo mwa misinda ja ku Yuda? Pelepo Yehofa ŵamjanjile jwalakwejo kuti, “Elo, mjawule.” Kaneko Daudi ni ŵawusisyesoni kuti, “Njawule kwapi?” Jwalakwe ni ŵamjanjile kuti, “Ku Hebuloni.” 2 Myoyo Daudi ŵajawile kweleko ni achiŵamkwakwe ŵaŵili ŵala, Ahinowamu jwa ku Yeseleeli soni Abigayeli jwa ku Kalimeli juŵaliji ŵamkwakwe Nabala mkanaŵe kuwa. 3 Ŵajawilesoni kweleko yimpepe ni achalume ŵaŵaliji ni jwalakwe, jwalijose ali ajigele liŵasa lyakwe. Mwamti jemanjaji ŵatemi m’misinda jakusyungulila Hebuloni. 4 Kaneko achalume ŵa ku Yuda ŵayiche kweleko, ni ŵamtasile Daudi mawuta gakusamtaga mundu pakumsagula kuti jwalakwe aŵe mwenye jwa mbumba* ja Yuda. Jemanjaji ŵamsalile Daudi kuti, “Achalume ŵa ku Yabesi-giliyadi ni ŵaŵamsichile Sauli m’malembe.” 5 Myoyo Daudi ŵatumisye ŵamitenga kwa achalume ŵa ku Yabesi-giliyadi. Ŵatumile kuti akasale kuti, “Yehofa ampe upile jemanja ligongo mwalosisye chinonyelo changamala ambuje ŵenu Sauli mwakwasika m’malembe. 6 Yehofa amlosye jemanja chinonyelo changamala soni kukulupichika kwakwe. Unesoni chinamlosye umbone mtima jemanja ligongo lya yindu yamtesileyi. 7 Sambano mlimbisye makono genu soni mtende yindu mwachilumelume, pakuŵa ambuje ŵenu Sauli awile, soni ŵandu ŵa m’nyumba ja Yuda asagwile une kuti mbe mwenye jwawo.”
8 Nambo Abineli mwanache jwa Neli juŵalijisoni jwamkulungwa jwa asilikali ŵa Sauli, ŵaliji ali amjigele mwanache jwa Sauli lina lyakwe Isi-boseti ni ŵajombweche najo ni kwawula ku Mahanaimu. 9 Soni ŵamŵisile jwalakweju kuti aŵe mwenye jwa ŵandu ŵa ku Giliyadi, mwenye jwa Asuli, mwenye jwa ŵandu ŵa ku Yeseleeli, mwenye jwa ku Efulayimu, ku Benjamini, soni ku Isalayeli kosope. 10 Isi-boseti mwanache jwa Sauli jwakwete yaka 40 pandaŵi jiŵaŵaga mwenye jwa Ayisalayeli, soni jwalakwe jwalamulile kwa yaka yiŵili. Nambo ŵandu ŵa mbumba ja Yuda ŵaliji kumbali ja Daudi. 11 Ulewu wa ndaŵi jele Daudi jwaŵele mwenye ku Hebuloni ali mkujilamula mbumba ja Yuda waliji yaka 7 ni miyesi 6.
12 Pali papite ndaŵi Abineli mwanache jwa Neli juŵalijisoni jwakutumichila jwa Isi-boseti mwanache jwa Sauli, ŵatyosile ku Mahanaimu kula ni kwawula ku Gibiyoni. 13 Nombenajo Yowabu mwanache jwa Seluya pampepe ni ŵakutumichila ŵa Daudi ŵanyakwiche ni kwawula ku litanda lya ku Gibiyoni, ni ŵasimene ni jemanjajo kweleko. Gulu jine jatemi kumbali jine ja litandalyo, soni gulu jinejo jatemi kumbali jinejo. 14 Kaneko Abineli ŵamsalile Yowabu kuti, “Kwende anyamata ŵetuŵa amenyane* m’weji tuli mkulola.” Pelepo Yowabu ŵajanjile kuti, “Kwende amenyane.” 15 Myoyo jemanjajo ŵanyakwiche soni ŵaŵalasile, kumbali ja Benjamini ni Isi-boseti ŵapali ŵandu 12 soni kumbali ja ŵakutumichila ŵa Daudi ŵapalisoni 12. 16 Pelepo jwalijose jwakamwile mtwe wa mjakwe soni jwalijose jwamsomile upanga* mjakwe juŵalimbanaga najo, mwamti wosopeŵa ŵawile. Myoyo malo gelega gagali ku Gibiyoni ŵagakolasile kuti Helikati-hasulimu.
17 Lisiku lyeleli kumenyanako kwakusile mnope, mwamti ŵakutumichila ŵa Daudi ŵamgomeche Abineli ni achalume ŵa ku Isalayeli. 18 Ŵanache ŵatatu ŵa Seluya ŵaliji kweleko mena gawo galiji Yowabu, Abisayi, soni Asaheli. Asaheli ŵaliji ŵakuwutuka mnope mpela mwajikusawutuchila mbaŵala ja mwitinji. 19 Sambano Asaheli ŵatandite kumtoposya Abineli mwamti jwalakwe nganagalawuchila kumlyo kapena kumchiji paŵamtoposyaga Abinelijo. 20 Kaneko Abineli ŵalolite munyuma ni ŵawusisye kuti, “Ana mli mmwejo Asaheli?” Pelepo Asaheli ni ŵajanjile kuti, “Elo, ndili une.” 21 Abineli ni ŵamsalile jwalakwejo kuti, “Mjawule kumlyo kapena kumchiji kwenu soni mumkamule jwamlume jwalijose jwachimumwone, ni mjigale yiliyose yachimumwule jwalakwejo kuti yiŵe yenu.” Nambo Asaheli nganasaka kuleka kumwutusya jwalakwejo. 22 Kaneko Abineli ŵamsalilesoni Asaheli kuti, “Mleche kundoposya naga ngamkuleka chinamwulaje. Nambi naga ngumwulaga chingawonegane najo uli Yowabu mlongomjenu?” 23 Nambo jwalakwe jwakanile. Myoyo Abineli jwamsomile jwalakwejo m’matumbo ni kunyuma kwa lipanga, mwamti lipangalyo lyakopochele kumgongo kwakwe, soni jwalakwe jwagwile papopo ni kuwa. Jwalijose payiche pamalo gaŵawilile Asaheli ŵajimaga pelepo ligongo lyakusimonga mnope.
24 Kaneko Yowabu ni Abisayi ŵapite kukumtoposya Abineli. Lyuŵa palyakapilaga jemanjaji ŵayiche ku litumbi lya Ama. Litumbili lyalolegene ni dela ja Giya pamsewu wakwinjilila ku chipululu cha Gibiyoni. 25 Kweleko achalume ŵa ku Benjamini ŵasongene pampepe kunyuma kwa Abineli, ni kuŵa gulu jimpepe soni ŵajimi penani pa litumbi linelyakwe. 26 Kaneko Abineli ŵamwusisye Yowabu mwakugumila kuti, “Ana tupitilisye kumenyana ni maupanga mpaka chakachi? Ana ngamkumanyilila kuti yakuyichisya yakwe chiyiŵe yakutesya chanasa? Ana chimwasalile ŵanduŵa chakachi kuti aleche kwatoposya achalongo achimjawo?” 27 Pelepo Yowabu ŵamjanjile jwalakwejo kuti, “Nditu ngulumbila pameso pa Mlungu jwakuwona jwali jwaumi, yikaŵe kuti mmwejo nganiŵecheta, ŵanduŵa akapitilisye kwatoposya achalongo achimjawoŵa mpaka kundaŵi.” 28 Sambano Yowabu ŵagombile lipenga, mwamti achalume ŵakwewo ŵalesile kwatoposya Ayisalayeliwo soni kumenyanako kwamalile pelepo.
29 Abineli yimpepe ni achalume ŵakwe ŵajesile chilo chosopecho kupita ku Alaba mpaka ŵajombweche Yolodani. Jemanjaji ŵajesilesoni mwakukuya lusulolo* mpaka ŵajile kwika ku Mahanaimu. 30 Kaneko Yowabu ali awusile kutyochela kukumtoposya Abineli, ŵasongangenye ŵandu wosope pampepe. Pa ŵakutumichila ŵa Daudi pasoŵile ŵandu ŵakwana 19 kupwatikapo Asaheli. 31 Nambo ŵakutumichila ŵa Daudiŵa ŵagomeche achalume ŵa ku Benjamini soni achalume ŵa Abineli, mwamti ŵane mwa achalume ŵa jemanjaji ŵakwana 360 ŵawile. 32 Jemanjaji ŵamjigele Asaheli ni kuja kumsika m’malembe ga baba ŵakwe gagaliji ku Betelehemu. Kaneko Yowabu yimpepe ni achalume ŵakwe ŵajesile chilo chosope, soni jemanjaji ŵayiche ku Hebuloni pakwachaga.