Masalimo

2 Ligongo chichi mitundu ja ŵandu jitumbile?

Ligongo chichi ŵandu akusongona* yindu yangali mate?

 2 Mamwenye ga pachilambo chapasi gajimi pamalo gawo,

Nambosoni achakulungwakulungwa ŵakulamulila asongene pampepe mwakamulana,*

Kuti alimbane ni Yehofa soni jwakusagulidwa jwakwe.*

 3 Jemanjaji akuŵecheta kuti, “Kwende tukutule maunyolo gawo

Soni tujase ngonji syawo syatutaŵilesi!”

 4 Jwele jwatemi pampando waumwenye kwinani chachaseka jemanjajo.

Yehofa chachanyosya jemanjajo.

 5 Pandaŵi jelejo jwalakwe chachiŵecheta ni jemanjajo mwakutumbila

Soni chachajogoya ali atumbile mnope.

 6 Chachiŵecheta kuti, “Une namsagwile mwenye jwangu,

Soni jwalakwe akulamulila pa Litumbi lya Siyoni, lyalili litumbi lyangu lyeswela.”

 7 Ngusaka wandisye yaŵechete Yehofa.

Jwalakwejo asalile une kuti, “Mmwejo mli mwanangu.

Lelo mbele baba ŵenu.

 8 Naga mkumbenda, chinjimpa mitundu ja ŵandu kuti jiŵe chipanje chenu

Soni chilambo chapasi kuti chiŵe chenu.

 9 Chimchakasanya jemanjajo ni ndodo ja chisyano cha ayiloni,

Soni chimchagumulanya mpela chiŵiga.”

10 Sambano jemanja mamwenye, mtende yindu mwalunda.

Mkunde kumjongolela,* jemanja ŵakwelusya ŵa pachilambo chapasi.

11 Mumtumichileje Yehofa mwawoga,

Nambosoni msangalaleje soni kutetemela pameso pakwe.

12 Mumchimbichisye* mwanachejo, kogopela kuti Mlungu* mpaka amtumbilile jemanja

Soni mpaka mtyoche pa litala lyachilungamo,

Pakuŵa ukali wa Mlungujo ukusajanguya kukolela.