Ekisodo
2 Mundaŵijo, jwamlume jwine jwa mu mbumba* ja Lefi ŵalombele jwamkongwe jwa mu mbumba ja Lefi pejo. 2 Kaneko jwamkongwejo ŵakwete msigo soni ŵaŵeleche mwanache jwamlume. Jwalakwe paŵayiweni kuti mwanachejo ali jwakusalala ŵamsisile kwa myesi jitatu. 3 Nambo jwamkongwejo paŵayiweni kuti yaliji yangakombolekasoni kumsisa mwanachejo, jwalakwe ŵajigele chitundu chakuluka ni milulu* ni kuchimata ni lipula. Kaneko ŵamŵisile mwanachejo muchitunducho, soni ŵachijigele chitunducho ni kuja kuchiŵika pasikati pa matete mungulugulu lusulo lwa Nailo. 4 Nambo mlumbugwe jwa mwanachejo ŵajimi chapakutalichila kuti alole yachiyimtendechele mwanachejo.
5 Sambano mwanache jwamkongwe jwa Falawo ŵayiche kukoga mulusulo lwa Nailo, soni asikana ŵakwe ŵakumtumichila ŵaliji mkwendajenda mungulugulu lusulolo. Kaneko jwalakwe ŵachiweni chitundu chila chili pasikati pa matete. Pelepo jwalakwe ŵamtumile kapolo jwakwe jwamkongwe kuti akachijigale chitunducho. 6 Jwalakwe paŵawugwile chitunducho ŵam’weni mwanache jwamlume, soni mwanachejo ŵaliji mkulila. Pelepo jwalakwe ŵamtendele chanasa mwanachejo, nambo ŵatite, “Mwanacheju juli jumo mwa ŵanache ŵa Ahebeli.” 7 Kaneko mlumbugwe jwa mwanachejo ŵamsalile mwanache jwamkongwe jwa Falawojo kuti, “Ana njawule ngamŵilanjile jwamkongwe jwakonjesya jwa Chihebeli kuti amsamalilileje mwanacheju?” 8 Pelepo mwanache jwamkongwe jwa Falawojo ŵamjanjile jwalakwejo kuti, “Elo mjawule.” Ndaŵi jijojo msikanajo ŵapite kukwaŵilanga mamagwe ŵa mwanachejo. 9 Kaneko mwanache jwamkongwe jwa Falawojo ŵamsalile jwamkongwejo kuti, “Mumjigale mwanacheju kuti mkasamalilileje, soni une chinampeje malipilo genu.” Myoyo jwamkongwejo ŵamjigele mwanachejo ni kutanda kumlela. 10 Mwanachejo paŵakusile, ŵapite najo kwa mwanache jwamkongwe jwa Falawo jula, mwamti jwaŵele mwanache jwakwe. Jwalakwe ŵampele mwanachejo lina lyakuti Mose* soni ŵatite, “Nampele lina lyeleli ligongo lyakuti ndesile jwakumchuwula m’mesi.”
11 Sambano m’masiku gelego, Mose paŵakusile ŵapite kwa achalongo achimjakwe kuti akalole yaŵatiga pakulaga ligongo lya masengo gakupweteka gaŵakamulaga. Ali kweleko, jwalakwe ŵam’weni mundu jwine jwa Chiiguputo ali mkumputa mundu jwa Chihebeli juŵaliji mlongo mjakwe jwa Mosejo. 12 Myoyo jwalakwe jwalolite aku nakuku. Ni paŵayiweni kuti pangali jwalijose jwakumwona, ŵamwuleje mundu jwa Chiiguputo jula ni kumsisa mu mchenga.
13 Nambo palisiku lyakuyichisya, jwalakwe ŵapitesoni kukwalola achalongo achimjakwewo. Kweleko jwalakwe ŵasimene achalume ŵaŵili ŵa Chihebeli ali mkumenyana. Myoyo jwalakwe ŵamwusisye mundu juŵamputaga mjakwejo kuti, “Ligongo chichi mkwaputa ajenuwo chamti myoyo?” 14 Pelepo jwalakwe jwatite, “Ana ŵani ŵaŵamsagwile mmwejo kuti mŵe mwenye soni kuti mŵe jwakulamula pasikati petu? Ana mkusaka kumbulagasoni une mpela yimwatesile pakumwulaga mundu jwa ku Iguputo kuno jula?” Pelepo Mose wamkamwile woga mwamti ŵatite, “Shaa! Apatu ngani jila jimanyiche basi.”
15 Kaneko Falawo ŵapikene ya nganiji mwamti ŵaganisisye yakuti amwulaje Mose. Nambo Mose ŵamtisile Falawo ni kuja kutama ku chilambo cha Midiyani. Ali ayiche kweleko jwalakwe ŵatemi pa chisima. 16 Sambano jwakutaga mbopesi jwa ku Midiyaniko ŵakwete ŵanache ŵachakongwe ŵakwana 7. Ŵanache ŵachakongwe ŵala ŵayiche ku chisima kula kukuteka mesi kuti akataje mu yakumwela yilango ya baba ŵawo. 17 Nambo mpela mwayaŵelaga masiku gosope, ŵakulisya yilango ŵayiche ni kwatopola achakongwe ŵala. Pelepo Mose ŵanyakwiche paŵatemi pala ni kwakamuchisya achakongwewo, mwamti ŵayimwesisye mesi yilango yawoyo. 18 Kaneko achakongwewo paŵayiche kunyumba kwa Leuwele* baba ŵawo ŵala, baba ŵawowo ŵawusisye kuti, “Yikomboleche wuli kuti lelo myiche mwakwanguya?” 19 Jemanjajo ni ŵajanjile kuti, “Mundu jwine jwa ku Iguputo ŵatukulupwisye kwa ŵakulisya yilango. Soni jwalakwe ŵatutechele mesi ni kuyimwesya yilango.” 20 Pelepo jwalakwe ŵawusisye ŵanache ŵakwewo kuti, “Nambi mundujo ali kwapi? Ligongo chichi nganimumjigala? Mjawule mkamŵilanje kuti alye yimpepe ni m’weji.” 21 Panyuma pakwe Mose ŵakundile kutama ni Leuwelejo, soni jwalakwe ŵampele Mosejo mwanache jwakwe jwamkongwe lina lyakwe Sipola kuti aŵe ŵamkwakwe. 22 Kaneko Sipola ŵaŵeleche mwanache jwamlume soni Mose ŵampele mwanachejo lina lyakuti Gelisomu,* pakuŵa jwalakwe ŵatite, “Une mbele mlendo mu chilambo cha achimsyene.”
23 Pali papite ndaŵi jelewu, mwenye jwa ku Iguputo jula jwawile. Nambo Ayisalayeli ŵapitilisye kulagasika mnope ligongo lya ukapolo wula soni ŵaliji mkulila mwakudandawula mnope. Nambosoni kulila kwa jemanjaji kwa kuŵenda chikamuchisyo ligongo lya ukapolowo kwaliji mkupikanika kwa Mlungu jwakuwona. 24 Mkupita kwa ndaŵi Mlungu ŵapikene kulila kwawo, mwamti Mlungu ŵakumbuchile chilanga chakwe chaŵatesile ni Abulahamu, Isaki soni Yakobo. 25 Myoyo Mlungu ŵakumbuchile Ayisalayeli, mwamti Mlungujo ŵakuweni kulagasika kwawo.