Ngani Syambone Syaŵalembile Luka
17 Kaneko jwalakwe ŵasalile ŵakulijiganya ŵakwe kuti, “Yindu yakwakuŵasya ŵandu ngasiyilepela kutendekwa. Nambo akwete likungu* mundu jwakuyitendekasya! 2 Yikaliji chenene kwa jwalakwejo kumtaŵilila m’lukosi mwakwe liganga lyekulungwa lyakusyajila ni kumponya m’nyasa kulekangana ni kuti jwalakwejo amkuŵasye jumo mwa tuŵanachetu. 3 Mŵe ŵakusamala. Naga mlongo mjenu amlemwechesye, mumjamuche, soni naga akugalawuka mtima, mumkululuchile. 4 Atamose ali amlemwechesye ka 7 palisiku ni akuwujilasoni kwa mmwejo ka 7 kukumsalila kuti, ‘Mungululuchile chonde,’ mkusosekwa kumkululuchila.”
5 Sambano ŵandumetume ŵala ŵasalile Ambujewo kuti, “Atukamuchisye kuti tukole chikulupi chakulimba.” 6 Pelepo Ambujewo ŵatite, “Mkakole chikulupi ukulu wakwe mpela kambeju ka tanaposi, mkakombwele kuchisalila chitela cha mabulosi achi kuti, ‘Mlichuŵe ni mkalipandichile m’nyasa!’ mwamti chikakomboleche kumpikanila.
7 “Tujile kuti jumo mwa jemanja akwete kapolo juŵapite kumigunda kukulima kapena kukulisya yilango. Kapolojo pawusile, ana mpaka amsalile kuti, ‘Myiche mwachitema patebulopa kuti tulye’? 8 Iyayi. Mmalomwakwe, chachimsalila kuti, ‘Mchenje yakuwala yenuyo ni mulinganyile yakulya yaligulo, ni mundumichileje mpaka ndili malisisye kulya ni kumwa, pambesi pakwe mmwejosoni mkalye ni kumwa.’ 9 Soni atamose kapolojo ali amalisisye yeleyi, ana chachimyamichila? Iyayi, ligongo kapolojo jutesile yajwasosekwaga kutenda. 10 Myoyosoni jemanja pamtesile yindu yosope yaŵampele kuti mtende, mjileje kuti, ‘M’we tuli achikapolo ŵangali mate. Tugambile kutenda yatwasosekwaga kuyitenda.’”
11 Paŵaliji mkwawula ku Yelusalemu, Yesu ŵapitile m’malile mwa Samaliya ni Galileya. 12 Paŵajinjilaga m’musi wine, achalume 10 ŵamatana ŵayiche kwa jwalakwe, nambo ŵajimi chapakutalichila. 13 Jemanjajo ŵagumisile kuti, “Yesu, Mwalimu, atutendele chanasa!” 14 Yesu paŵaweni jemanjajo ŵasalile kuti, “Mjawule mkalilosye kwa ŵakutaga mbopesi.” Jemanjajo paŵaliji mkwawula, matanago gamasile. 15 Jumo mwa achalumewo paŵayiweni kuti aposile,* ŵawujile kwa Yesu ali mkumyamika Mlungu mwakwesya maloŵe. 16 Soni paŵayiche kwa Yesu ŵatindiŵele ni kwinama mpaka ngope jakwe pasi ni kumyamichilaga Yesujo. Nambosoni mundujo jwaliji Msamaliya. 17 Pelepo Yesu ŵatite, “Ana ŵandu ŵaposile* ŵala, ngaŵa ŵaliji 10? Sambano 9 ŵanewo ali kwapi? 18 Ligongo chichi pangali jumo mwa jemanjajo jwayiche kukumyamika Mlungu, nambo mundu jwa mtundu winepeju?” 19 Kaneko Yesu ŵamsalile jwalakwejo kuti, “Mjimuche ni mjawuleje. Chikulupi chenu chimposisye.”*
20 Afalisi paŵamwusisye Yesu ndaŵi jakwika kwa Uchimwene wa Mlungu, jwalakwe ŵajanjile kuti, “Uchimwene wa Mlungu ngasiwuyika m’litala lyakuti jwalijose ni kuwumanyilila, 21 soni ŵandu ngasaŵechetaga kuti, ‘Alole, uli akuno!’ kapena, ‘Uli ako!’ Ligongo Uchimwene wa Mlungu uli pasikati penu.”
22 Kaneko jwalakwe ŵasalile ŵakulijiganyawo kuti, “Ndaŵi jichiyika jele jemanja chimchisachilila kuliwona limo mwa masiku ga Mwanache jwa mundu, nambo ngasimliwona. 23 Soni ŵandu chachimsalilaga kuti, ‘Mlole ali ako!’ kapena, ‘Aju, ali akuno!’ Nambo jemanja mkasimkopoka kapena kwakuya jemanjajo. 24 Pakuŵa mpela mwayikusaŵela kuti njasi pajimesisye kumbali jine ja kwinani jikusawonechela mpaka kumbali jinesoni ja kwinani, mwelemu ni mwayichiŵelasoni pa lisiku lyachachiwonechela Mwanache jwa mundu. 25 Nambo chandanda akusosekwa kusimana ni yakupweteka yejinji soni kukanidwa ni ŵandu ŵa m’bado* awu. 26 Nambosoni mpela muyaŵelele m’masiku ga Nowa, ni mwayichiŵelasoni m’masiku ga Mwanache jwa mundu. 27 Pandaŵijo, ŵandu ŵaliji mkulya soni ŵaliji mkumwa, achalume ŵaliji mkulombela soni achakongwe ŵaliji mkulombedwa mpaka pa lisiku lyele Nowa ŵajinjile m’chombo, kaneko Chigumula chayiche ni kwajonanga wosopewo. 28 Yili yakulandanasoni ni muyaŵelele m’masiku ga Loti. Pandaŵijo ŵandu ŵaliji mkulya soni ŵaliji mkumwa, ŵaliji mkusuma soni ŵaliji mkusumisya, ŵaliji mkupanda, soni ŵaliji mkutaŵa. 29 Nambo pa lisiku lyele Loti ŵakopweche mu Sodomu, moto soni sulufule yagwile kutyochela kwinani mpela wula ni kwajonanga ŵandu wosope. 30 Mwelemu ni mwayichiŵelasoni palisiku lyelelyo pele Mwanache jwa mundu chachiwonechela.
31 “Palisiku lyelelyo jwalijose jwali penani panyumba* nambo jwele katundu jwakwe ali m’nyumbamo akasatuluka kuti akamjigale, soni jwalijose jwali kumigunda akasawujila kumangwawo kuti akajigale yindu yayilesile. 32 Mkumbuchileje ŵamkwakwe Loti. 33 Jwalijose jwakulingalinga kuti akulupusye umi wakwe chachiwujasa, nambo jwalijose jwakuwujasa chachiwukulupusya. 34 Soni ngumsalila jemanja kuti, chilo chelecho ŵandu ŵaŵili ŵachachigona pampepe, jumo chachimjigala, nambo jwinejo chachimleka. 35 Pachiŵa achakongwe ŵaŵili ali mkusyaga tiligu pampepe, jumo chachimjigala, nambo jwinejo chachimleka.” 36 *—— 37 Pelepo jemanjajo ŵamwusisye Yesu kuti, “Ana akwamba kwapi Ambuje?” Jwalakwejo ŵajanjile kuti, “Kulikose kwachiwilile chindu,* yimbanga* yichisonganganasoni kukoko.”