Ngani Syambone Syaŵalembile Maliko
2 Nambo gali gapitile masiku, Yesu ŵajinjilesoni mu msinda wa Kapelenawo, mwamti ŵandu ŵajinji ŵapikene yakuti jwalakwejo ayiche kumangwakwe. 2 Myoyo ŵandu ŵagumbalene m’nyumba jiŵaliji jwalakwejo mpaka pamlango, kaneko jwalakwe ŵatandite kwajiganya. 3 Sambano ŵandu ŵane ŵayiche najo mundu jwakulwala ulwele wakuwa yiŵalo. Munduju ŵamnyakwile achalume mcheche. 4 Nambo ŵanduwo nganakombola kwika najo paŵaliji Yesu ligongo lya winji wa ŵandu. Myoyo ŵapowele msakasa mwakulolegana ni pamalo paŵaliji Yesu, kaneko ŵamjinjisye mundujo pelepo ali amgoneche pamachila.* 5 Yesu paŵachiweni chikulupi chawo, ŵamsalile mundu jwakulwala ulwele wakuwa yiŵalo jula kuti, “Mwanangu, yakulemwa yenu yikululuchidwe.” 6 Sambano pelepo papalisoni alembi ŵane, ŵaŵatemi pasi ni kuŵechetaga m’mitima mwawo kuti, 7 “Ligongo chichi mundu jweleju akuŵecheta myiyi? Jwelejutu akunyosya Mlungu. Ana ngaŵa Mlungupe ni jwakusakululuchila yakulemwa?” 8 Ndaŵi jijojo Yesu ŵayimanyi mumtima mwakwe kuti jemanjajo akuganisya yeleyi m’mitima mwawo. Myoyo ŵawusisye kuti, “Ligongo chichi jemanja mkuganisya yindu yeleyi m’mitima mwenu? 9 Ana kumsalila mundu jwakulwala ulwele wakuwa yiŵalo kuti, ‘Yakulemwa yenu yikululuchidwe,’ kapena kusala kuti, ‘Mjimuche, mjigale machila genuga mjawuleje,’ yangasawusya ni yapi? 10 Nambo kuti jemanja mmanyilile kuti Mwanache jwa mundu akwete machili pachilambo chapasi gakululuchila yakulemwa . . .” Jwalakwe ŵamsalile mundu jwakulwala ulwele wakuwa yiŵalo jula kuti, 11 “Ngumsalila m’mwejo kuti, mjimuche, mjigale machila genuga, mjawuleje kumangwenu.” 12 Pelepo mundujo jwajimwiche ni kujigala machila gakwe ni kukopoka ŵandu wosope ali mkulola. Myoyo ŵanduwo ŵasimonjile mnope, ni ŵatandite kumyamichila Mlungu kuti, “Yeleyi nganituyiwoneje chitandilile.”
13 Pandaŵi jine, jwalakwe jwapitesoni mungulugulu nyasa, ni ŵandu ŵajinji ŵamkuyiye mwamti jwalakwe jwatandite kwajiganya. 14 Paŵajendaga, ŵam’weni mundu jwine lina lyakwe Lefi mwanache jwa Alifeyo ali atemi mu ofesi jakomesya msongo, ni ŵamsalile kuti, “Myiche, mŵe jwakulijiganya jwangu.” Ndaŵi jijojo ŵanyakwiche ni kutanda kumkuya. 15 Kaneko Yesu jwapite kukulya ku nyumba ja Lefi. Kweleko, ŵakomesya msongo ŵajinji soni ŵandu ŵajinji ŵakutenda yakulemwa ŵaliji mkulya yimpepe ni Yesu soni ŵakulijiganya ŵakwe, pakuŵa ŵapali ŵajinji mwa jemanjaji ŵaŵamkuyaga jwalakwe. 16 Nambo alembi ŵa Afalisi paŵam’weni jwalakwe ali mkulya pampepe ni ŵandu ŵakutenda yakulemwa soni ŵakomesya msongo, ŵawusisye ŵakulijiganya ŵakwe kuti, “Ligongo chichi jwalakweju akusalya yimpepe ni ŵakomesya msongo soni ŵandu ŵakutenda yakulemwa?” 17 Yesu paŵapikene yeleyi, ŵasalile jemanjajo kuti, “Ŵandu ŵambonembonepe ŵangasosekwa dokotala, nambo ŵakulwala. Une nganimbika kukwaŵilanga ŵandu ŵakulungama, nambo ŵakulemwa.”
18 Sambano ŵakulijiganya ŵa Yohane soni Afalisi ŵalijimaga kulya. Myoyo ŵayiche kwa jwalakwe ni kumwusya kuti, “Ligongo chichi ŵakulijiganya ŵa Yohane soni ŵakulijiganya ŵa Afalisi akusalijima kulya, nambo ŵakulijiganya ŵenu ŵangalijima kulya?” 19 Pelepo Yesu ŵajanjile kuti, “Mlombela pali ni achimjakwe, achimjakwewo ŵangasosekwa kulijima kulya, ngaŵa myoyo? Myoyo naga mlombela ali ni jemanjajo, ngakusosekwa kulijima kulya. 20 Nambo gachiyika masiku gakuti mlombelajo amtyosye pasikati pawo, pandaŵi jelejo ni pachachilijima kulya. 21 Pangali mundu jwakusatotelela chigamba cha nguwo janyuwani pa chakuwala chakala. Naga akutenda myoyo, nguwo janyuwanijo mpaka jiwute chakuwala chakalacho mwamti mpaka chipapuche mnope. 22 Nambosoni ŵandu ŵangaŵika finyo jwasambano m’misaku jalipende jakala. Naga akutenda yeleyo, finyojo jukusawulisya misaku jalipendejo, mwamti finyojo jukusajasika soni misakujo jikusajonasika. Nambo finyo jwasambano akusamŵika m’misaku jalipende jasambano.”
23 Sambano Yesu paŵajendaga mumsewu wakupita m’migunda ja tiligu pa lisiku lya Sabata, ŵakulijiganya ŵakwe ŵatandite kupulula masache ga tiligu ali mkwenda. 24 Myoyo Afalisi ŵamsalile Yesu kuti, “Alole! Ligongo chichi jemanjaji akutenda yindu yele malamusi ngagakukunda kuyitenda pa lisiku lya Sabata?” 25 Nambo jwalakwe ŵajanjile jemanjajo kuti, “Ana nganimŵalanjeje yaŵatesile Daudi ni achalume ŵaŵaliji nawo payamalile yakulya soni pajakwete sala? 26 Mungani jakwamba Abiyatala jwakulolela ŵakutaga mbopesi, mwana ngani jakuti Daudi jwajinjile m’nyumba ja Mlungu ni kulya mikate* jakupeleka kwa Mlungu,* soni jine ŵapele achalume ŵaŵaliji nawo. Malamusi gakundaga ŵakutaga mbopesipe kutenda yeleyi ngaŵaga mundu jwalijose. Ana jemanja nganimŵalanjeje yeleyi?” 27 Kaneko ŵasalile jemanjajo kuti, “Sabata jayiche ligongo lya mundu, nambo mundu nganayika ligongo lya Sabata. 28 Myoyo Mwanache jwa mundu alisoni Ambuje ŵa Sabata.”