Genesesi

5 Aji ni mbili ja ŵanache ŵa Adamu. Pa lisiku lyele Mlungu ŵampanganyisye Adamu, ŵampanganyisye jwalakwe mu chiwanichisyo chakwe. 2 Ŵapanganyisye jwamlume ni jwamkongwe. Pa lisiku liŵapanganyisyelyo, jwalakwe ŵapele jemanjaji upile soni ŵakolasile lina lyakuti Ŵandu.

3 Adamu paŵakwete yaka 130, jwaŵeleche mwanache m’chiwanichisyo chakwe, elo jwakulandana najo, mwamti ŵampele lina lyakuti Seti. 4 Paŵaŵeleche Seti, Adamu ŵatemi ni umi kwa yaka yine yakwana 800. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 5 Myoyo, yaka yosope ya Adamu yakwanile 930, ni kaneko jwawile.

6 Seti paŵakwete yaka 105, jwaŵeleche Enosi. 7 Paŵaŵeleche Enosi, Seti ŵatemi ni umi kwa yaka yine yakwana 807. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 8 Myoyo, yaka yosope ya Seti yakwanile 912, ni kaneko jwawile.

9 Enosi paŵakwete yaka 90, jwaŵeleche Kenani. 10 Paŵaŵeleche Kenani, Enosi ŵatemi ni umi kwa yaka yine yakwana 815. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 11 Myoyo, yaka yosope ya Enosi yakwanile 905, ni kaneko jwawile.

12 Kenani paŵakwete yaka 70, jwaŵeleche Mahalalele. 13 Paŵaŵeleche Mahalalele, Kenani ŵatemi ni umi kwa yaka yine yakwana 840. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 14 Myoyo, yaka yosope ya Kenani yakwanile 910, ni kaneko jwawile.

15 Mahalalele paŵakwete yaka 65, jwaŵeleche Yaledi. 16 Paŵaŵeleche Yaledi, Mahalalele ŵatemi ni umi kwa yaka yine yakwana 830. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 17 Myoyo, yaka yosope ya Mahalalele yakwanile 895, ni kaneko jwawile.

18 Yaledi paŵakwete yaka 162, jwaŵeleche Enoki. 19 Paŵaŵeleche Enoki, Yaledi ŵatemi ni umi kwa yaka yine yakwana 800. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 20 Myoyo, yaka yosope ya Yaledi yakwanile 962, ni kaneko jwawile.

21 Enoki paŵakwete yaka 65, jwaŵeleche Metusela. 22 Paŵaŵeleche Metusela, Enoki ŵapitilisye kwenda ni Mlungu jusyesyene kwa yaka yine yakwana 300. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 23 Myoyo, yaka yosope ya Enoki yakwanile 365. 24 Enoki ŵapitilisye kwenda ni Mlungu jusyesyene. Kaneko jwalakwe nganawonekasoni ligongo Mlungu ŵamjigele.

25 Metusela paŵakwete yaka 187, jwaŵeleche Lameki. 26 Paŵaŵeleche Lameki, Metusela ŵatemi ni umi kwa yaka yine yakwana 782. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 27 Myoyo, yaka yosope ya Metusela yakwanile 969, ni kaneko jwawile.

28 Lameki paŵakwete yaka 182, jwaŵeleche mwanache jwamlume. 29 Jwalakwe ŵampele mwanachejo lina lyakuti Nowa, ligongo ŵatite, “Aju ni juchachitutendekasya kuti tupumule ku masengo gakupweteka gatukusakamula ni makono getu mu litaka lyele Yehofa ŵalitembelele.” 30 Paŵaŵeleche Nowa, Lameki ŵatemi ni umi kwa yaka yine yakwana 595. Mu yaka yeleyi, jwalakwe jwaŵelechesoni ŵanache ŵane ŵachalume ni ŵachakongwe. 31 Myoyo, yaka yosope ya Lameki yakwanile 777, ni kaneko jwawile.

32 Nowa paŵakwete yaka 500, jwaŵeleche Semu, Hamu soni Yafeti.