Masalimo
112 Amchimbichisye Ya!*
א [Aleph]
Jwakusangalala ali mundu jwakusamjogopa Yehofa,
ב [Beth]
Mundu jwakusasangalala ni malamusi ga jwalakwejo.
ג [Gimel]
2 Yisukulu ya mundu jwelejo yichiŵa yamachili pachilambo chapasi,
ד [Daleth]
Soni m’bado* wa ŵandu ŵagoloka uchipochela upile.
ה [He]
3 M’nyumba mwakwe mukusaŵa yindu yamtengo wapenani soni chipanje,
ו [Waw]
Soni chilungamo chakwe chichipitilisya mpaka kalakala.
ז [Zayin]
4 Kwa ŵandu ŵagoloka mtima jwalakwe akusaŵala mpela lilanguka m’chipi.
ח [Heth]
Jwalakwejo ali jwachanasa, jwambone mtima soni jwachilungamo.
ט [Teth]
5 Mundu jwakusaŵa jwakoloŵa makono pakwakongosya ŵakulaga, yindu yikumsamjendela chenene.
י [Yod]
Jwalakwe akusatenda yindu yakwe mwachilungamo.
כ [Kaph]
6 Jwalakwejo ngasatenganyika.
ל [Lamed]
Mundu jwachilungamo chachikumbuchilidwa mpaka kalakala.
מ [Mem]
7 Jwalakwe ngasajogopa ngani jilijose jakusakala.
נ [Nun]
Mtima wakwe ngawukusatenganyika ligongo akusamdalila Yehofa.
ס [Samekh]
8 Mtima wakwe pangali jwampaka awutenganye* mwamti jwangajogopa chilichose.
ע [Ayin]
Pambesi pakwe jwalakwe chachisangalala kwawona adani* ŵakwe ali agomechedwe.
פ [Pe]
9 Jwalakwe akusapeleka yindu yakwe kwa jwalijose.* Jwalakwe apeleche yindu kwa ŵakulaga.
צ [Tsade]
Chilungamo chakwe chichitama mpaka kalakala.
ק [Qoph]
Jwalijose chachimchimbichisya jwalakwe ligongo lyakukula kwa machili gakwe.
ר [Resh]
10 Jwakusakala chachiyiwona yeleyi soni ngasasangalala nayo.
ש [Shin]
Jwalakwe chachimemena meno gakwe soni chachisungunukuka.
ת [Taw]
Yakumbila yamtima wa mundu jwakusakala yichimala.