Jwakulalichila

12 Mumkumbuchileje juŵampanganyisye mmwejo jwali jwamkulungwa m’masiku gaunyamata wenu, mkanigayiche masiku gakusawusya soni mkaniyiyiche yaka yele chimchiŵechetaga kuti, “Umi ngawukusangalasyasoni.” 2 Elo, mumkumbuchileje jwalakwe kuŵala kwa lyuŵa, kwa mwesi soni kwa ndondwa mkanikutyoche soni mawunde mkanigawujile, panyuma pakuti wula jamachili jigwile.* 3 Mkaniliyiche lisiku lyele alonda ŵapanyumba chachitanda kutetemela, achalume ŵamachili chachijinama soni achakongwe chachileka kusyaga utandi ligongo lyakuti asigele ŵamnono, soni pele asikana ŵakulingulila pewindo chachilola chipi. 4 Pandaŵi jele matanga gakwawulila kumsewu chachigawugala, soni pele masegwe ga pamalo gakusyajila utandi gachituluka. Pandaŵi jele mundu chachijimuka ligongo lyakulila kwa chijuni, soni pandaŵi jele ŵanache ŵachakongwe wosope chachijimba mwakutuluka. 5 Nambosoni mundu chachijogopaga malo gakwela, soni chachijogopaga kuti pamsewu pana yindu yakogoya. Pandaŵi jeleji chitela cha alimondi chichitenda maluŵa soni chitete chichijenda mwagamba kuliwuta. Pandaŵi jele yakulya ngasiyinong’asoni* ligongo lyakuti mundu akwawula kunyumba jakwe jampaka kalakala, mwamti ŵakulila chachigambaga kwendajenda mumsewu. 6 Mumkumbuchileje jwalakwe lukonji lwasilifa mkanilulekangane, mbale jagolide mkanijikasiche, lulo lwa kulusulo mkanilukasiche soni chitungulu cha pachisima mkanichijonasiche. 7 Kaneko luwundu luchiwujila ku litaka kulwatyochele, soni msimu uchiwujila kwa Mlungu jusyesyene jwele ŵawupeleche.

8 “Yili yangali mate ata panandi,” akuti myoyo jwakulalichilajo. “Yindu yosope yili yangali mate.”

9 Jwakulalichilajo ngaŵa kuti ŵagambile kuŵa jwalundape, nambo ŵajiganyagasoni ŵandu yakumanyilila jwalakwejo. Nambosoni ŵaganichisyaga soni kuwungunya mwakusamala ni chakulinga chakuti alokotele ni kujiŵika pampepe* misyungu jejinji. 10 Jwakulalichilajo jwawungunyisye maloŵe gakusangalasya, soni jwalembile maloŵe gakulondola ga yindu yayili yisyesyene.

11 Maloŵe ga ŵandu ŵalunda gali mpela yisonga yakutonyela ng’ombe. Maloŵe gawo gele agasagwile chenene gakusaŵa mpela misomali jajikomelele chenene. Maloŵega gapelechedwe kutyochela kwa m’busa jumo. 12 Mwanangu, pakwamba ya yindu yine kulekapo yambecheteyi, ngumkalamusya kuti: Pangani ja kulemba mabuku gejinji, ŵandu ngasaleka. Soni kumalila ndaŵi jejinji mli mkuŵalanga mabukuga, kukusagamba kumpesya mundu.

13 Pa yosopeyi mfundo jekulungwa jili jakuti: Mjogopeje Mlungu jusyesyene soni mpikanileje malamusi gakwe, pakuŵa yeleyi ni yakusosekwa mundu kuti atendeje. 14 Pakuŵa Mlungu jusyesyene chachiwelusya pa yosope yakusatenda ŵandu kupwatikapo chindu chilichose chachikusatendekwa mwakusisa, ni chakulinga chakuti alole naga chinducho chili chambone kapena chakusakala.