Buku Jandanda ja Mbili
16 Kaneko ŵandu ŵala ŵajinjisye libokosi lya Mlungu jwakuwona lila mutenti jaŵakunjile Daudi kuti litameje. Panyuma pakwe, ŵapeleche mbopesi syakutinisya soni mbopesi syamkamulano pameso pa Mlungu jwakuwona. 2 Daudi paŵamalisisye kupeleka mbopesi syakutinisya soni mbopesi syamkamulanosyo, ŵapele upile ŵandu mu lina lya Yehofa. 3 Kaneko jwalakwe ŵapeleche kwa Ayisalayeli mkate* wesyungulile, keke jwa yisogosi ya chitela cha kanjesa, soni keke jwa yisogosi yejumu ya mipeleya. Ŵayipeleche yeleyi kwa jwamlume ni jwamkongwe jwalijose. 4 Panyuma pakwe, jwalakwe ŵasagwile Alefi ŵane kuti atumichileje kuŵaŵisile Libokosi lya Chilanga lya Yehofa. Ŵatesile yeleyi ni chakulinga chakuti amkumbuchileje, amyamichileje soni amchimbichisyeje Yehofa Mlungu jwa Ayisalayeli. 5 Asafu ŵaliji jwakulongolela, jwaŵili jwakwe ŵaliji Sekaliya. Yeiyeli, Semilamoti, Yehiyele, Matitiya, Eliyabu, Benaya, Obedi-edomu, soni Yeiyeli ŵajimbaga pakamulichisya masengo yakwimbila ya ngonji yakulekanganalekangana. Nambo Asafu ŵajimbaga pakamulichisya masengo yakwimbila yakusyungulila yakuwoneka mpela mbale. 6 Benaya soni Yahasiyele ŵaŵaliji ŵakutaga mbopesi ŵajimbaga malipenga ndaŵi syosope pasogolo pa Libokosi lya Chilanga lya Mlungu jwakuwona.
7 Lisiku lyeleli ni lyalyaliji lyandanda kuti Daudi apeleche nyimbo jakumyamichila Yehofa jaŵapechile. Nyimbo jeleji ŵamjiganyisye Asafu pampepe ni achalongo achimjakwe kuti ajijimbe. Nyimbo jakwe ni aji:
8 “Amyamichileje Yehofa, aŵilanjileje pa lina lyakwe,
Mwasalileje ŵandu yakwamba masengo gakwe.
9 Amjimbileje jwalakwe, amjimbile nyimbo syakumkwesya* jwalakwejo,
Aganichisyeje mnope* ya masengo gakwe gosope gakusimonjesya.
10 Anyadileje kuti akusalichimbisya lina lyakwe lyeswela.
Mitima ja ŵandu ŵakusamsosasosa Yehofa jisangalale.
11 Amsosesose Yehofa soni machili gakwe.
Aloleje kwa jwalakwejo* ndaŵi syosope.
12 Akumbuchileje masengo gakwe gekulungwa gatesile.
Akumbuchilejesoni yakusimonjesya yakwe soni kawelusye kakwe,
13 Jemanja ŵanache ŵa* Isalayeli jwakutumichila jwakwe,
Jemanja ŵanache ŵa Yakobo, ŵandu ŵaŵamsagwile.
14 Jwalakwejo ali Yehofa Mlungu jwetu.
Jwalakwe akusawelusya chilambo chosope.
15 Mkumbuchileje chilanga chakwe mpaka kalakala,
Yaŵasasile kuti chachitenda,* ku mibado* 1,000.
16 Chelechi ni chilanga chaŵatesile ni Abulahamu,
Soni yaŵalumbile kwa Isaki.
17 Jwalakwejo ŵatamilikasisye chilanga chelechi kwa Yakobo mpela lilamusi,
Soni mpela chilanga changamala kwa Isalayeli.
18 Pakuchitamilikasya ŵatite, ‘Chinjimpa chilambo cha Kanani
Kuti chiŵe chipanje chenu chakuti mpochele.’
19 Pandaŵi jiŵaŵechetaga yeleyi jemanja mwaliji ŵandu ŵamnono,
Elo, mwaliji ŵamnono mnope, soni mwaliji achalendo m’chilambocho.
20 Jemanjajo ŵagambaga kwendajenda kutyoka chilambo achi kwawula chilambo chine,
Kutyochela kwaŵalamulilaga mwenye jwine kwawula kwa mwenye jwine.
21 Mlungu nganakunda kuti mundu jwalijose ŵalagasye jemanjajo.
Nambo jwalakwe ŵagajamukaga mamwenye ligongo lya jemanjajo.
22 Ŵagasalilaga kuti, ‘Mkakwaya ŵandu ŵangu ŵanasagwile,
Soni mkatendela chilichose chakusakala ŵakulochesya ŵangu.’
23 Amjimbile Yehofa, jemanja wosope ŵakutama pachilambo chapasi.
Lisiku lililyose alengesyeje yakwamba chikulupusyo chakwe.
24 Alengesyeje pasikati pa mitundu ja ŵandu yakwamba uchimbichimbi wakwe,
Soni yakwamba masengo gakwe gakusimonjesya pasikati pa ŵandu wosope,
25 Pakuŵa Yehofa ali jwamkulungwa soni jwakwenela kumchimbichisya mnope.
Jwalakwejo ali jwakutesya woga mnope kujipunda milungu jine josope.
26 Milungu jine josope ja ŵandu ŵane jili milungu jangali mate.
Nambo Yehofa ni Mlungu juŵapanganyisye kwinani.
27 Uchimbichimbi* ni kusalala yimsyungulile jwalakwejo.
Pamalo gakwe gakutama pana machili soni kusangalala.
28 Maŵasa gosope ga ŵandu gampe Yehofa uchimbichimbi wakwe wakusaŵajilwa kupochela.
Amchimbichisyeje Yehofa ligongo lya ukulu wakwe soni machili gakwe.
29 Mpelecheje uchimbichimbi wakuŵajilwa ku lina lya Yehofa.
Myicheje pameso pakwe ni mbaso.
Mumtindiŵalileje Yehofa mli m’wete yakuwala yayili yeswela pameso pakwe.*
30 Chilambo chosope chapasi chitetemele pameso pa jwalakwejo.
Chilambo chapasi chatamilichiche mwakulimbangana, mwamti nganichiŵa chityosile pamalo gakwe.*
31 Kwinani kusangalale, soni chilambo chapasi chisangalale.
Alalichile pasikati pa mitundu ja ŵandu kuti, ‘Yehofa aŵele mwenye!’
32 Nyasa soni yindu yosope yayili mwelemo yilindime.
Migunda soni yindu yosope yayili mwelemo yisangalale.
33 Pandaŵi jijiji yitela ya mungalango yigumile mwakusangalala pameso pa Yehofa,
Pakuŵa jwalakwe akwika* kukwelusya chilambo chapasi.
34 Amyamichile Yehofa, pakuŵa jwalakwe ali jwambone.
Chinonyelo chakwe changamala chichitama mpaka kalakala.
35 Jemanja aŵechete kuti, ‘Atukulupusye wawo Mlungu jwakusatukulupusya.
Atusonganganye pampepe ni kutukulupusya mmyala mwa ŵandu ŵamitundu jine.
Atende yeleyi ni chakulinga chakuti tuchimbichisye lina lyawo lyeswela
Nambosoni kuti twakwesye wawojo mwakusangalala.
36 Achimbichikwe Yehofa Mlungu jwa Ayisalayeli.
Jwalakwejo achimbichikwe mpaka kalakala.’”
Pelepo ŵandu wosopewo ŵajanjile kuti, “Ame!”* soni ŵamchimbichisye Yehofa.
37 Panyuma pakwe, Daudi ŵamlesile Asafu pampepe ni achalongo achimjakwe ŵala kuŵaŵisile Libokosi lya Chilanga lya Yehofa kula. Jemanjaji ŵalesile kuti atumichileje kweleko ndaŵi syosope, mwakamulana ni masengo gawo ga lisiku lililyose. 38 Obedi-edomu pampepe ni achalongo achimjakwe ŵakwana 68 ŵaliji alonda. Obedi-edomu jwine juŵaliji mwanache jwa Yedutuni nambosoni Hosa nombenawo ŵalijisoni alonda. 39 Daudi ŵamŵisile jwakutaga mbopesi Sadoki pampepe ni ŵakutaga mbopesi achimjakwe kuti atumichileje ku chitenti cha Yehofa chachaliji pamalo gakwela ku Gibiyoni. 40 Ŵaŵisile jemanjaji kuti ndaŵi syosope apelecheje kwa Yehofa mbopesi syakutinisya pamalo gakupelechela mbopesi jakutinisya, kundaŵi ni ligulo. Nambosoni kuti atendeje yindu yosope yayalembedwe mu Chilamusi cha Yehofa yaŵalamwile Ayisalayeli. 41 Jemanjaji ŵalijisoni pampepe ni Hemani, Yedutuni, soni achalume ŵane wosope ŵaŵasagwile mwakwakolanga mena kuti amyamichileje Yehofa, ligongo “chinonyelo chakwe changamala chichitama mpaka kalakala.” 42 Hemani ni Yedutuni ŵaliji kweleko kuti ajimbeje malipenga, yakwimbila yakusyungulila yakuwoneka mpela mbale nambosoni yida yakulekanganalekangana yakwimbila pakumchimbichisya Mlungu jwakuwona. Nambosoni ŵanache ŵa Yedutuni ŵaliji alonda ŵa pageti. 43 Pambesi pakwe ŵandu wosope ŵawujile msimangwawo. Nombenajo Daudi ŵawujile kumangwakwe ni kuja kulipa upile liŵasa lyakwe.