Genesesi
20 Sambano Abulahamu ŵasamile kweleko ni kwawula ku chilambo cha Negebu. Ni ŵatandite kutama pasikati pa Kadesi ni Suli. Jwalakwe ŵapite kukutamasoni* ku Gelali. 2 Pandaŵi jiŵaliji ku Gelali Abulahamu jwapitilisye kwasalila ŵandu pakwamba ya Sala kuti, “Jweleju ali mlumbugwangu.” Myoyo Abimeleki mwenye jwa ku Gelali ŵatumile ŵandu kuti akamjigale Sala ni kwika najo kwa jwalakwe. 3 Kaneko Mlungu ŵayiche kwa Abimeleki chilo kupitila mu sagamisi. Ni ŵamsalile kuti, “Mmwetu chim’we, ligongo lya jwamkongwe jwamumjigelejo. Pakuŵa jwamkongwe jweleju ali jwapeŵasa mwamti jwana asyene.” 4 Nambo Abimeleki nganamŵandichila* jwamkongwejo. Myoyo jwalakwe ŵaŵechete kuti, “Yehofa, ana wawojo chawuwulaje mtundu wangalemwa? 5 Ana jwamlumeju nganasalila jika une kuti, ‘Ŵeleŵa ali alumbuŵangu,’ soni ana jwamkongwejo nganaŵecheta jika kuti, ‘Ŵeleŵa ali alumbuŵangu?’ Unetu nganingola nganisyo syakulemwecheka silisyose mumtima mwangu panatendaga yeleyi soni nganisakaga kutenda yakulemwecheka.” 6 Sambano Mlungu jwakuwona ŵamsalile jwalakwejo kupitila mu sagamisimo kuti, “Unetu nayimanyi kuti mtesile yeleyi mli mkwete nganisyo syambone. Myoyo namlekasisye kuti mkatenda chakulemwa chelechi ni kuleŵela une. Ni ligongo lyakwe nganingunda kuti mumkwaye jwalakwejo. 7 Sambano mumwuchisye jwamkongwejo kwa ŵamkwakwe. Pakuŵa ŵamkwawo ali jwakulochesya, soni chachimpopelela mmwejo kuti mpitilisye kuŵa ni umi. Nambo naga ngamumwuchisya mmanyilile kuti mmwejo chim’we nditu pampepe ni ŵandu wosope ŵa m’nyumba jenu.”
8 Pelepo Abimeleki ŵajimwiche kundaŵindaŵipe ni ŵaŵilasile ŵamasengo ŵakwe ni kwasalila ngani josopejo. Jemanjaji paŵapikene nganijo ŵatesile woga mnope. 9 Kaneko Abimeleki ŵamŵilasile Abulahamu ni kumwusya kuti, “Ayi ni yapi yamtutendeleyi? Ana une namleŵele chichi kuti myiche nawo ulemwa wamti myiyi pa une soni pa ŵandu ŵa mu uchimwene wangu? Yamtesileyitu ngaŵa yambone.” 10 Abimeleki ŵamwusisyesoni Abulahamu kuti, “Ana chakulinga chenu chaliji chichi kusyesyene pamwatendaga yeleyi?” 11 Abulahamu ŵajanjile kuti, “Yeleyi natesile ligongo lyakuti mumtima mwangu nayiwonaga kuti, ‘Ŵandu ŵa mumsindamu ali ŵangamjogopa Mlungu, mwamti mpaka ambulaje ligongo lya ŵamkwanguŵa.’ 12 Nambope jwalakwe ali mlumbugwangu nditu, mwamti baba ŵetu ali ŵampepe twagambile kulekangana mama. Ni une namjigele kuti aŵe ŵamkwangu. 13 Myoyo Mlungu paŵatendekasisye kuti ndyoche m’nyumba ja baba ŵangu, nasalile ŵamkwanguŵa kuti, “Kulikose kwachitujawuleje mkasaleje kuti, ‘Ŵeleŵa ali alumbuŵangu.’ Pachimkatendeje yeleyi nikuti chimkalosyeje une chinonyelo changamala.””
14 Kaneko Abimeleki ŵajigele ngondolo, ng’ombe soni ŵamasengo ŵachalume ni ŵachakongwe ni kumpa Abulahamu. Ŵamjigelesoni Sala ni kumwuchisya kwa Abulahamu. 15 Abimeleki ŵamsalilesoni Abulahamu kuti, “Chilambo chosopechi chili mmyala mwangu. Myoyo mkwete upile wakutama palipose pamkusaka.” 16 Kaneko ŵamsalilesoni Sala kuti, “Ngumpa mlumbugwenuju mbiya syasilifa syakwana 1,000. Mbiya syelesi uli umboni pameso pa ŵandu wosope ŵali ni mmwejo soni pa jwalijose kuti mmwejo nganimlemwa chilichose soni kuti une nganinamsakasya mmwejo.” 17 Pelepo Abulahamu ŵatandite kupopela kwa Mlungu jwakuwona, soni Mlungujo ŵamposisye Abimeleki pampepe ni ŵamkwakwe soni achikapolo ŵakwe ŵachakongwe, mwamti ŵatandite kuŵeleka ŵanache. 18 Yaliji myoyo ligongo lyakuti pandaŵiji Yehofa ŵatendekasisye achakongwe wosope ŵa m’nyumba ja Abimeleki kuŵa ŵangaŵeleka ligongo lya Sala ŵamkwakwe Abulahamu.