Genesesi
21 Sambano Yehofa ŵamkumbuchile Sala mpela muŵaŵechetele pandanda pala, mwamti Yehofajo ŵamtendele Sala yindu yaŵasasile kuti chamtendele. 2 Myoyo Sala ŵakwete msigo ni ŵamŵelechele Abulahamu mwanache jwamlume. Mwanachejo jwapagwile Abulahamu ali akalambele soni pandaŵi jele Mlungu ŵasasile kuti chachipagwa. 3 Mwanache juŵaŵeleche Salajo, Abulahamu ŵampele lina lyakuti Isaki. 4 Kaneko Abulahamu ŵamwumbesye Isaki mwanache jula paŵakwanisye masiku 8, mwakamulana ni yaŵamlamwile Mlungu. 5 Isaki paŵapagwaga, Abulahamu ŵaliji ali akwete yaka 100. 6 Kaneko Sala jwaŵechete kuti, “Mlungu andendekasisye une kuŵa jwakusangalala. Myoyo jwalijose jwachapikane yayindendecheleyi chasangalale ni une.”* 7 Jwalakwe ŵaŵechetesoni kuti, “Ana ŵani ŵaŵamanyililaga kuti ‘Sala ŵamkwakwe Abulahamu chachijonjesya mwanache?’ Atamose kuti Abulahamu akalambele, nambotu yikomboleche kumŵelechela jwalakwe mwanache jwamlume.”
8 Sambano Isaki ŵakusile mwamti ŵamlekasisye konga. Pelepo Abulahamu ŵalinganyisye pwando jekulungwa palisiku lyele mwanachejo ŵalesile konga. 9 Nambo Sala ŵamwonaga mwanache jwa Hagala, jwamkongwe jwa ku Iguputo jula, ali mkumseka Isaki. Mwanache jweleju ni jwele Hagala ŵamŵelechele Abulahamu. 10 Myoyo Sala ŵamsalile Abulahamu kuti, “Mumtopole msikana jwamasengoju pampepe ni mwanache jwakwe. Ligongo mwanache jwa msikana jwamasengoju ngasaŵa jwakupochela chipanje yimpepe ni mwanache jwangu Isaki.” 11 Nambo yaŵaŵechete Sala pakwamba ya mwanacheju, nganiyimsangalasya Abulahamu ata panandi. 12 Pelepo Mlungu ŵamsalile Abulahamu kuti, “Mkatumbila ni yakuŵecheta Sala pakwamba ya mnyamataju soni yakwamba msikana jwamasengoju. Mumpikanile jwalakwe, pakuŵa ŵandu wosope ŵachachikolanjikwa kuti ŵanache* ŵenu tachityochela mwa Isaki. 13 Nambo pakwamba ya mwanache jwa msikana jwamasengoju, nombenajo chinjimtendekasya kuŵa mtundu wekulungwa, pakuŵa jwelejusoni ali mwanache* jwenu.”
14 Pelepo Abulahamu ŵajimwiche kundaŵindaŵipe ni kujigala mkate* soni msaku wa mesi walipende ni kumpa Hagala. Jwalakwe ŵamtwichiche yinduyo pekoyo ni kumsalila kuti ajawuleje pampepe ni mwanache jwakwejo. Myoyo Hagala ŵanyakwiche ni kutanda kwendajenda mu chipululu cha Beele-seba. 15 Pambesi pakwe mesi gagaliji mumsaku walipende gala gamasile, ni ŵamlesile mnyamatajo pasi pa liwukutu. 16 Kaneko jwalakwe ŵatyosile ni kuja kutama kwajikajikape. Ŵatemi palutando lwampaka ukayichile mpamba paponyisye mundu ni ukunje kutyochela paŵaliji mnyamatajo. Mumtima mwakwe, Hagala ŵaŵechetaga kuti, “Ngangusaka kumwona mwanachejo ali mkuwa.” Myoyo jwalakwe ŵatemi chapakutalichila, ni kutanda kulila mwakwesya maloŵe soni mwakulitendela chanasa.
17 Ndaŵi jijojo Mlungu ŵapikene maloŵe ga mnyamatajo pajwalilaga, mwamti lilayika lya Mlungu lyaŵechetene ni Hagala kutyochela kwinani, lyatite, “Ana chitendekwe chichi Hagala? Mkadandawula, pakuŵa Mlungu apikene maloŵe ga mnyamatajo kutyochela pajugonile pala. 18 Mnyakuche, mjawule mkamjimusye mnyamatajo soni mkamkamule pamkono, pakuŵa une chinjimtendekasya jwalakwe kuŵa mtundu wekulungwa.” 19 Kaneko Mlungu ŵamwugwile meso Hagala, mwamti jwalakwe ŵachiweni chisima cha mesi. Pelepo jwapite pachisimapo ni kutaga mesi mumsaku walipendewo, kaneko ni ŵampele mnyamata jula kuti amwe. 20 Myoyo Mlungu ŵaŵele ni mnyamatajo pajwakulaga, soni jwaŵele jwakuponya mipamba pakamulichisya masengo ukunje. 21 Mnyamatajo jwatandite kutama ku chipululu cha Palana. Kaneko mamagwe ŵamjigalile jwamkongwe kutyochela ku chilambo cha Iguputo.
22 Pandaŵi jelejo Abimeleki pampepe ni Fikolo juŵaliji jwamkulungwa jwa gulu jakwe ja asilikali jwaŵechete kwa Abulahamu kuti, “Mlungu aŵele ali kumkamuchisya mmwejo pa yosope yakumtenda. 23 Sambano musimichisye mwakulumbila pameso pa Mlungu kuti chimchiŵa ŵakulupichika kwa une soni kwa ŵanache ŵangu ni ŵane wosope ŵakwika panyuma pangu, nambosoni kuti chimchitenda yindu kwa une ni chilambo chamkutamachi mwakulosya chinonyelo changamala mpela mundendele une mula ni mmwejo.” 24 Myoyo Abulahamu ŵajanjile kuti, “Ngulumbila.”
25 Nambope Abulahamu ŵadandawile kwa Abimeleki pakwamba ya chisima cha mesi chele ŵamasengo ŵa Abimelekijo ŵachisumwile mwachiwawa. 26 Abimeleki jwajanjile kuti, “Unetu ngangumanyilila juŵatesile yeleyi. Soni mmwejo nganimusalila, mwamtitu une kupikana ni kweleku ya ngani jeleji.” 27 Pelepo Abulahamu ŵajigele ngondolo soni ng’ombe ni kumpa Abimeleki, nambosoni jemanjaji ŵatesile chilanga pasikati pawo. 28 Abulahamu ŵasagwile ngondolo syekongwe syakwana 7 kutyochela pa gulu ja ngondolo sinesyo ni kusiŵika pajika. 29 Pelepo Abimeleki ni ŵamwusisye Abulahamu kuti, “Ligongo chichi msagwile ngondolo syekongwe 7 syelesi ni kusiŵika pajika?” 30 Abulahamu ŵajanjile kuti, “Wawojo apochele ngondolo 7 syekongwe syelesi kutyochela mmyala mwangu kuti uŵe umboni wakuti une ni junasosile chisima chelechi.” 31 Ni ligongo lyakwe malogo ŵagapele lina lyakuti Beele-seba* ligongo pamalo gelega ni gele jemanjajo ŵalumbililene. 32 Myoyo, jemanjajo ŵatesile chilanga ku Beele-seba. Pambesi pakwe, Abimeleki ŵajigalene ni Fikolo, jwamkulungwa jwa gulu ja asilikali jula, ni kuwujilaga ku chilambo cha Afilisiti. 33 Panyuma pakwe, jwalakwe ŵapandile chitela cha ukwesu ku Beele-seba. Soni ali kweleko, ŵaŵilanjile pa lina lya Yehofa, Mlungu jwandaŵi syosope. 34 Panyuma pa yeleyi Abulahamu ŵatemi m’chilambo cha Afilisiti kwandaŵi jelewu.