Masalimo
Nyimbo ja Daudi.
143 Wawo Yehofa, apikane lipopelo lyangu.
Apikane kuŵenda kwangu kwakuti angamuchisye.
Anjanje une mwakamulana ni kukulupichika kwawo soni kulungama kwawo.
2 Akalimbana pamagambo ni jwakutumichila jwawo,
Pakuŵa pangali mundu jwalijose jwampaka asimanikwe kuŵa jwangalemwa* pameso pawo.
3 Pakuŵa mdani* jwangu akunguyakuya une.
Jwalakwe angwisisye une pasi ni kumbondaponda.
Jwalakwe atendekasisye kuti ndameje m’chipi mpela ŵandu ŵaŵawile kalakala.
4 Ndengwiche.*
Mtima wangu utesile mandilindili mkati mwangu.
5 Ngusakumbuchila masiku gakalakala.
Ngusaganichisya yakwamba masengo gawo gosope.
Mwakusachilila ngusaganichisya mnope* yakwamba masengo ga makono gawo.
6 Ngusapopela kwa wawojo ndili ngwesisye makono gangu.
Une ngwasachilila wawojo mpela mwachikusatendela chilambo chejumu pakusachilila mesi. (Selah)
7 Anjanje une mwachitemachitema, wawo Yehofa.
Machili gangu gamasile.
Akasisila une ngope jawo.
Naga akutenda myoyo chinjiŵa mpela ŵandu ŵakwinjila mwisimbo.*
8 Angunde une kuti mbikane yakwamba chinonyelo chawo chakulupichika kundaŵi,
Pakuŵa une ngusinadalila wawojo.
Amanyisye une litala lyangusosekwa kwenda,
Pakuŵa ngalawuchile kwa wawojo.
9 Angulupusye une kwa adani ŵangu, wawo Yehofa.
Une ndilile kwa wawojo kuti anjenjele.
10 Anjiganye une kuti ndendeje yakusasaka wawojo,
Pakuŵa wawojo ali Mlungu jwangu.
Wawojo ali ŵambone,
Nguŵenda kuti msimu wawo ulongoleleje une kuti njendeje palitala lyambone.*
11 Wawo Yehofa, asunje une jwaumi ligongo lya lina lyawo.
Angulupusye une mu yipwetesi yangu, mwakamulana ni kulungama kwawo.
12 Mwakamulana ni chinonyelo chawo chakulupichika, ŵamasye* adani ŵangu.
Ŵajonanje wosope ŵakundagasya,
Pakuŵa une ndili jwakutumichila jwawo.