Ekisodo
4 Nambope Mose ŵamjanjile Mlungu kuti, “Nambi uli naga jemanjajo ngaja kungulupilila soni naga ngakupikanila maloŵe gangu ni kuŵechetaga kuti, ‘Yehofa nganawonechela kwa mmwejo.’” 2 Pelepo Yehofa ŵamwusisye jwalakwejo kuti, “Ana chichi chachili mmyala mwenucho?” Jwalakwe ni ŵajanjile kuti, “Jili ndodo.” 3 Kaneko ŵamsalile kuti, “Mjiponye pasi ndodojo.” Pelepo jwalakwe ŵajiponyisye pasi ni jasandwiche lijoka, mwamti Mose ŵatandite kulitila lijokalyo. 4 Sambano Yehofa ŵamsalile Mosejo kuti, “Mtambasukule mkono wenu ni mlikamule lijokalyo kumchila.” Myoyo jwalakwe ŵatambasukwile mkono wakwe ni kulikamula lijoka lila, mwamti lijokalyo lyaŵelesoni ndodo mmyala mwakwe. 5 Kaneko Mlungu ŵamsalile jwalakwejo kuti, “Mkatende yeleyi ni chakulinga chakuti jemanjajo akakulupilile kuti Yehofa Mlungu jwa achinangolo ŵawo, Mlungu jwa Abulahamu, Mlungu jwa Isaki soni Mlungu jwa Yakobo awonechele kwa mmwejo.”
6 Yehofa ŵamsalilesoni jwalakwejo kuti, “Mjinjisye mkono wenu mu chakuwala chenucho.” Pelepo jwalakwe ŵajinjisye mkono wakwewo mu chakuwala chakwe chila. Paŵawukopwesye, jwalakwe ŵasimonjile kuyiwona kuti mkono wakwe wosope ugambile kuti mbuu uli utesile matana. 7 Kaneko ŵamsalilesoni jwalakwejo kuti, “Mjinjisyesoni mkono wenuwo mu chakuwalacho.” Myoyo jwalakwe ŵajinjisyesoni mkono wakwe wula mu chakuwala chila. Paŵawukopwesye mu chakuwalacho ŵasimonjile kuyiwona kuti mkono wula wawujile muwaŵelele pandanda. 8 Ni ŵamsalile kuti, “Naga jemanjajo ngaja kukulupilila chimanyisyo chandandachi kapena kumpikanila mmwejo, nikuti chakamkulupilile pachimkalosye chimanyisyo chaŵilichi. 9 Nambo naga jemanjajo ngaja kukulupilila yimanyisyo yiŵiliyi soni naga akukana kupikanila maloŵe genu, mkajigale mesi kutyochela mu lusulo lwa Nailo ni kugataga pasi palitaka lyejumu. Pelepo mesi gachimchijigala mu lusulo lwa Nailogo gachisanduka myasi palitakapo.”
10 Sambano Mose ŵamsalile Yehofa kuti, “Pepani Yehofa, unetu ndili jwangamanyilila kuŵecheta. Kutandila kalakala mpaka apano pakuŵechetana ni une jwakutumichila jwawo, mbele ndili mkulepela kuŵecheta chenene soni lulumi lwangu luli lwakusitopa.” 11 Pelepo Yehofa ŵamwusisye jwalakwejo kuti, “Ana ŵani ŵaŵapanganyisye pakamwa pa mundu? Soni ŵani ŵakwete machili gakumtendekasya mundu kuŵa jwangaŵecheta kapena jwangapikana kapena jwakulola chenene kapena jwangalola kwene? Ana ngati ndili une, Yehofa? 12 Myoyo mjawule. Une chingaŵe ni mmwejo pachimkaŵecheteje soni une chinamjiganye yakuti mkaŵechete.” 13 Nambo jwalakwe ŵajanjile kuti, “Pepani Yehofa. Chonde, atumisye mundu jwine jwakusaka kumtuma nambo ngaŵa une.” 14 Pelepo Yehofa ŵamtumbilile Mosejo ni ŵamwusisye kuti, “Nambi wuli mkulugwenu Aloni jwali Mlefi? Ngumanyililatu kuti jwalakwe akusakombola kuŵecheta chenene. Pelepa jwalakwe ali mwitala akwika kukusimana ni mmwejo. Soni pachamwone mmwejo, mtima wakwe chiwusangalale mnope. 15 Myoyo mŵechetane ni jwalakwe soni mumsalile yakuti akaŵechete, soni une chingaŵe ni jemanja pandaŵi jachimkaŵecheteje mwamti chinamjiganye jemanja yindu yamkusosekwa kutenda. 16 Jwalakwe ni juchakaŵecheteje kwa ŵanduwo mmalo mwa mmwejo soni jwalakwe chakaŵe jwakumŵechetela, mwamti mmwejo chimkaŵe mpela Mlungu kwa jwalakwejo. 17 Mmwejo chimkajigaleje ndodo jeleji mmyala mwenu soni chimkatendeje yakusimonjesya ni ndodojo.”
18 Myoyo Mose ŵapite kwa Yetelo, akwegwe ŵakwe ŵalume ŵala ni kwasalila kuti, “Angunde kuti njawuleje, ngusaka mbujile kwa achalongo achimjangu ku Iguputo kuti ngalole naga ali chiŵela umi.” Pelepo Yetelo ŵamjanjile Mose kuti, “Mjawulani, soni mjende chenene.” 19 Panyuma pakwe, Yehofa ŵamsalile Mose ku Midiyani kula kuti, “Mnyakuche, mwujile ku Iguputo pakuŵa ŵandu wosope ŵaŵasakaga kumwulaga mmwejo, apano ŵawile.”
20 Kaneko Mose ŵajigele ŵamkwakwe soni ŵanache ŵakwe ŵachalume ni kwakwesya pa bulu, mwamti ŵawutandite ulendo wakwawula ku chilambo cha Iguputo. Nambosoni Mose ŵajigele ndodo ja Mlungu jwakuwona jila mmyala mwakwe. 21 Kaneko Yehofa ŵamsalile Mose kuti, “Pachimwujile ku Iguputo, mkalolechesye kuti mtesile pameso pa Falawo yakusimonjesya yosope yanampele machili gakuti mtendejeyi. Nambo une chingakunde kuti jwalakwe akaŵe jwakumula mtima mwamti ngaja kwakunda ŵanduwo kuti atyoche. 22 Pachimkayiche kwa Falawo mkamsalile kuti, ‘Yehofa aŵechete kuti, “Isalayeli ali mwanache jwangu jwamlume jwandanda kupagwa. 23 Myoyo ngumsalila kuti, Mumkunde mwanache jwangu jwamlume kuti ajawuleje ni chakulinga chakuti akandumichile une. Nambo naga mkukana kuti jwalakwejo ajawuleje, une chinjimwulaga mwanache jwenu jwamlume jwandanda kupagwa.”’”
24 Sambano ali mwitala soni ali ayiche pamalo gakupumulila, Yehofa ŵasimene najo mwamti ŵasakaga kumwulaga. 25 Pambesi pakwe, Sipola ŵajigele kaganga kakutema ni kumwumbachisya mwanache jwakwe jwamlume mwamti lipende lyakwe ŵaligwichisye pasajo pakwe ni jwaŵechete kuti, “Pakuŵa mmwejo mli ŵamkwangu kupitila m’myasi jeleji.” 26 Myoyo Mlungu ŵamkundile jwalakwe kuti ajawuleje. Pandaŵi jelejo Sipola jwaŵechete kuti, “Mŵele mlombela kupitila m’myasi” ligongo lya kuwumbasya kweleku.
27 Kaneko Yehofa ŵamsalile Aloni kuti, “Mjawule ku chipululu kuti mkasimane ni Mose.” Myoyo Aloni ŵanyakwiche ni ŵasimene ni Mose palitumbi lya Mlungu jwakuwona mwamti ŵamkumbatile jwalakwe mwachinonyelo.* 28 Pelepo Mose ŵamsalile Aloni maloŵe gosope gaŵasasile Yehofa, Mlungu juŵamtumile jwalakwe. Ŵamsalilesoni jwalakwe yimanyisyo yakusimonjesya yosope yele Mlungu ŵamlamwile jwalakwe kuti akayitende. 29 Panyuma pakwe, Mose ni Aloni ŵapite kukwasonganganya achakulungwakulungwa wosope ŵa Ayisalayeli. 30 Kaneko Aloni ŵasalile achakulungwakulungwawo maloŵe gosope gaŵaŵechete Yehofa kwa Mose, mwamti jwalakwe jwatesile yimanyisyo yakusimonjesya yosope pameso pa ŵanduwo. 31 Panyuma pa yeleyi ŵanduwo ŵakulupilile. Jemanjaji paŵapikene yakuti Yehofa ŵakumbuchile Ayisalayeli soni akuweni kulagasika kwawo, ŵatindiŵele ni kwinama mpaka ngope syawo pasi.