Detulonomo
14 “Jemanja mli ŵanache ŵa Yehofa Mlungu jwenu. Myoyo mkalikatagakataga pachilu chenu kapena kumyola lupala pausyo penu* ligongo lya mundu jwam’we. 2 Mkaja kutenda yeleyi pakuŵa jemanja mli ŵandu ŵaswela kwa Yehofa Mlungu jwenu, soni Yehofajo amsagwile jemanja kutyochela pasikati pa ŵandu wosope ŵakutama pachilambo chapasi kuti mŵe ŵandu ŵakwe, chipanje chakwe chapadela.
3 “Mkalyaga yakulya yine yiliyose yayili yakunyalaya pameso pa Mlungu. 4 Nyama syamkusosekwa kuti mlyeje ni asi: Ng’ombe, ngondolo, mbusi, 5 mbaŵala, chiŵalama, mtundu wine wa mbaŵala, mbusi jamwitinji, ngolombwe, ngondolo jamwitinji nambosoni ngondolo jam’matumbi. 6 Mpaka mlye nyama jilijose jakola yikotwa yegaŵikangane soni jajikusaselula.* 7 Nambope ngamkusosekwa kulya yinyama yayikusaselula nambo yangali yikotwa yegaŵikangane kapena yinyama yegaŵikangane yikotwa nambo yangaselula. Mkalyaga ngamila, kalunga soni njechele, ligongo nyama syelesi sikusaselula nambo syangali yikotwa yegaŵikangane yakola mpata pakatikati. Yinyama yeleyi myiwoneje kuŵa yangaswejela. 8 Mkalyagasoni liguluŵe ligongo lyangaselula atamose kuti likwete yikotwa yegaŵikangane yakola mpata pakatikati. Nyama jeleji mjiwoneje kuŵa jangaswejela. Ngamkusosekwa kulya yinyama yeleyi kapena kuyikwaya payiwile.
9 “Pa yaumi ya m’mesi mpaka mlyeje ayi: Mpaka mlye yaumi yiliyose ya m’mesi yayikwete yipyepye soni maŵamba. 10 Nambo ngamkusosekwa kulya chaumi chilichose cha m’mesi changanichikola chipyepye soni maŵamba. Yaumi yeleyi myiwoneje kuŵa yangaswejela.
11 “Yijuni yiliyose yayili yeswejele mpaka mlyeje, 12 nambo ngamkusosekwa kulya yijuni yangaswejela mpela ayi: ngwasi, chimbanga, litumbusi lyepiliwu, 13 yitotola yechejewu, yitotola yepiliwu soni mitundu jine josope ja yitotola. 14 Ngamkusosekwa kulyasoni makungulu ga mitundu josope, 15 ndiŵatiŵa, chisyamtima,* kawuye, nyanga sya mtundu uliwose, 16 namame, manjichi gelewu mawiwi, mbata ja m’mesi, 17 chingwititi,* litumbusi, mbipi 18 lisekwe, yingongompale yamitundu josope, chijuni chakuwoneka mpela lisolokoto, nambosoni chiputiputi. 19 Mkalyagasoni tulombo tosope twakola mapapiko twakwenda m’tumagulu. Mtuwoneje tulombo tweletu kuŵa twangaswejela. 20 Nambo yaumi yine yiliyose yayili yeswejele yakola mapapiko mpaka mlye.
21 “Ngamkusosekwa kulya nyama jilijose jajiwile jika. Mpaka mwape nyama jelejo ŵandu ŵamitundu jine ŵakutama m’misinda jenu* kuti alye kapena mpaka mjisumisye kwa ŵandu ŵamitundu jine. Mkalyaga nyama jelejo ligongo jemanja mli ŵandu ŵaswela kwa Yehofa Mlungu jwenu.
“Mkatelekaga mwanache jwa mbusi mu mkaka wa mamagwe.
22 “Chaka chilichose mkalepelaga kupeleka chalikumi cha mbeju syenu silisyose sya mumgunda mwenu. 23 Mkalyeje pameso pa Yehofa Mlungu jwenu chalikumi cha mbeju syenu, cha finyo jwenu jwasambano soni cha mawuta genu. Mkalilejesoni kweleko mwanache jwalijose jwandanda kupagwa jwa ng’ombe, jwa ngondolo soni jwa mbusi. Yindu yeleyi mkayilileje kumalo gachakasagule jwalakwejo kuti kuŵe lina lyakwe. Mkatendeje yeleyi ni chakulinga chakuti mkalijiganye kumjogopa Yehofa Mlungu jwenu ndaŵi syosope.
24 “Nambo naga yikasimanikwe kuti kumalo kwasagwile Yehofa Mlungu jwenu kuti kuŵe lina lyakwe kuli kutali mnope kwa jemanja soni ulendowo uli welewu mnope kwa jemanja nambosoni Yehofa Mlungu jwenu ampele yindu yejinji, mwamti nganimŵa mkombwele kuti mjigale yalikumi yenu ni kwawula nayo kweleko, 25 mkasumisyeje yalikumiyo ni kwika nasyo mbiyasyo kumalo kwa chakasagule Yehofa Mlungu jwenu. 26 Mbiyasyo mpaka mkasumile chindu chilichose chamkuchisaka chinga ng’ombe, ngondolo, mbusi, finyo kapena yakumwa yiliyose yampaka yimtendekasye mundu kolelwa kapenasoni yine yiliyose yamkuyikumbila. Yindu yeleyi mkalileje pameso pa Yehofa Mlungu jwenu ni kusangalalaga jemanja pampepe ni ŵamwiŵasa mwenu. 27 Nambosoni mkaja kwaliŵalila Alefi ŵakutama m’misinda jenu ligongo jemanjajo nganapochela nawo malo pampepe ni jemanja mpela chipanje chawo.
28 “Kumbesi kwa chaka chatatu chilichose mkajigaleje chalikumi kutyochela pa mbeju jilijose jampatile m’chaka chelecho ni kwika nayo yosopeyo m’misinda jenu kuti yisunjidwe. 29 Pelepo Alefi ŵakutama m’misinda jenu, ŵele nganapochela nawo malo mpela chipanje chawo pampepe ni jemanja, mundu jwamtundu wine jwakutama mumsindamo, mwanache jwangali babagwe* soni jwamkongwe jwamasije jwakutama mumsindamo, wosopeŵa chachiyikaga ni kulyaga yindu yeleyi mpaka kwikuta. Yeleyi yikaŵe myoyo kuti Yehofa Mlungu jwenu akampeje upile jemanja pa yosope yachimkatendeje.